د پاکستان لومړي وزیر شهباز شریف دوشنبې ته خپل سفر په لړ کې د تاجکستان له ولسمشر امام علي رحمان سره د لیدنې پر مهال په سیاسي، اقتصادي، دفاعي، امنیتي او د سوداګرۍ تر څنګ د سیمه ییز اتصال په تړاو د همکاریو پر پراخیدو خبرې کړې دي.
د ډان ورځپاڼې په راپور کې راغلي، چې یاده ناسته د (غبرګولي ۸مه) د پنجشنبې په ورځ ترسره شوې، چې په کې د کولتوري اړیکو تر څنګ د تعلیمي همکارۍ په لوړولو هم بحثونه شوي دي.
د پاکستان پوځ د عامه اړیکو دفتر خبر ورکړی، چې د شمالي وزیرستان په شوال سیمه کې د «ټي ټي پي» وسله والو له لوري د دوی پر یوې پوستې د برید په پایله کې څلور پوځيان وژل شوي. وايي، جګړه کې یې شپږ وسله وال هم وژلي دي.
پوځ زیاته کړې، د پنجشنبې په ورځ د (غبرګولي ۷مه) دغو بریدونو کې د د دوی د یوه قوماندان ډګرمن دانیال اسماعیل په ګډون درې عسکر وژل شوي.
پوځ ادعا کوي، چې په ځوابي بریدونو کې یې د «ټي ټي پي» شپږ وسله وال هم وژلي.
د پاکستان پوځ دغو وژل شویو وسله والو ته په خبرپاڼه کې د «هند نیابتي فتنه الخوارج» اصطلاح کارولې ده.
لا تر اوسه پورې د «ټي ټي پي» وسله والې ډلې د پاکستان پوځ د دغو ادعاوو او په شوال کې د شوي برید په تړاو څه نه دي ویلي.
په دې وروستیو کې د وزیرستانونو په ګډون د پښتونخواه ایالت امنیتي وضعیت ورځ تر بلې ترینګلی کېږي او د پاکستاني طالبانو تحریک هره ورځ د پوځیانو سره د جګړو خبرونه ورکوي. اسلام اباد هم دغه روانو نا امنیو څخه اندېښمن دی او کابل ته یې ګوته نیولې، چې د واکمنو طالبانو تر سیورې لاندې د دوی ضد وسله والو ډلو ته پناه ځایونه ورکړل شوي چې له هماغه ځایه پرې بریدونه پلانوي.
طالبانو که څه هم په رسمي توګه څو څو ځله دغه ادعاوې رد کړې وې، خو کابل ته د پاکستان د بهرنیو چارو وزیر محمد اسحاق ډار او ورسره پلاوي تر سفر وروسته راپورنه خپاره شول چې ګوندې د «ټي ټي پي» د مهارولو لپاره افغان طالبانو ورسره ژمنې کړې دي.
له «ټي ټي پي» ور هاخوا په بلوچستان کې د بلوڅ بېلتون پالو وسله والې ډلې هم پاکستاني پوځ ته لوی سرخوږی جوړ کړی او د ځانمرګو بریدونو تر څنګ پرې مخامخ وسله وال بریدونه هم کوي.
اسلام اباد د کابل تر څنګ نوي ډیلي ته هم ګوته نیولې، چې په دغو نا امنیو کې پراخ لاسونه لري.
د سپينې ماڼۍ مطبوعاتي سکرترې کارولین لیويټ د می په ۲۹مه ویلي، چې د امریکا ولسمشر ډونالډ ټرمپ هیله لري، چې د اوکراین او روسيې د سولې راتلونکې خبرې به د سولې موافقې د منځګړیتوب هڅو ته پرمختګ ورکړي.
د سپنې ماڼۍ مطبوعاتي سکرترې د پنجشنبه په ورځ (د غبرګولي ۸مه) ویلي، چې مسکو وړانديز کړی د مخامخ خبرو بل پړاو دې د جون په ۲مه په استانبول کې تر سره شي.
په داسي حال کې چې روسیه د اوربند لپاره خپل شرایط او د سولې تفاهم لیک ځنډوي او د اوکراین ولسمشر زېلېنسکي د مسکو لخوا د شرایطو د ځنډېدو پر تکتیک نیوکه کړې.
ټرمپ د می په ۲۸مه ادعا وکړه، چې شاوخوا «دوې اونۍ يا یوه نیمه اونۍ» وخت نیسي تر څو څرګنده شي چي د روسیې ولسمشر پوتین وخت ضایع کوي که رښتیا سولې ته لېواله دی.
په سوېلي افریقا کې د کیلي سمېت په نوم یوه مور د خپلې شپږکلنې لور د قاچاق په تور پر عمري بند محکومه شوې ده. همداراز، دوه نور کسان چې په دې قضیه کې ښکیل دي، هر یو پر ۱۰-۱۰ کاله بند محکوم شوي دي.
د رویټرز خبري اژانس د راپور پر بنسټ، دا نجلۍ جوشلېن سمېت نومېده او تېر کال د لوېدیځ کېپ سیمې له یوه کوچني ښار نه نادرکه شوې ده. د هغې تښتونه او د قاچاق قضیه په سوېلي افریقا کې ډېره جدي او ګرمه موضوع ګرځېدلې وه.
محکمې تر څېړنو وروسته اعلان کړی چې د ورکې شوې نجلۍ مور خپله لور پر یوه دودیز معالج د ۲۰ زره رېنډ (۱۱۰۰ ډالر) په بدل کې پلورلې ده.
جوشلین سمېټ لا تر اوسه نده موندل شوې.
قاضي اعلان کړی چې د نجلۍ مور ته د خپلې لور د قاچاق په تور د عمري بند سزا ورکړل شوې ده. همداراز د هغې دوه ملګري د دې نجلۍ د تښتونې په تور پر ۱۰-۱۰ کاله بند محکوم شوي دي.
ویل کېږي چې دا درې واړه کسان پر مخدره توکو روږدي دي، خو قاضي وايي چې د مخدره توکو کارول د هغوی د سزا کمېدو لپاره هېڅ دلیل نهشي کېدای.
یوې فدرالي استیناف محکمې د پنجشنبې په ورځ پرېکړه وکړه چې د ولسمشر ټرمپ اداره کولای شي د بیړني حالت د صلاحیتونو قانون له مخې تعرفې (مالیه) راټوله کړي، محکمې ویلي چې دا کار تر هغې کولی شې د دې پرېکړې پر ضد د حکومت استیناف روان وي.
تر دې وړاندې، یوه فدرالي قاضي د ټرمپ لهخوا د یاد قانون د کارونې مخه نیولې وه. دغه پرېکړه د امریکا د نړیوالې سوداګرۍ محکمې درې قاضیانو له خوا د ورته یوه پراخ حکم له اعلان یوه ورځ وروسته وشوه.
بلخوا، د کورنیو چارو وزارت اعلان کړی چې د ۵۰۰ هغو ښارونو او سیمو لست خپروي چې د "پناه ښارونو" په توګه پېژندل شوي، او وايي د ټرمپ د حکومت له کډوالۍ قوانینو سره همکاري نه کوي.
دا خبرداری به په رسمي توګه هرې سیمې ته واستول شي، څو پر هغو ځایونو فشار زیات شي چې د حکومت په وینا د پراخو ایستنو پر وړاندې خنډ ګرځي.
تېره میاشت، ټرمپ یو اجرائیوي فرمان لاسلیک کړ چې له مخې یې د کورنیو چارو وزیر او لوی څارنوال ته امر شوی و څو د هغو ایالتونو او ښارونو نوملړ خپور کړي چې د فدرالي کډوالۍ له قوانینو سره مخالفت کوي.
د رویټرز خبري اژانس د رېپورټ له مخې، د ملګرو ملتونو سازمان پلان لري چې د خپلې ۳.۷ مېلیارده ډالره بودیجې ۲۰ سلنه کمه کړي. دا پرېکړه کولای شي د دغه سازمان په بېلابېلو برخو کې د شاوخوا ۶ زره ۹۰۰ کارکوونکو دندې لهمنځه یوسي.
د دې پرېکړې لامل مالي ناورین او د امریکا لهخوا له یاد سازمان سره د مرستو کمښت ښودل شوی دی. امریکا متحدهایالات هرکال د ملګرو ملتونو سازمان ته نږدې یو پر څلورمه بودیجه برابروي، خو اوس شاوخوا ۱.۵ میلیارده ډالره د دغه سازمان پوروړې ده.
د دې ترڅنګ، د ډونالډ ټرمپ د ولسمشرۍ پرمهال د امریکا د بهرنیو مرستو کمښت د ملګرو ملتونو ډېری بشري پروګرامونه زیانمن کړي دي. همداراز، چین هم خپلې پیسې په ځنډ سره ورکوي چې دې کار د یاد سازمان ستونزه لا ډېره کړې ده.
د ملګرو ملتونو د مالي چارو مشر چندرامولي راماناثان په یوه یادښت کې ویلي چې د بودیجې کمښت د «UN80» په نوم د ارزونې پروګرام برخه ده. د دغه پروګرام موخه د ۲۱مې پېړۍ د ننګونو لپاره د ملګرو ملتونو چمتوکېدل، د انسانانو کړاو کمېدل او د ټولو لپاره ښه راتلونکی جوړول بلل شوي دي.
ټاکل شوې چې دا کمښتونه د راتلونکي کال د جنوري له لومړۍ نېتې وروسته پلي شي. د ملګرو ملتونو سرمنشي انتونیو ګوترېش ویلي چې ښايي د سازمان مختلفې څانګې سره یوځای، دفترونه ارزانه ښارونو ته ولېږدول شي او بېکاره او غیر ضروري جوړښتونه لهمنځه یوړل شي.