پژواک خبري اژانس خپل څه باندې۳۰ کارکوونکي له دندو ګوښه کړل

یوې سرچینې افغانستان انټرنشنل - پښتو ته وویل، چې پژواک خبري اژانس د شنبې په ورځ (د غبرګولي ۱۰مه) خپل څه باندې۳۰ کارکوونکي له دندو ګوښه کړي دي. د سرچینې په خبره، په ګوښه کړل شویو کسانو کې ډېری یې ولایتي خبریالان دي.

سرچینې دغه راز زیاته کړه، چې پژواک خبري اژانس د "اقتصادي" ستونزو له امله د خپلو کارکوونکو د ګوښه کولو پرېکړه کړې ده.
د یادې رسنۍ یوه ګوښه کړای شوي خبریال له افغانستان انټرنشنل - پښتو سره په خبرو کې د نوم د نه اخیستو په شرط وویل، چې د دغې ادارې مسوولینو نن له دوی سره تماس نیولی و، چې تر دې وروسته ورسره همکاره نه دي.
د هغه په خبره: «اوسمهال په افغانستان کې وزګاري زیاته شوې او داسې په ډلییزه توګه د مسلکي خبریالانو ګوښه کېدل ډېره ستونزمنه ده، ځکه بیا ځلې خپل مسلک کې د دندې پیدا کول اسانه کار نه دی.»
دا په داسې حال کې ده، چې تر دې وړاندې د طالبانو تر واک لاندې ملي ټلویزیون خپل ۳ سوه او طلوع نیوز ۵۰ تنه کارکوونکي له دندو ګوښه کړي دي.
له دې سره، د امریکا غږ ټول کارکوونکي هم په نږدې ورځو کې د ګوښه کېدو لیکونه ترلاسه کوي.
اټکل کېږي، چې د دغو لیکونو د ترلاسه کېدو سره به سملاسي د دغه رسنۍ خپرونې چې له تېرو ۸۰ کلونو راهیسې روانې دي؛ ښايي بندې شي.