د طالبانو د کډوالو او بېرته راستنېدونکو چارو وزارت وایي، چې ۴۹ افغان کډوال له تاجکستان نه افغانستان ته په لومړي ځل ستانه کړل شوي دي. دغه وزارت وايي، چې یاد کډوال د غبرګولي په ۷ او ۸ نېټه د کندز ولایت، شیر خان بندر له لارې افغانستان ته را ایستل شوي.
د کندز ولایت په شیر خان بندر کې د طالبانو د سرحدي امریت په وینا، په راستنو شویو کډوالو کې ۳۶ تنو په تاجکستان کې د اوسېدو پېژندپاڼې او ۱۲ نور یې پاسپورټونه او ویزې هم درلودلې. خو لا تر دې مهال یې د لېږد اصلي لامل نه دی څرګند.
سره له دې چې د اېستل شویو کډوالو د شړلو په اړه دقیق څه نه دي ویل شوي، خو تاجکستاني چارواکو څه موده وړاندې ادعا کړې وه، چې یوازې هغه افغانان اېستل کېږي، چې په دې هېواد کې د اوسېدو قانوني اسناد نه لري.
دا په داسې حال کې ده، چې د کډوالو په چارو کې د ملګرو ملتونو د عالي کمیشنرۍ دفتر تر دې وړاندې له تاجکستان څخه د افغان کډوالو پر اېستلو اندېښنه څرګنده کړې وه.
له تاجکستان څخه د افغان کډوالو د اېستلو بهیر تر هغه وروسته پیل شو، چې له تېر یو نیم کال راهیسې له ایران او پاکستان څخه زرګونه افغانان په جبري توګه اېستل شوي دي او دا لړۍ لا هم په چټکۍ سره روانه ده.
