د هند په شمال ختیځ کې د سېلابونو او ځمکې ښویېدنې له امله ۳۰ کسان مړه شوي دي
هندي چارواکي وایي، چې د دغه هېواد په شمال ختیځو ایالتونو کې د سختو ورښتونو، سېلابونه او ځمکې ښویېدنې له امله په تېرو دوو ورځو کې لږ تر لږه ۳۰ کسان مړه شوي دي.
هندي چارواکي وایي، چې د دغه هېواد په شمال ختیځو ایالتونو کې د سختو ورښتونو، سېلابونه او ځمکې ښویېدنې له امله په تېرو دوو ورځو کې لږ تر لږه ۳۰ کسان مړه شوي دي.
د هندي رسنۍ ټایمز اف انډیا د راپور له مخې؛ وینام، اسام او ارون اچل پردېش هغه ایالتونه دي چې تر ټولو سخت زیانمن شوي دي.
د مېګالیا ایالت سر وزیر کونراډ کې له سیمهییزو چارواکو غوښتي، چې په بېړني حالت کې پاتې شي، «وضعیت جدي دی او موږ باید د خلکو د ژغورنې لپاره محتاطه اوسو.»
که څه هم په هند کې موسمي ورښتونه د اوبو زېرمه کولو او کرنې لپاره حیاتي دي؛ خو کله ناکله دغه ورښتونه له ځان سره ډېرې ویجاړۍ هم لري.
د سعودي عربستان چارواکو د یکشنبې په ورځ وویل، چې له څه باندې ۲۶۹ زره کسانو څخه چې د حج کلني زیارت لپاره یې رسمي اجازه لیکونه نه درلودل، د مکې مکرمه ښار ته له ننوتلو منع کړي دي. دغه اقدام د هغو کسانو پر ضد دی، چې په غېرقانوني ډول د حج مراسمو کې ګډون کوي.
حکومت د حج په مراسمو کې د ګڼې ګوڼې مسوولیت د هغو کسانو پر غاړه اچوي، چې اجازه لیکونه نه لري.
دا شمېر د غېر رسمي زیارتونو کچه او همدارنګه د حج ترسره کولو د غوښتنې زیاتوالی هم په ډاګه کوي.
اوس مهال په مکه کې په رسمي توګه شاوخوا ۱.۴ مېلیونه مسلمانان موجود دي او نور هم په راتلونکو ورځو کې ورزیاتېږي.
هغه کسان چې له اجازه لیکونو پرته حج ترسره کوي، تر ۵۰۰۰ ډالرو پورې جریمه کېږي او نورې سزاګانې لکه اخراج هم پرې عملي کېږي.
دا تګلاره د سعودي اتباعو او د سعودي اوسېدونکو دواړو لپاره عملي ده.
په مکه کې د یوې خبري ناستې پرمهال چارواکو وویل، چې دوی ۲۶۹,۶۷۸ کسان چې اجازه لیکونه یې نه درلودل، د ښار د ننوتلو څخه منع کړي دي.
د قوانینو له مخې، یوازې هغه کسان چې اجازه لیکونه لري کولای شي چې حج ترسره کړي، په دې کې هغه کسان هم شامل دي چې په مکه کې دایمي ژوند کوي.
چارواکو د حج د مقرراتو د سرغړونې په خاطر له ۲۳,۰۰۰ زیات د سعودي اوسېدونکو ته سزاګانې ورکړي او د ۴۰۰ حج شرکتونو جوازونه یې لغوه کړي دي.
جنرال محمد العمري رسنیو ته وویل: «زموږ په څار کې حج کوونکي دي او هر څوک چې اطاعت ونکړي موږ به یې پر وړاندې اقدام وکړو.»
حج د اسلام کلنی مذهبي زیارت دی، چې ګڼو مذهبي مراسمو سره مل وي.
دا د هر مسلمان لپاره چې وس ولري، په ژوند کې یو ځل فرض ګڼل کېږي.
اوکراین د بېپیلوټه الوتکو په برید کې د روسیې پر څلورو اټومي پوځي اډو حمله وکړه، چې په پایله کې یې د ۷ مېلیارده ډالرو په ارزښت ۴۱ روسي بمغورځوونکې الوتکې ویجاړې کړې دي.
دا بریدونه د روسیې پر ضد د جګړې له پیل راهیسې تر ټولو ستر او تر ټولو لرې واټن لرونکي عملیات ګڼل کېږي.
راپورونه وایي، چې اوکراین د یکشنبې په ورځ (د غبرګولي ۱۱مه) د خپلو بې پيلوټه الوتکو له بریدونو مخکې امریکا ته د خپلو پلانونو خبر نه و ورکړی.
د اوکراین ولسمشر ولادیمیر زېلېنسکي تر دې برید وروسته په ټېلګرام کې ولیکل، چې دا یوه «بشپړه خپلواکه هڅه» وه.
زېلېنسکي زیاته کړې، چې دا عملیات له یو نیم کال راهیسې پلان شوي و.
اکسیوس خبري اژانس د اوکرایني چارواکو په حواله ویلي، چې کییف د ډونالډ ټرمپ د ادارې سره هېڅ همغږي یا مخکې اطلاع نه ده شریکه کړې.
د اوکراین د امنیتي ادارې مشرانو د روسیې څلورو پوځي اډو د بریدونو مسوولیت منلی او ویلي یې دي، چې په ټوله کې ۴۱ روسي الوتکې په نښه شوي دي.
د دې ادارې په وینا، د له منځه وړل شویو طیارو ارزښت تر ۷ مېلیاردو ډالرو زیات دی.
زېلېنسکي دغه برید یو «په زړه پورې عملیات» وبلل او ویې ویل، چې دا تر اوسه پورې د اوکرایني ځواکونو تر ټولو لرې واټن لرونکی برید دی.
هغه زیاته کړه، چې په دې عملیاتو کې ۱۱۷ بې پيلوټه الوتکې کارول شوي او روسي ځواکونو ته یې جدي تاوانونه اړولي دي.
ټېلګراف ورځپاڼې بیا راپور ورکړی، چې دا برید په هغو څلورو پوځي اډو شوی چې په بشپړه توګه د روسیې په خاوره کې موقعیت لري او کېدای شي د اوکراین په درې کلنه جګړه کې دا تر ټولو ویجاړونکي بې پيلوټه بریدونو څخه وي.
د ټېلګراف په حواله، دا عملیات چې د «تار» نوم ورکړل شوی، تر ۱۸ میاشتو زیاته موده کې پلان شوی او د زېلېنسکي په مستقیمه څارنه ترسره شوی دی.
رویترز خبري اژانس راپور ورکړی، چې د اوکراین داخلي امنیتي اداره د نوښتګرو طریقو په کارولو سره وتوانېدله چې ستراتیژیک روسي بم غورځوونکې الوتکې په نښه کړي.
رویترز په ټولنیزو رسنیو خپرو شویو عکسونو پر اساس د یو اوکرایني امنیتي چارواکي له قوله ویلي، د چاودېدونکو توکو لرونکې بې پيلوټه الوتکې د لرګیو یوه چت کې پټې وې.
دغه چتونه د لارۍ تر شا بار شوي او نږدې د روسیې د پوځي اډو سیمو ته وړل شوي وې.
دا اهداف د ټی-یو-۹۵ او ټی-یو-۲۲ ستراتیژیک بم غورځوونکې الوتکې وې، چې روسیه ترې د اوکراین پر لور د اوږد واټن توغندیو د ګوزار لپاره کار اخلي.
د څلورو اډو څخه یوه په سایبریا سیمه کې او بله د فنلنډ سرحد ته نږدې ده.
د اوکراین او روسیې پلاوي به د دوشنبې په ورځ د ترکیې په استانبول ښار کې د مستقیمو خبرو دویم پړاو ترسره کړي. د ترکیې د بهرنیو چارو وزارت سرچینو ویلي، ټاکل شوې چې دغه خبرې د چراغان په ماڼۍ کې د ماسپښین پر یوه بجه پیل شي.
د اوکراین ولسمشر ولادیمیر زېلېنسکي د یکشنبې په ورځ وویل، چې د دوی د پلاوي مشري به د دغه هېواد د دفاع وزیر روستم عمروف کوي.
له بلې خوا، د روسیې د بهرنیو چارو وزیر سرګي لاوروف تر دې وړاندې اعلان کړی و، چې دوی اوکراین ته وړاندیز کړی چې د جون پر ۲مه نېټه دې د خبرو نوی پړاو په استانبول کې وشي.
نوموړي زیاته کړې، چې د روسیې د ولسمشر ولادیمیر پوتین ځانګړی استازی ولادیمیر مېدېنسکي به د روسي پلاوي مشري وکړي.
تمه ده، چې دا خبرې د اوکراین-روسیې د روان کړکېچ په حل کې مهم پرمختګونه رامنځته کړي.
په داسې حال کې، چې د اوکراین ولسمشر په استانبول کې خبرو اترو ته چمتووالی اعلان کړی، خو د کییف او مسکو ترمنځ جګړه یوې نوې خطرناکې مرحلې ته رسېدلې او دواړو لوریو یو پربل پراخ ډرون بریدونه وکړل او اټومي الوتکې او یو بل په نښه کړل.
د سعودي عربستان د بهرنیو چارو وزیر شهزاده فیصل بن فرحان وايي، چې اسراییلي حکومت د عربي هېوادونو د وزیرانو یوه پلاوي ته اجازه نه ده ورکړې، چې لوېدیځې غاړې (رامالله) ته ولاړ شي. نوموړي دا کار د اسراییل د افراطي دریځ او سولې ته د نه ژمنتیا څرګند ثبوت وباله.
شهزاده فیصل وویل:«اسراییل چې د کمېټې د سفر مخه نیولې، دا عمل یې افراطیت او د سولې د هرې جدي هڅې نهمنل ښکاره کوي. موږ به خپلې ډیپلوماټیکې هڅې له نړۍوالې ټولنې سره لا پسې چټکې کړو، څو د دې سرغړونې پر وړاندې ودرېږو.»
نوموړي دا څرګندونې تر هغه وروسته په اردن کې وکړې، چې په دغه هېواد کې د عرب ـ اسلامي ګډ غېرعادي سرمشریزې لهخوا د غزې د روانې جګړې په اړه د بحث لپاره وزیران راټول شوي وو.
د فلسطین ولسمشر محمود عباس هم په دې غونډه کې د ویډیو له لارې ګډون وکړ.
غونډه وروسته له هغه جوړه شوه، چې اسراییل د یادو وزیرانو د لوېدیځې غاړې سفر ته اجازه ور نه کړه.
شهزاده فیصل ټینګار وکړ، چې د فلسطین د ستونزو یوازینۍ حل لاره د یو خپلواک فلسطیني دولت جوړېدل دي.
هغه وویل:«موږ د عربو او مسلمانانو په توګه یوازې هغه حل منو چې له مخې یې یو خپلواک فلسطیني دولت جوړ شي. هغه هېوادونه چې د دوه دولتونو حل لاره اعلانوي، باید دا دریځ د فلسطین د دولت په رسمیت پېژندلو سره پیاوړی کړي.»
د یوه اوکرایني امنیتي چارواکي او انلاین خپرو شویو ویډیوګانو له مخې، د اوکراین استخباراتي ادارو د یکشنبې په ورځ د روسیې په هوایي اډو کې ۴۰ ستراتیژیکې بم اچوونکې الوتکې په نښه کړې دي. د برید لپاره ډرون الوتکې په باروړونکو ګاډو کې لېږدول شوې دي.
رویټرز وايي، چې په لاریو کې چت لرونکې لرګینې کوټې بار شوې وې او د هوایي اډو تر څنډو وړل شوې وې.
چارواکي وايي، چې ددغو کوټو چتونه د ریموټ کنټرول له لارې پورته کېدل، او بیا ډرونونه له هغه ځایه پورته کېدل او بریدونه یې کول.
د امنیتي چارواکو په وینا، د یکشنبې په ورځ د روسیې پر څلورو هوایي اډو بریدونه وشول، چې ټولټال ۴۱ روسۍ جنګي الوتکې هدف وګرځېدلې. رویټرز نهدی توانېدلی چې دا ادعا خپلواکه تایید کړي.
پر روسي ټولنیزو رسنیو خپرو شویو ویډیوګانو کې لیدل کیږي، چې ستراتیژیکې بم اچوونکې الوتکې یو په بل پسې له هوا په نښه کیږي او لوګي ترې پورته کیږي. دغه الوتکې د ایرکوتسک په بیلایا هوایي اډې کې په نښه شوې دي.
د ایرکوتسک سیمهییز والي ایګور کوبزېف تایید کړې چې د بیلایا هوایي اډې سره نږدې د سریدني کلي پر یوه نظامي واحد ډرون برید شوی، خو نه یې ده روښانه کړې چې اصلي هدف څه و. هغه ویلي چې ډرونونه له یوې لارۍ توغول شوي.
اوکراین لرې واټن ویشتونکي توغندي نه لري او یا یې د توغولو اجازه نه لري، خو دا لومړی ځل دی، چې په جګړه کې کیېف یو نوی تکتیک کاروي.
روسي انلاین رسنۍ «بازا» چې ویدیو یې خپره کړې، ویلي دا ویدیو د بیلایا هوایي اډې ترڅنګ ساحه کې اخیستل شوې.
د ایرکوتسک په سیمه کې دغه هوایي اډه د توپولوف Tu-22M فوقالصوت اوږدواټنه بم اچوونکو الوتکو کور دی، چې له اوکراین سره جګړه کې توغندي کاروي.
د اوکراین امنیتي چارواکو ویلي، دا عملیات د "غڼې جال" تر نامه لاندې پلان شوي وو.