بلاول بوټو: پاکستان د ترهګرۍ پر وړاندې په مبارزه کې ډېره قرباني ورکړې ده

د پاکستان د خلکو ګوند مشر او د بهرنیو چارو پخوانی وزیر بلاول بوټو زرداري په ملګرو ملتونو کې د امریکا استازې ډوروتي شیا سره په ليدنه کې ویلي، چې پاکستان د ترهګرۍ سره د جګړې په لومړۍ کرښه کې و او ډېرې قربانۍ یې ورکړې دي.

د پاکستاني رسنۍ جیو نیوز د راپور له مخې؛ هغه د امریکا له ادارې او په ځانګړې توګه د دغه هېواد د ولسمشر ډونالډ ټرمپ څخه د پاکستان او هند ترمنځ د اوربند د ټینګېدو لپاره مننه کړې ده.

د یادولو وړ ده، چې بلاول بوټو د یوه لوړپوړي پارلماني پلاوي په مشرۍ امریکا ته تللی دی او د ډوروتي شیا سره یې په لیدنه کې په سوېلي اسیا کې د روان اوسني وضعیت په اړه هم خبرې اترې کړې دي.