وال سټریټ ژورنال د اسراییلي او عرب چارواکو له قوله لیکلي، تل ابیب غواړي پر نطنز، فردو او اصفهان د امریکا د بریدونو نتایجو ته په پام، په راتلونکو څو ورځو کې جګړه ختمه کړي. عربي چارواکو ویلي، امریکا خپلو عربو متحدینو ته ویلي چې ایران ته د عملیاتو د زر ختمېدو پیغام ورسوي.
دا عملیات لس ورځې مخکې پیل شوي خو ایران لا هم د امریکا د یکشنبې ورځې د برید پر ځواب ورکولو غور کوي.
ورځپاڼې ویلي، اسراییلي چارواکي هیله لري چې تهران به د خپل اټومي پروګرام په اړه ډیپلوماسي بېرته پیل کړي.
د چینل ۱۲ د راپور له مخې، اسراییل باور لري چې د «پاڅېدلي زمري» عملیاتو هدفونه به ژر ترلاسه کړي.
د یکشنبې په ورځ یو اسراییلي چارواکي ټایمز اف اسراییل ته ویلي « که ایران له خپل اټومي پروګرام نه لاس واخلي، موږ چمتو یو بمبارۍ ته د پای ټکی کېږدو. دا په ایران پورې اړه لري، که یو توافق رامنځته شي، اسراییل به پایله د منلو وړ وبولي».
چینل ۱۲ دوه سناریوګانې یادې کړې دي چې اسراییلي عملیات څنګه پای ته رسولای شي. لومړی اسراییل دا اعلان کړي چې د جګړې هدفونه یې ترلاسه کړي او ایران هم له توغندیزو بریدونو لاس واخلي او یا دا چې امریکا اعلان وکړي دواړې خواوې پر اوربند توافق ته رسېدلې دي.
