د افغانستان د پخواني حکومت د مخابراتو وزیر سید احمدشاه سادات وايي، چې طالبان باید له امریکا او لوېديځو هېوادونو سره هم اړيکې ورغوي. هغه زياته کړې: «که د افغانستان سیاست پر یو بلاک تمایل شي خطرناکې پايلې به ولري.»
د افغانستان د پخواني حکومت د مخابراتو او معلوماتي ټېکنالوژۍ وزير سید احمدشاه سادات د جمعه په ورځ (د چنګاښ ۱۳مه) پر خپله فېسبوک پاڼه د روسیې له خوا د طالبانو په رسميت پېژندل مثبت پرمختګ یاد کړی.
هغه ویلي، چې طالبان باید پر یو طرف او روسيې باور ونه کړي او له امریکا او نورو لوېديځو هېوادونو سره هم خپلې اړيکې ورغوي.
د هغه په خبره، چې روسيه د اقتصاد له اړخه دومره توانايي نه لري، چې د افغانستان اقتصادي بنسټ پرې ورغول شي.
نوموړي لیکلي: «که چیرې د طالبانو د رسمیت پېژندنې مسله سمه مدیریت نه شي، نو دا چاره نه یوازې افغانستان، بلکې د ټولې سیمې لپاره خطرناک عواقب درلودلای شي.»
سادات د اندېښنې په ډول زياته کړې: «که د امریکا او غرب سره اړيکې ونه رغول شي نو امکان شته چې پر افغانستان نور بندیزونه ولګوي، سوداګريز فشارونه زيات او هېواد يو ځل بیا نړيوالې انزوا ته ولاړ شي.»
