الجزیرې په خپل یوه تازه راپور کې ویلي، چې له ایران څخه د افغان کډوالو د وتلو ضرب الاجل نن پای ته رسېدلی او ایران میلیونونو افغان کډوالو ته د وتلو امر کړی، چې د نه وتلو په صورت کې به ونیول شي.
ایران له اسراییل سره تر ۱۲ ورځنۍ جګړې وروسته د افغان کډوالو شړلو عملیات چټک کړي دي.
دغه هېواد افغان کډوالو ته د جولای تر ۷مې نیټې په خپله خوښه د وتلو امر کړی او نن د ایران د حکومت له خوا ورکړل شوی ضرب الاجل پای ته رسېدلی.
په تهران کې د یوه رستورانت خاوندې باتول اکبري الجزیرې ته ویلي:« په تهران کې مېشت افغانان د تبلیغاتو له امله سخت زیانمن شوي. دا زړه بوږنوونکې ده، چې خلک له هغه یوازیني ځایه شړل کیږي، چې تل یې ورته کور ویلی.په ايران کې زېږېدل موږ ته د دوو ټاټوبیو د لرلو احساس راکوي.»
د محمد نسیم په نوم یو افغان محصل چې کورنۍ یې د ایران د تازه عملیاتو په ترڅ کې په زور افغانستان ته شړل شوې، وايي:« د ایران دې کار زموږ کورنۍ ټوټې کړې ده.»
په ورته مهال د ملګرو ملتونو ویلي، چې د ایران او اسراییل ترمنځ له جګړې وروسته ایران هره ورځ شاوخوا ۳۰ زره افغانان بېرته افغانستان ته شړلي دي. خو ایران د حکومت ویاندې فاطمه مهاجرانيي ویلي:«موږ تل هڅه کړې، چې ښه کوربانه واوسو، خو ملي امنیت زموږ لومړیتوب دی او طبعا ناقانونه کډوال باید خپل هېواد ته ستانه شي.»
الجزیرې ویلي، چې افغانان په ایران کې د دغه هېواد د اقتصادي او ټولنیزو ستونزو پړه بلل کیږي.
یاده رسنۍ وايي، « د دغو تورونو شالید سیاسي تبلیغات او له ایران سره د اسراییل له ۱۲ ورځنۍ جګړې وروسته د ټولنیزو رسنیو کمپاینونه دي. ځینې راپورونه وايي، چې ګواکې اسراییل افغانان د جاسوسۍ لپاره استخدام کړي.»
سره له دې چې د ایران حکومت له خوا د افغانانو د وتلو ضرب الاجل نن پای ته رسېدلی، خو دغه هېواد له تېرو څو میاشتو راهیسې په ایران کې د افغانانو د ینولو او په زور افغانستان ته د ستنولو بهیر پیل کړی دی.
د ایران له خوا د افغانانو نیولو ته دننه په ایران او بهر کې سخت غبرګونونه ښودل شوي او یو شمېر ایرانیانو له افغان کډوالو سره د دغه هېواد د دولت او په ځانګړې توګه د نظامیانو پر غېر انساني چلند سختې نیوکې کړې دي.
