پاکستاني چارواکي وايي چې هېواد یې په افغانستان کې د طالبانو رژیم رسمیت پېژندنې ته بېړه نهلري. دا څرګندونې داسې مهال کېږي چې همدا تېره اوونۍ روسیې طالبان په رسمیت وپېژندل او په مسکو کې یې د افغانستان سفارت یادې ډلې ته وسپاره.
پاکستاني رسنیو د دغه هېواد د یو شمېر شنونکو په حواله لیکلي چې د روسیې دا اقدام ښايي د سیمې نور هېوادونه د طالبانو رسمیت پېژندنې ته وهڅوي؛ خو د پاکستان چارواکي بیا وايي، له مسکو دا تمه کېده، ځکه روسیې لا دمخه ښودلې وه چې طالبان یو واقعیت او رسمیت پېژندنې ته یې چمتو دی.
اېکسپرېس ټرېبیون وېبپاڼې د یوه پاکستاني چارواکي په حواله لیکلي دي: «موږ د خپلو ملي ګټو پر بنسټ پریکړې کوو. دا مهال د طالبانو په رسمیت پېژندې ته بېړه نه لرو.» یادې پاکستانۍ رسنۍ په خپل راپور کې د پاکستاني چارواکي نوم نه دی ښودلی.
دا په داسې حال کې ده چې تېره ورځ د پاکستان د بهرنیو چارو وزارت ویاند شفقت علي خان ویلي و چې هېواد یې د روسیې لهخوا د طالبانو په رسمیت پېژندنې ته پام کړی دی. هغه وایي چې دا «د دوو خپلواکو هېوادونو ترمنځ یوه خپلمنځي مساله» ده.
نوموړي د یوه خبري کنفرانس پرمهال وویل: «د روسیې او افغانستان اړیکې د دوو خپلواکو هېوادونو ترمنځ یوه موضوع ده». شفقت علي خان همداراز زیاته کړې چې روسیه په سیمه کې مشروع امنیتي ګټې لري او دا د دغه هېواد د تګلارې برخه ده.
