د طالبانو د حکومت مخالفې نظامي جبهې مشر جنرال سمیع سادات د خواله رسنیو له لارې له ایران څخه په زوره د اېستل شویو کډوالو لهپاره د مالي ملاتړ اعلان کړی دی. هغه ویلي، د دغو کډوالو د لاسنېوي لپاره د نغدي او بشری مرستو په لټه کې دی.
د افغانستان د سولې لپاره د امریکا پخوانی استازی زلمی خلیلزاد د ولسمشر ډونالډ ټرمپ هغه څرګندونې رد کړي چې ګوندې د بګرام هوایي اډه اوس مهال د چین په ولکه کې ده.
دې امریکايي ډېپلوماټ د شنبې په ورځ پر خپله اېکس پاڼه ولیکل: «زه باور نه لرم چې دا راپور سم وي چې ګني کمونېست چین د بګرام سټراټېژيکه هوايي اډه پرمخ وړي». نوموړي که څه هم د ټرمپ نوم نه دی اخیستی، خو په ښکاره یې دا څرګندونې د هغه پر ادعاوو غبرګون ښيي. خلیلزاد د امریکا د دفاع وزیر په ګډون یو شمېر لوړپوړي امریکايي چارواکي هم په خپل پوسټ کې په نښه (مېنشن) کړي دي.
ډونالډ ټرمپ تر دې مخکې څو ځل دا خبره کړې چې چین اوس د بګرام اډه تر خپل واک لاندې راوستې ده. هغه په تېره اونۍ کې بیا وویل چې د بګرام پرېښودل د امریکا یوه ستره تېروتنه وه او چین اوس له دې اډې ګټه اخلي. خو زلمی خلیلزاد دا ډول ادعاوې ناسمې ګڼي. هغه دوه ورځې مخکې یو راپور شریک کړ چې پهکې ویل شوي وو چین ښايي د بګرام اډې څخه کار اخلي، خو خلیلزاد وویل چې دی نه مني چې چین دې دا اډه کنټرولوي.
ټرمپ چې د جو بایډن پر پخواني حکومت د نیوکو له امله مشهور دی ویلي، که دی هغه مهال ولسمشر وای، له افغانستانه به یې سرتېري ایستلي وی، خو د بګرام هوايي اډه به یې هېڅکله نه پرېښوده. ټرمپ ټینګار کړی چې بګرام د امریکا له لویو پوځي اډو څخه یوه وه او یوازې یو ساعت د چین له اټومي تأسیساتو په واټن کې پرته ده. هغه باور لري چې امریکا باید له دې اډې نه وای وتلې.
بګرام اډه چې د کابل ښار په شمال کې موقعیت لري، شاوخوا شل کاله د امریکايي ځواکونو اصلي مرکز و. ډونالډ ټرمپ د ولسمشرۍ لومړۍ دوره کې بګرام ته تللی و او د افغانستان د مخکني ولسمشر محمد اشرف غني سره هم لیدلي و.
دا په داسې حال کې ده چې په وروستیو میاشتو کې زلمی خلیلزاد یو ځل بیا د امریکايي پلاوي په چوکاټ کې کابل ته سفر کړی او هلته یې د طالبانو له لوړ پوړو چارواکو سره د زنداني امریکایي وګړو د خلاصون په اړه خبرې کړې دي.
د افغانستان کرېکټ د ملي لوبډلې پيليز توپوهونکی او نړیوال ستوری رحمان الله ګربز له پاکستان او ایران څخه په زور ایستل شویو کډوالو ته لیکلي: «تاسو یوازي نه یاست، خپل کور ته ښه راغلاست.»
رحمان الله ګربز د شنبه په ورځ (د چنګاښ ۲۱مه) پر خپله اېکس پاڼه له ایران څخه په زور د ایستل شویو افغان کډوالو د انځور د نشر کولو سره هم مهاله له هېوادوالو غوښتې، چې په يوالي او لوی زړه باید د کډوالو ملاتړ وشي او هغوی ته روحیه ورکول شي.
په افغانستان کې د طبعي پېښو، د افغان کډوالو سره د ناسم وضعیت، ناورین، د کورنیو د کمزوري اقتصادي حالت او ورته نورو پيښو کې زيات مهال د ملي لوبډلې بېلابېلو لوبغاړو پر نړیوال دريځ غږ پورته کړی او ان د مرستې د ټولولو کمپاينونه يې هم ترسره کړي.
د افغانستان د کرېکټ ملي لوبغاړو تر دې وړاندې هم د هرات او پکتیا د زلزلې او په هېواد کې د سېلاب ځپلو کورنيو سره مرستې هم کړي او د هغوی په ملاتړ يې غږ هم پورته کړی وو.
د افغان ایواک مشر شان وانډيور د شنبه په ورځ په یوه مرکه کې ویلي، چې په افغانستان کې ښځې او نجونې له سخت حالت سره مخ دي. نوموړي زياته کړې: «ځيني هېوادونه هڅه کوي هغه ښځې، چې زموږ تر څنګ یې مبارزه کړې افغانستان ته بېرته واستوي، چې د دوی لېږل به ناسم وضعیت رامنځته کړي.»
د راپورنو له مخي د هغه افغانانو لپاره، چې په امریکا کې د دايمي اوسېدو اسنادو ته په تمه دي، د دوشنبې په ورځ يې موده پای ته رسيږي او د ایستلو له ګواښ سره مخ دي.
یو افغان څېړنيز خبریال عبدال فراجي په یوه مرکه کې ویلي: «د امریکا بهرنیو چارو وزارت وايي، په افغانستان کې ترهګره ډله پر واک ده نو زه نه پوهېږم بیا دغه هېواد د هغو افغانانو لپاره چې په امریکا کې یې ژوند کړی او خپل وطن ته استول کيږي څنګه خوندي ګڼل کيږي.»
د نوموړي په خبره، چې دا مهال ۲۰ زره افغانانو د اوسېدو اسناد ترلاسه کړي خو ډېر شمېر افغانان لا نه پوهېږي، چې څنګه د پنا غوښتنه وکړي او توان هم نه لري څو وکیلانو ته پيسې ورکړي.
د دغه افغان خبريال په خبره، چې ډېر شمېر افغانان په پاکستان کې، چې هلته د امریکا سفارت هم شته د وتلو په تمه د یوه نامعلوم برخلیک سره مخ دي.
هغه زياتوي، چې په پاکستان کې یو شمېر افغانانو نورو هېوادونو له ډېر انتظار او نفستنګی څخه ځان وژنې کړي.
د هغه په خبره، چې د بهرنيو ځواکونو سره د ډېرو افغانانو ګډ کار او اوس مهال بیا افغانستان ته ستنېدل به د همدې کورنۍ ژوند له مرګ او ګواښ سره مخ کړي.
له ۲۰۲۱ کال وروسته، زرګونه افغانان د امریکا له لوري د تخلیې بهیر پر مهال یا ورسره د همکارۍ له امله دغه هېواد ته انتقال شول. که څه هم نږدې ۲۰ زره افغانانو د دایمي اوسېدو اسناد ترلاسه کړي، خو لا هم زرګونه نور د حقوقي نامعلوم برخلیک سره مخ دي.
د راپورونو له مخې، د دوشنبې په ورځ د هغو افغانانو لپاره چې لا یې د پناه غوښتنې بهیر بشپړ شوی نه دی، د موقت استوګنې اسناد پای ته رسېږي، چې دا وضعیت هغوی د امریکا څخه د ایستلو له جدي ګواښ سره مخ کوي.
په ورته وخت کې، زرګونه افغانان لا هم په پاکستان کې د امریکا سفارت له لارې د وتلو هڅې کوي، خو د اوږده ځنډ، حقوقي محدودیتونو او اقتصادي کمزورتیا له امله له بېسرنوشتۍ سره مخ دي.
د امریکا ولسمشر ډونلډ ټرمپ د شنبې په ورځ ویلي، چې دی د خپلې پخوانۍ منتقدې، فلمي ستورې او ټلویزیوني طنزیه ممثلې روزي اوډانل د امریکایي تابعیت د اخیستو په اړه "جدي فکر" کوي. دا اقدام د امریکا د اساسي قانون خلاف بلل شوی.
ټرمپ پر ټولنیزو رسنیو لیکلي:"دا چې روزي اوډانل زموږ د ستر هېواد په ګټه نه ده، نو زه دا موضوع جدي څېړم چې تابعیت یې واخلم."
ټرمپ زیاته کړې چې اوډانل د ۲۰۲۵ کال په جنورۍ کې ایرلنډ ته کډه شوې او "که هغوی یې غواړي، نو هم هلته دې پاتې شي."
اوډانل او ټرمپ له کلونو راهیسې یو په بل سختې نیوکې کوي. وروستیو ورځو کې اوډانل پر ټولنیزو رسنیو د ټرمپ حکومت پر سیاستونو، په ځانګړې توګه د جمهوري غوښتونکو له خوا ملاتړ شوې لویې مالیاتي طرحې، سختې نیوکې کړې دي.
د طالبانو د اطلاعاتو او فرهنګ وزير خیرالله خیرخوا وایي، چې تر مسکو وروسته له ډېرو هېوادونو سره تعامل روان دی او دامهال رسميت پېژندنې ته نژدې شوي یو. نوموړي ادعا کړې، چې د دوی حکومت د رسميت پېژندنې لپاره ټول شرایط برابر کړي دي.
د طالبانو د اطلاعاتو او فرهنګ وزیر خیرالله خیرخواه د شنبه په ورځ (د چنګاښ ۲۱مه) ویلي، چې دوی د رسميت پېژندنې لپاره ټول شرایط برابر کړي او د روسیې وروستۍ پریکړې ته په اشارې یې له نورو هیوادونو وغوښتل چې د طالبانو رژیم په رسمیت وپیژني.
نوموړي د طالبانو تر واک لاندې باختر اژانس سره په یوه مرکه کې ټينګار کړی، چې د طالبانو رسميت پېژندل به د افغانستان په اقتصاد مثبت اغیزه ولري او بهرنۍ پانګونه به راجلب کړي.
هغه زیاته کړه: «نړیواله ټولنه باید واقعیتونه ومني. په افغانستان کې امنیت ټینګ شوی، د مخدره توکو تولید بند شوی او فساد له منځه تللی دی. دا لاسته راوړنې نه یوازې د افغانستان لپاره بلکې د ټولې نړۍ لپاره مهمې دي.»
د طالبانو دغه چارواکي ویلي، چې تر مسکو وروسته یې د نورو هېوادونو سره هم تعامل روان دی او دوی رسمیت پېژندنې ته نژدې شوي.
هغه ویلي: «نړۍ باید واقعیتونه درک کړي او په سم ډول قضاوت وکړي، د رسميت پېژندنې لپاره ټول شرایط موجود دي، د ډېرو هېوادونو سره تعامل روان دی او رسميت پېژندنې ته نژدې یو.»
د طالبانو د اطلاعاتو او کلتور وزیر ادعا وکړه چې په وروستیو ۴۵ کلونو کې د لومړي ځل لپاره دا ډله توانیدلې چې د افغانستان په ټوله خاوره کې مرکزي حاکمیت رامنځته کړي.
ځيني هېوادونه لا هم د بشري حقونو درناوی، د ټولګډونه حکومت جوړول، د ترهګرۍ او نشه يي توکو سره مبارزه د دغه ډلې د رسميت پېژندنې لپاره د شرایطو په توګه یادوي.
نړیواله ټولنه په دې باور ده، چې طالبانو لا تر اوسه د دوحې تړون او د افغانستان اړوند په نورو نړیوالو ناستو کې خپلې ژمنې نه دي پوره کړي.
سیمه يیزو هیوادونو د افغانستان په خاوره کې د ترهګرو ډلو د مرکزونو د شتون په اړه اندیښنې لري.
پاکستان وايي، چې د تحریک طالبان پاکستان وسله وال او بلوچ بېلتون غوښتونکي د افغانستان له خاوري بریدونه پلان او عملي کوي.
ملګري ملتونه او خپلواک نړیوال سازمانونه هم په افغانستان کې د داعش د فعالیتونو په اړه اندېښمن دي او ځيني راپورونه ښيې، چې القاعده بیا هڅه کوي په دې هېواد کې راپورته شي.
