تحریک طالبان پاکستان ادعا کوي، چې د خېبرپښتونخوا په اورکزۍ ایجنسۍ کې یې د پاکستاني پوځیانو پر موټریز کاروان وسلهوال برید کړی، چې په پایله کې یې ۱۹ پوځیانو ته مرګژوبله اوښتې ده. ټي ټي پي په یوې خبرپاڼه کې ویلي، په دې برید کې د پاکستان نهه پوځيان وژل شوي او لس نور ټپیان دي.
دغه وسله واله ډله زیاتوي، چې په برید کې د دوی وسله والو ته مرګژوبله نه ده اوښتې.
تر اوسه د پاکستان حکومت او نورو باوري سرچینو ددغه خبر پخلی نه دی کړی او افغانستان انټرنشنل د یوې خپلواکې رسنۍ په توګه دغه خبر نشي تاییدولی.
د پاکستان د پوځ د عامه اړیکو د فتر له خوا په خپرو شویو خبرپاڼو کې ادعا شوې، چې پوځ په بېلابېلو عملیاتو کې د خیبرپښتونخوا په هنګو او ملاکنډ کې ۱۴ او په بلوچستان ایالت کې څلور وسله وال وژلي دي. پاکستانی پوځ وايي، دغه عملیات د استخباراتي معلوماتو پر بنسټ شوي دي.
د پاکستان پوځ په یوه خبرپاڼه کې ادعا کړې چې په خېبرپښتونخوا کې عملیات له هغه وروسته شوي چې وسله وال له ډیورنډ کرښې واوښتل.
دوی دغه راز ویلي چې په دې عملیاتو کې د پاکستاني طالبانو یو شمیر وسله وال ټپیان شوي هم دي.
په همدې حال کې د پاکستان پوځ په یوه بله خبرپاڼه کې ویلي، چې د استخباراتو پر بنسټ عملیات د جولای پر ۱۹-۲۰ شپه د "د هند د پراکسي ډلې پورې اړوند ترهګرو د شته والي راپور" پر بنسټ ترسره شول. دا عملیات د بلوچستان ابالت د کلات په سیمه کې ترسره شوي دي.
پاکستانی پوځ خپلو وسله والو مخالفانو ته د هند پراکسي او فتنه الخوارج ډلې اصطلاحات کاروي.
د پاکستان د امنیتي ادارو ددې ادعاګانو په اړه تر دې دمه نه تحریک طالبان پاکستان او نه هم بلوڅ بېلتون پالو کوم غبرګون ښودلی، خو پر ټولنیزو شبکو خپره شوې یوه ویډیو کې وسله وال په هنګو کې د جګړې پرمهال ښودل کیږي چې شاته یې د اور لمبې پورته کیږي.
د خېبرپښتونخوا په ملاکنډ کې د پولیسو او ترهګرۍ ضد څانګې له خوا ګډ عملیات ترسره شوي، چې پکې لږ تر لږه پنځه وسله وال وژل شوي، دوه ټپیان او اته نور ژوندي نیول شوي دي. چارواکي وايي، دغه وسله وال د تحریک طالبان پاکستان (ټي ټي پي) غړي وو.
د ملاکنډ د درګۍ تحصیل د مرستیال کمېشنر وحیدالله خان د معلوماتو له مخې، دا عملیات د شنبې په ماښام د مهرډۍ په سیمه کې ترسره شول.
نوموړي وویل: «پولیسو او سي ټي ډي په دغه بریاليو عملیاتو کې برخه واخیسته، پنځه ترهګر له منځه یوړل شول، دوه نور ټپیان شوي او اته تنه نور ژوندي نیول شوي دي.»
وحیدالله خان زیاته کړه، چې نیول شوي کسان د سي ټي ډي مرکز ته لېږدول شوي او ټپیان د درګۍ تحصیل روغتون ته انتقال شوي دي.
نوموړي دا هم تایید کړه، چې دغه وسله وال د تحریک طالبان پاکستان (ټي ټي پي) غړي وو او په سیمه کې یې د تاوتریخوالي په ګڼو پېښو کې لاس درلود.
یاده دې وي، چې پاکستان د ۲۰۲۵ د نړۍوال ترهګرۍ د شاخص له مخې دویم مقام لري او د راپورونو له مخې، یوازې په تېر یو کال کې د ترهګریزو پېښو له امله د تلفاتو کچه ۴۵ سلنه زیاته شوې، چې ۱۰۸۱ کسان پکې وژل شوي دي.
په خېبرپښتونخوا او بلوچستان کې د ترهګریزو بریدونو له زیاتوالي سره امنیتي ځواکونو هڅې هم پراخه کړې دي.
د اسلام اباد یوې ځايي محکمې د خېبر پښتونخوا د سر وزیر اعلی امین ګنډاپور د شرابو او ناقانونه وسلو د لرلو په قضیه کې د نیولو امر صادر کړ. یاد امر وروسته له هغه صادر شو، چې محکمې ته د حاضرېدو لپاره د ګنډاپور د معافیت غوښتنه رد شوه.
د پاکستاني جیو ټلوېزیون د راپور له مخې، د اسلاماباد یوې سیمهییزې محکمې دا خبرداری هم ورکړی چې ښايي محکمه د امین ګنډاپور په غیاب کې پرېکړه صادره کړي او نوموړی به د ځان د دفاع حق هم له لاسه ورکړي.
د اسلاماباد یوې سیمهییزې محکمې حکم کړی چې علي امین ګنډاپور باید د جولای تر ۲۱مې نېټې مخکې محکمې ته حاضر شي او ټینګار یې کړی چې چارواکي باید د هغه د نیولو د امر په پلي کولو کې پاتې رانشي.
دا پرېکړه یوه اونۍ وروسته له هغه شوې، چې د خېبر پښتونخوا اعلی وزیر علي امین ګنډاپور له لاهوره د پاکستان تحریک انصاف په استازیتوب د لاریونونو د پیلولو اعلان وکړ.
تر دې دمه پورې علي امین ګنډاپور کوم رسمي غبرګون نه دی ښودلی.
د یادونې وړ ده، چې د پاکستان د تحریک انصاف ګوند غواړي، چې له زندان څخه د پخواني لومړي وزیر عمران خان د خلاصون لپاره پراخ لاریونونه پیل کړي.
د خېبرپښتونخوا ایالت پولیس وايي، چې د یاد ایالت اړوند د هنګو په ولسوالۍ کې د عملیاتو پرمهال ۹ وسلوال وژل شوي او ۳ پاکستاني افسران ټپیان شوي. د پولیسو افسر ذوالفقار حمید رسنیو ته وویل چې د پاکستان امنیتي ځواکونو او پولیسو د هنګو په زرګري شینواري سیمه کې ګډ عملیات ترسره کړي دي.
د پاکستان د ډان ورځپاڼې د کوهاټ د سیمهییزو پولیسو افسر عباس مجید په حواله لیکلي چې د دې عملیاتو پرمهال د پولیسو ټپي شوي افسران د کوهاټ په پوځي روغتون کې تر درملنې لاندې دي.
د خېبر پښتونخوا د پولیسو د عمومي مشر لخوا ویل شوي، چې د عملیاتو پر مهال د وسلوالو او د پولیسو ترمنځ سخته نښته هم شوې ده.
تراوسه پورې پاکستاني طالبانو او یا هم کومې بلې وسلوالې ډلې د خېبرپښتونخوا د پولیسو ددې ادعا په اړه کوم غبرګون نه دی ښودلی.
د پښتون ژغورنې غورځنګ (پي ټي ایم) مشر منظور احمد پښتین د خېبر پښتونخوا په بېلابېلو سیمو کې د نا امنیو پر ضد لاریونونو ته په غبرګونه کې ویلي چې پښتنو د ظلم او جبر پر وړاندې خپل غږ پورته کړ.
منظور پښتین، پرفیسبوک خواله رسنۍ لیکلي،چې پښتون قوم په مومندو، وزیرستان او کرمه کې د ریاستي ظلم، جبر، او ترهګرۍ پر وړاندې خپل دريځ څرګند کړ.
هغه لیکلي: «ډالري جګړې، د اقتصادي سرچینو لوټماري او د ریاست لخوا پښتون دښمنه اقدامات نور هیڅکله د زغم وړ نه دي».
نوموړی وایي چې د شمالي وزیرستان میرانشا، کرمې په صده او د مومندو په ګنداو بازار کې د پښتنو لخوا ترسره شوي لاریونونه، د پښتنو پر وړاندې د منفي پروپاګند یوه مهم غبرګون و.
پښتین زیاته کړې: « پښتانه یوازې د ظلم او جبر پر وړاندې نه دي راپورته شوي، بلکه هغوی هغو کسانو ته هم یوه روښانه پیغام ورکړی،چې تل دا وايي [موږ ستړي شوي یو] او ولسي مبارزه کوم تاثیر نه لري.»
پښتین زیاتوي: « پښتنو د خپلو شهیدانو او قربانیو پر وړاندې پروپاګنډو ته نه یوازې د رد ځواب ورکړی، بلکه دا یې هم ثابته کړې چې موږ نه ستړي کیږو او نه هم د خپلو عملونو په اړه مایوسه یو،موږ به د خپل وطن لپاره هر ډول قرباني ورکړو او د ظلم پر وړاندې له پوره قوت او عزت سره ودریږو.»
د پښتون ژغورنې غورځنګ مشر وایي، د پښتنو د یووالي او د هغوی د حقونو د خوندي کولو لپاره خپله مبارزه په نوي ځواک او ارادې سره ادامه لري.
د هغه له قوله، «موږ د پښتون ولس پر وړاندې د هر ډول ظلم او جبر سره مبارزه کوو، او دا کار به تر هغه وخته روان وي، ترڅو زموږ ټول ملت ته انصاف او برابري نه وي راګرځېدلې.»
په خېبر پښتونخوا کې د وروستیو څو میاشتو راهیسې امنیتي وضعیت خراب شوی دی، چې له کبله یې د ولسي غبرګونونو او لاریونونو لړۍ پیل شوې دي.
د دغه ایالت په بیلا بېلو برخو کې، په ځانګړې توګه په وزیرستان، مومندو، او کرم کې، د ترهګرۍ، هدفي وژنو او نظامي عملیاتو له امله د خلکو ژوند سخت اغېزمن شوی او د دې نا امنیو پر وړاندې د خلکو غبرګونونه زیات شوي، او د امنیتي ځواکونو د کړنو پر ضد پراخه لاریونونو کې خلکو د خپل خوندیتوب او حقونو د ساتنې غوښتنه کړې.