د افغانستان د ازادۍ جبهې دوشنبه (د چنګاښ ۳۰مه) پر اېکس پاڼه لیکلي، چې د کندوز ولایت د امر بالمعروف مشر ملانجیب الله غفوري پر استوګنځي یې برید کړی او دوه طالبان یې وژلي او یو بل ټپي دی؛ خو تر دې مهاله د ملا نجیب غفوري د مرګ او ژوند په اړه معلومات نهلري.
طالبانو تر دې مهاله په دې اړه څه نه دي ويلي.
دغې جبهې تر دې وړاندې د طالبانو د امر بالمعروف ادارې لهخوا د ښځو د خپلسرو نیونو، ځورونو، تښتونې او د دوی پر وړاندې د ناروا چلند په غبرګون خبرداری ورکړی و، چې د طالبانو د یادې ادارې ظالمانه، غیرانساني او جنایتکار اعمال به بېځوابه نه پاتې کېږي.
د طالبانو د دفاع وزارت لوی درستیز فصیح الدین فطرت وايي، که څه هم تراوسه د هغو الوتکو چې د تېر نظام د پرځېدو پرمهال له افغانستانه دباندې وړل شوې وې؛ د بېرته ترلاسه کولو هڅو پایله نهده ورکړې، خو هیڅکله به ترې تېر نه شي.
نوموړي دغه څرګندونې نن سې شنبه د (چنګاښ ۳۱مه) په کابل کې د تېر یوه کال په موده کې د طالبانو د دفاع وزارت د لاسته راوړنو په غونډه کې کړې دي.
ښاغلی فطرت وايي:« هغه څه چې د افغانستان دي، موږ به ترې هیڅکله تېر نه شو. په تېرو څلورو کالو کې هڅې شوې دي، تراوسه یې پایله نه ده ورکړې؛ خو موږ نهیلي نه یو.»
د راپورونو پربنسټ له افغانستانه د امریکایي ځواکونو د وتلو پر مهال ۲۲ پوځي الوتکې او ۲۴ چورلکې له افغانستانه ازبکستان ته لېږدول شوې وې.
د طالبانو د فاع وزارت د دغې غونډې پرمهال دا رنګه ویلي، چې په تېر یوه کال کې یې د ډیورنډ کرښې په اوږدو کې ۷۰۰ امنیتي پوستې جوړې کړې دي.
د دغه وزارت لوی درستیز محمد فصیح الدین فطرت ويلي، چې دغه پوستې د پولې په اوږدو کې د امنیتي تدابیرو په موخه جوړې شوې دي.
نوموړي زیاته کړې، دوی هیڅکله نه دي غوښتي چې د کرښې په اوږدو کې له پاکستاني او ایراني پوله ساتو ځواکونو سره په جګړه کې ورښکېل شي؛ خو که له هغې خوا پرې برید شوی هغه یې بېځوابه نه دی پرېښي.
فطرت یو وار بیا په افغانستان کې د داعش ډلې د حضور په اړه راپورونه بېبنسټه وبلل او ویې ویل، چې دغه ډول خبرونه حقیقت نه لري او د تبلیغاتو تر بریده دي.
نوموړی وايي، طالبانو په افغانستان کې بشپړ امنیت ټنیګ کړی او د وسلهوالو ډلو د حضور په اړه اندېښنې بېځایه دي.
له افغان خبریالانو د ملاتړ سازمان وايي، چې افغان خبریالان د افغانستان په ګاونډیو او په ځانګړې توګه پاکستان او ایران کې له جدي ننګونو سره مخامخ دي او دغه وضعیت دوی سخت اندېښمن کړي دي.
د یاد سازمان له لوري نن سې شنبه د ( چنګاښ ۳۱مه) په خپرې شوې خبرپاڼه کې راغلي، چې افغان خبریالان په پاکستان کې او ایران کې له خپلسرو نیونو، ګواښونو، په جبري توګه د ستنولو او له ټولو لومړنیو حقونو بې برخې دي.
په خبرپاڼه کې راغلي، چې خبریالان د بیان ازادۍ، مسلکي فعالیتونو او د سانسور پر وړاندې د مقاومت له امله له هېواده وتلي؛ خو اوس په داسې شرایطو کې ژوند کوي، چې ژوند یې له جدي ګواښ سره مخامخ دی.
په پاکستان کې د ویزو د تمدید لړۍ بندېدل هم د اندیښنې وړ بلل شوي او د خبریالانو د ملاتړ سازمان وايي، چې دې چارې ډېری خبریالان په دغه هېواد کې له پراخو ستونزو سره مخ کړي دي.
په خپرپاڼه کې د ملګرو ملتونو، اروپايي ټولنې، د کډوالو عالي کمېشنرۍ او د بیان ازادۍ د ملاتړ له ټولو بنسټونو غوښتنه شوې، چې له افغان خبریالانو سره د ستونزو په حل کې بېړنۍ مرستې وکړي او خپل مسوولیتونه دې ادا کړي.
یاد سازمان زیاته کړې، چې دغه بنسټونه باید نورو هېوادونو ته د خبریالانو د اېستلو، جبري ستنولو د مخنیوي، د ویزو د تمدید او نورو لومړنیو اسانتیاوو ته د لاسرسي په برخو کې له ځنډ پرته ګامونه پورته کړي.
د افغان خبریالانو د ملاتړ سازمان د خبرپاڼې په پای کې ژمنه کړې، چې د خبریالانو د ژغورنې لپاره به خپلو هڅو ته دوام ورکړي او له نړۍوالې ټولنې یې غوښتي، چې په دې برخه کې له دوی سره همکاري وکړي.
رویټرز خبري اژانس دوشنبه (د چنګاښ ۳۱مه) راپور ورکړی، چې د پاکستان له لوی درستیز مارشال عاصم منیر سره د ډونالډ ټرمپ لیدنې هند ته ډيپلوماټيکې اندېښنې راولاړې کړې دي. ځينو هندي چارواکو او کارپوهانو ویلي، چې دغه لیدنه به د هند او امریکا تر منځ دوستانه اړیکو ته زیان ورسوي.
خو امریکایي چارواکي وایي، چې دوی له دواړو هېوادونو سره ښې اړیکې لري.
هندي چارواکي زیاتوي، چې د ټرمپ لهخوا د تعرفو ناڅاپي لوړولو د دوی پر سوداګرۍ سيوری غوړولی دی.
د ولسمشر ټرمپ لهخوا پر هند د تعرفو تر لوړولو وروسته د دواړو هېوادونو تر منځ سوداګریزې خبرې سوکه شوې او هند د ټرمپ لهخوا د تعرفو لوړولو په غبرګون کې د نړۍوال سوداګریز سازمان (WTO) له لارې پر امریکا د متقابلو تعرفو لوړولو وړاندیز کړی دی.
د طالبانو تر کنټرول لاندې د افغانستان بانک وايي، له مرکزي، سوېل ختیځ او ختیځ زونونو څخه راټول شوي یو میلیارد، نهه مېلیونه او ۸۶۷ زره افغانیو په ارزښت یې زاړه بانک نوټونه سوځولي دي.
د دغه بانک له لوري په خپرې شوې خپرپاڼه کې راغلي، چې دغه زاړه بانک نوټونه د طالبانو تر کنټرول لاندې د افغانستان بانک دویم مرستیال ملا محمد اخند په مشرۍ د ګومارلشوي پلاوي تر څار لاندې په کابل کې سوځول شوي دي.
په خپرپاڼه کې د نورو زړو بانک نوټونو را ټولولو ژمنه هم شوې ده.
په خبرپاڼه کې راغلي:« د دې لپاره چې هېوادوال خپلې مالي راکړې ورکړې په اسانۍ ترسره کړي، د افغانستان بانک وخت په وخت د افغانۍ زاړه بانک نوټونه له بازار څخه راټولوي؛ په بدل کې یې هېوادوالو ته نوي بانکنوټونه وېشي او مندرس بانک نوټونه سوځوي.»
په خبرپاڼه کې همداراز له خلکو غوښتل شوي، چې د افغاني بانک نوټونو سمې ساتنې او کارَونې ته دې جدي پاملرنه وکړي.
دا په داسې حال کې ده، چې اوسمهال د افغانستان په بازارونو کې ډېری کارېدونکي بانک نوټونه زاړه شوي او خلکو یې په اړه په دوامداره توګه شکایتونه هم کړي دي.
ډيلي ميل ورځپاڼې سې شنبه (د چنګاښ ۳۱مه) د بریتانوي چارواکو له حوالې راپور ورکړی، ځینې هغه افغانان چې بریتانیا ته انتقال شوي؛ ښايي له «ترهګرو او افراطي» ډلو سره یو ځای شي.
د بریتانیا د حکومت ویاند ويلي، چې په دغه هېواد کې افغانانو ته د اسانتیاوو نه برابرول به هغوی نهیلي کړي او له ترهګرو ډلو سره به اړیکې ونيسي؛ ځکه افغانستان اوس هم د ترهګرو ډلو لپاره خوندي ځای دی.
د حکومت ویاند ویلي:« موږ بریتانیا ته د هر نوي راغلي شخص په اړه پلټنه کوو، چې په دې لړ کې د افغانانو په اړه هم پلټنې شوې دي؛ پر چا چې د امنيتي دلایلو له مخې شک وشي، هغه ته په بریتانیا کې د دايمي پاتې کېدو اجازه نه ورکول کېږي.»
د راپور له مخې؛ د هغو افغانانو په اړه ارزونه شوې، چې په پټه بریتانیا ته بېول شوي دي. دغه ارزونه ښيي، چې ښايي په دوی کې ډېری یې کورونه و نه لري، ځکه په برېتانیا کې د استوګنې کورونه لږ دي.
ځايي ادارو ته خبرداری ورکړل شوی، چې د نویو راتلونکو افغانانو لپاره به د کورونو برابرول ګران کار وي.
د روان کال په اکتوبر میاشت کې کله چې د کارګر ګوند وزیرانو د ۷ میلیارډه پونډو لګښت ومانه، هغوی ته وویل شول چې د دې بودجې له لارې یوازې لس سلنه نویو راتلونکو افغانانو ته کورونه ورکول کېدای شي، چې دا محرومیت به د بریتانیا ټولنیز یووالی وګواښي.
په براکنل برکشایر کې ۳۰۰ افغانان په یوه هوټل کې مېشت دي. ځايي خلک وايي، چې هغوی له افغانانو سره خواخوږي لري؛ خو ډېری پخواني بریتانوي ځواکونه هم د کور ستونزه لري.