په فلپين کې د سختو ورښتونو له امله ۵ کسان مړه شوي او یوشمېر نور لادرکه دي. دغه توپاني څپه د ويټنام ویفه شمالي ساحل ته هم رسېدلې ده. ویټنام د ۵۰۰ مليمترو ورښت وړاندوینه کړې او سخت احتیاطي تدابیر یې نیولي دي.
اوس دغه توپاني څپه ویټنام ته هم رسېدلې؛ خو تر دې مهاله د مرګ ژوبلې خبرونه نه دي ورکول شوي.
په ویټنام کې احتیاطي تدابیر نیول شوي او ۳۵۰ زره عسکر د تیارسئ په حال کې دي.
رویټرز خبري اژانس دوشنبه (د چنګاښ ۳۱مه) راپور ورکړی، چې د پاکستان له لوی درستیز مارشال عاصم منیر سره د ډونالډ ټرمپ لیدنې هند ته ډيپلوماټيکې اندېښنې راولاړې کړې دي. ځينو هندي چارواکو او کارپوهانو ویلي، چې دغه لیدنه به د هند او امریکا تر منځ دوستانه اړیکو ته زیان ورسوي.
خو امریکایي چارواکي وایي، چې دوی له دواړو هېوادونو سره ښې اړیکې لري.
هندي چارواکي زیاتوي، چې د ټرمپ لهخوا د تعرفو ناڅاپي لوړولو د دوی پر سوداګرۍ سيوری غوړولی دی.
د ولسمشر ټرمپ لهخوا پر هند د تعرفو تر لوړولو وروسته د دواړو هېوادونو تر منځ سوداګریزې خبرې سوکه شوې او هند د ټرمپ لهخوا د تعرفو لوړولو په غبرګون کې د نړۍوال سوداګریز سازمان (WTO) له لارې پر امریکا د متقابلو تعرفو لوړولو وړاندیز کړی دی.
ډيلي ميل ورځپاڼې سې شنبه (د چنګاښ ۳۱مه) د بریتانوي چارواکو له حوالې راپور ورکړی، ځینې هغه افغانان چې بریتانیا ته انتقال شوي؛ ښايي له «ترهګرو او افراطي» ډلو سره یو ځای شي.
د بریتانیا د حکومت ویاند ويلي، چې په دغه هېواد کې افغانانو ته د اسانتیاوو نه برابرول به هغوی نهیلي کړي او له ترهګرو ډلو سره به اړیکې ونيسي؛ ځکه افغانستان اوس هم د ترهګرو ډلو لپاره خوندي ځای دی.
د حکومت ویاند ویلي:« موږ بریتانیا ته د هر نوي راغلي شخص په اړه پلټنه کوو، چې په دې لړ کې د افغانانو په اړه هم پلټنې شوې دي؛ پر چا چې د امنيتي دلایلو له مخې شک وشي، هغه ته په بریتانیا کې د دايمي پاتې کېدو اجازه نه ورکول کېږي.»
د راپور له مخې؛ د هغو افغانانو په اړه ارزونه شوې، چې په پټه بریتانیا ته بېول شوي دي. دغه ارزونه ښيي، چې ښايي په دوی کې ډېری یې کورونه و نه لري، ځکه په برېتانیا کې د استوګنې کورونه لږ دي.
ځايي ادارو ته خبرداری ورکړل شوی، چې د نویو راتلونکو افغانانو لپاره به د کورونو برابرول ګران کار وي.
د روان کال په اکتوبر میاشت کې کله چې د کارګر ګوند وزیرانو د ۷ میلیارډه پونډو لګښت ومانه، هغوی ته وویل شول چې د دې بودجې له لارې یوازې لس سلنه نویو راتلونکو افغانانو ته کورونه ورکول کېدای شي، چې دا محرومیت به د بریتانیا ټولنیز یووالی وګواښي.
په براکنل برکشایر کې ۳۰۰ افغانان په یوه هوټل کې مېشت دي. ځايي خلک وايي، چې هغوی له افغانانو سره خواخوږي لري؛ خو ډېری پخواني بریتانوي ځواکونه هم د کور ستونزه لري.
د امریکا د استیناف محکمې د پرېکړې له مخې به په امریکا کې مېشت افغانان او کامرون وګړي له دغه هېواده و اېستل شي. تر دې وړاندې د استیناف محکمې د ټرمپ ادارې هغه پرېکړه د یوې اوونۍ لپاره ځنډولې وه، چې د افغانانو د لنډمهاله خوندیتوب پروګرام د لغوه کېدو په اړه یې کړې وه.
د محکمې تازه پرېکړه د امریکا حکومت ته دا اجازه ورکوي، چې په دغه هېواد کې مېشت څه باندې ۱۴زره افغانان او نږدې ۸زره کامرون وګړي د امریکا له خاوري وباسي.
تر دې وړاندې د CASA په نامه د کډوالو ملاتړ سازمان له محکمې د افغانانو د لنډمهاله خوندیتوب پروګرام ځنډولو غوښتنه کړې وه؛ خو محکمې ویلي چې اوس دومره شواهد نشته چې حکومت دې دا اقدام ونهکړي.
د افغان ایواک په نوم امریکا ته د افغانانو د لېږد بنسټ مشر د محکمې تازه پرېکړه ننګولې او هغه یې ظالمانه بللې ده.
د دغه بنسټ له لوري په خپرې شوې خبرپاڼه کې راغلي، چې « دا اقدام قانوني نه؛ بلکې سیاسي انګیزه لري او په دې تړاو د ټرمپ ادارې پالیسي ظالمانه ده.»
د امریکا د کورني امنیت وزیرې کرېسټي اېل نویم وړاندې اعلان وکړ، چې د افغانانو لپاره به د لنډمهاله خوندیتوب یا TPS پروګرام پای ته ورسېږي، چې له مخې به یې زرګونه افغانان د جولای له میاشتې وروسته د امریکا د کډوالۍ او ګمرکونو ادارې (ICE) لهخوا د جبري اېستلو له ګواښ سره مخ شي.
د روسیې ځواکونو د جولای پر ۲۱مه د اوکراین شمال ختیځ سوومي ولایت پر ملکي سیمو د بېپیلوټه الوتکو برید کړی، چې په پایله کې یې ۱۳ کسان ټپیان شوي دي. د سیمهییزو چارواکو په وینا، یو ۵ کلن ماشوم هم په ټپیانو کې شامل دی.
د دغه ولایت والي اولېګ هریخروف په ټېلګرام کې لیکلي: «د نن ماښام د پوتویلپه ټولنه کې د دوښمن له لوري پر ملکي زېربناوو د ډرون برید وشو.»
نوموړي شاوخوا ۱۰ بجې (د سیمهییز وخت له مخې) راپور ورکړی و، چې څلور تنه چې یو ماشومام هم پکې دی، ټپیان شوي او بې له دې چې روغتون ته ولېږدول شي، درملنهیې شوې ده.
هریخروف زیاته کړې، د برید له امله اور بل شوی او بېړني ټیمونه هڅه کوي چې د اور مخه ونیسي.
وروسته چارواکو تایید کړه، چې د ټپیانو شمېر ۱۳ ته رسېدلی دی.
دغه برید داسې مهال ترسره کېږي چې د امریکا ولسمشر ډونالډ ټرمپ ګواښ کړی، که د اوکراین او روسیې ترمنځ د سولې تړون ۵۰ ورځو کې ونهشي، نو پر روسیې به سختې تعرفې ولګوي.
ټاکل شوې چې کییف او مسکو د جولای پر ۲۳مه د سولې خبرې بیا پیل کړي.
د سوېلي کوریا په ګاپیونګ ولسوالۍ کې د سختو بارانونو او ځمکښویېدنو له امله نن دوه کسان مړه شوي او پنځه نور لا هم لادرکه دي، چې له دې سره د مړو شمېر ۱۷ او د لادرکه شویو شمېر ۱۱ تنو ته رسېدلی دی.
د راپورونو له مخې، ددغو سېلابونو له امله تراوسه تر ۱۳ زرو زیات خلک اړ شوي چې خپل کورونه پرېږدي.
د کوریا ولسمشر لي جې-میونګ امر کړی، چې د زیان ژر ارزونه وشي او اغېزمنې سیمې "ځانګړې طبیعي آفت" سیمې اعلان شي، څو له دولت څخه یې ملاتړ ډېر شي.
د هوا پېژندنې ادارې ویلي، باران به تر نن ورځې پای ته ورسېږي او ښايي له هغې وروسته ګرمۍ څپه پیل شي.