د افغانستان د اورګاډي ګډ کنسرسیوم مرستیال ویلي، چې په ورستیو میاشتو کې د خواف ـ هرات د اوسپني پټلۍ له لارې افغانستان ته د توکو انتقالات ډېر شوي دي او له دې لارې په میاشت کې ۴۰ زره ټنه توکي انتقالیږي.
د افغانستان د اورګاډي د ګډ کنسرسیوم مرستیال د ایران د صدا او سیما رسنۍ سره خبرو کې ویلي، د خواف ـ هرات ریل پټلۍ له لارې د توکو د انتقالاتو په برخه کې د افغان سوداګرو علاقمندي ډېره شوې ده.
د افغانستان د اورګاډي د ګډ کنسرسیوم مرستیال عابدي وايي:«دغو بارونو کې سمنټ، کاشي خښتې، د اوسپنې تختې، بوره او نور ودانیز توکي دي چې له دې لارې افغانستان ته واردیږي.»
د خواف ـ هرات اوسپنې پټلۍ له لارې له ایران څخه د توکو انتقالات هره میاشت مخ پر ډېرېدو دي. مسولین وايي، له دې لارې اوس په میاشت کې ۴۰ زره ټنه توکيانتقالیږي او هڅه کوي، چې دا انتقالات تر پنځوس زره ټنه ورسوي.
د افغانستان د اورګادي د ګډ کنسرسیوم استازی ضیا الحق وايي:«موږ په ډېره کمه موده کې په دې توانېدلي یوو، چې دا ریکارډ مات کړو چې په لومړو کې ۱۰ زره ټنه او شل زره ټنه انتقالات کېدل خو اوس په میاشت کې زموږ انتقالات ۴۰زره ټنه ته رسېدلي دي او ښايي په راتلونکي میاشت کې یې ۵۰ زره ټنه ته ورسو.»
د راپورونو له مخې، د خواف ـ هرات اوسپنې پټلۍ د کال د شپږ میلیون مېټریک ټنه توکو او یو میلیون کسانو د انتقال ظرفیت لري.
د طالبانو او ایران د اورګادي پټلۍ مسولینو ویلي، چې ډېر ژر به له دې لارې د مسافرانو د تګ راتګ زمینه هم برابره کړي.
