خپلو حقونو پسې لالهانده متقاعدینو یو وار بیا په کابل کې لاریون کړی
خپلو حقونو پسې لالهانده لسګونه متقاعدینو یو وار بیا په کابل کې لاریون کړی. دغه متقاعدین وايي، له اقتصادي پلوه د بېوزلۍ تر ټولو بد وضعیت کې دي او باید د دوی لاسنیوی وشي.
خپلو حقونو پسې لالهانده لسګونه متقاعدینو یو وار بیا په کابل کې لاریون کړی. دغه متقاعدین وايي، له اقتصادي پلوه د بېوزلۍ تر ټولو بد وضعیت کې دي او باید د دوی لاسنیوی وشي.
دوی پرون شنبه (د زمري ۱۸مه) په کابل کې د تقاعد ریاست مخې ته راټول شوي وو او د طالبانو پر مشرتابه یې غږ وکړ، چې نور دې دوی نه ځوروي.
د عبدالخالق امرخېل په نامه یو لاریونوال وايي، د تقاعد د پېسو نه ورکړې دوی سوالګرۍ ته کېنولي او باید د مسوولانو له لوري د دوی د کړاو ختمولو ته د پای ټکی کېښودل شي.
په ورته وخت کې یو بل متقاعد د نوم نه ښودلو په شرط ویلي:« د طالبانو مشرتابه دې د خدای په خاطر موږ ته خپل حقونه راکړي.»
په تېرو نږدې څلورو کلونو کې متقاعدین په وار، وار د تقاعد حق اخیستلو لپاره د کابل د تقاعد ریاست مخې ته راغونډ شوي، چې خپل هغه حق ترلاسه کړي چې د ماموريت پر مهال به يې له تنخوا څخه د دولت خزانې ته ورکاوه.
د طالبانو حکومت بیا ویلي، چې متقاعدین باید د خپلو حقونو د ثابتولو لپاره ځانګړې محکمې ته مراجعه وکړي. د طالبانو د مالیې وزارت بیا ویلي و، چې د دغې ډلې د مشر ملاهبت الله د فرمان پر بنسټ د ټاکل شويو اصولو له مخې متقاعدینو ته د تقاعد حقونو د ورکړې پرېکړه شوې ده؛ خو متقاعدین بیا نیوکه کوي، چې اړونده ادارې دغه امر نه مني.
د ۱۴۰۳کال د مرغومي په لومړۍ نېټه د طالبانو مشر ملاهبت الله اخوندزاده د متقاعدینو د حقونو د څېړلو لپاره د ځانګړو محکمو د جوړولو امر وکړ، خو اوس د اعراض کوونکو لویه نیوکه دا ده چې د ټیټې کچې طالبان او مامورین دغه فرمان نه پلی کوي.
