په غزني کې د طالبانو والي عبدالصمد جاوېد د امر بالمعروف، نهی عن المنکر او شکایتونو د اورېدو د قانون د ښه پلي کېدو په موخه یوه غونډه کې خپلو ټولو اړوندو ادارو ته په جدي ډول ویلي، چې هېڅکله دې د هغو کسانو د جنازې او عامې فاتحې د مراسمو د ترسره کولو اجازه نه ورکوي، چې ځان وژنه کوي.
د غزني ولایت د خبرپاڼې له مخې، د دوشنبې په ورځ (د زمري ۲۰مه) د هبت الله اخوندزاده د لارښوونې پر بنسټ، د دغه ولایت د طالبانو د والي په مشرۍ د امر بالمعروف، نهی عن المنکر او شکایتونو د اورېدو د قانون د ښه پلي کېدو په موخه غونډه کې د ډاکټرانو د شفري نسخو او همداراز د هغو کسانو لپاره چې ځان وژنه کوي، د جنازې او عامو فاتحو د نه ترسره کولو موضوعات وڅېړل شول.
د طالبانو والي ملا عبدالصمد جاوېد په دې غونډه کې ټولو اړوندو ادارو ته جدي لارښوونه وکړه، چې هېڅکله دې هغو کسانو ته د جنازې او عامې فاتحې د مراسمو د ترسره کولو اجازه ورنه کړي، ځان وژنه کوي.
په دې غونډه کې همداراز د ډاکټرانو د شفري نسخو د مخنیوي لپاره یوه ولایتي کمېټه جوړه شوه، څو په دغه ولایت کې د شفري نسخو له لیکل کېدو مخنیوی وکړي.
دا په داسې حال کې ده، چې همدا نن طالبانو په کندهار او خوست ولایتونو کې ځینو خبریالانو ته ویلي چې تر دې وروسته دې د ځان وژنې خبرونه نه خپروي.
د خوست او کندهار ځینو خبریالانو نن دوشنبه (د زمري ۲۰مه) افغانستان انټرنشنل ته وویل، چې په یادو ولایتونو کې د طالبانو د اطلاعاتو او کلتور ریاستونو ورته سپارښتنه کړې، چې د ځان وژنې پېښو په تړاو نور خبرونه خپاره نه کړي.
یو شمېر خبریالانو ویلي، چې دوی د دې پېښو په پوښښ کې تر سانسور لاندې دي، ځکه طالبان د ځان وژنې پېښو ته د رسنیو پاملرنه د ځان پر خلاف تبلیغات انګیري.
خبریالان وايي، د ځان وژنې د پېښو زیاتوالی له اقتصادي کړکیچونو او د طالبانو له ټولنیزو محدودیتونو سره تړاو لري او په وینا یې پر ځوانانو یې رواني فشارونه ډېر کړي دي.
