د امریکا د ولسمشر ډونالډ ټرمپ د ملي امنیت پخوانی مشاور مک ماسټر له افغانستان انټرنشنل سره په مرکه کې ویلي دي چې د افغانستان پخوانی ولسمشر حامد کرزی د تبلیغاتو تر تاثیر لاندې و. نوموړی وايي، پخوانی ولسمشر اشرف غني بیا علمي او صادق شخص و، خو سیاسي اجماع یې رامنځته نه کړی شوه.
نوموړی وايي چې کریم خرم پخواني ولسمشر ته هغه مسایل انتقالول چې د ای اېس ای له ګمراه کوونکو معلوماتو سره یې سمون درلود.
د امریکا د ولسمشر پخوانی د امنیت شورا سلاکار زیاتوي، چې حامد کرزی د یو شمېر دسیسو ښکار شوی و.
هغه د پخواني ولسمشر اشرف غني په تړاو وايي چې نوموړی یو پوهنتوني شخصیت و، نه دا چې لکه د حامد کرزي په څېر دې ایتلافونه جوړ کړی شي.
مک ماسټر زیاتوي: "غني یو ژور صادق کس و. خو تر ټولو لویه ستونزه یې دا وه چې زاړه مشران، لکه د نظار شورا او نورو په راټولولو کې یې بریالی نه شو".
د نوموړي په خبره چې پخوانی ولسمشر غني د متحده ایالاتو له خوا تر ډېر فشار لاندې و، چې طالبان ورسره په واک کې شریک شي او نوموړی د واک وېش لپاره اماده نه و.
مک ماسټر وویل: "زما په نظر، له همدې ځایه متحده ایالات له طالبانو سره د غني پر ضد یو ځای شول، له همدې امله زه د غني لپاره همدردي لرم. البته هیڅ مشر کامل نه دی. هغو کسانو ته چې پر غني سخت انتقاد کوي وایم: اوس هبتالله اخوندزاده تاسو ته څه خدمت کړی؟"
نوموړي د افغانستان لپاره د امریکا د بهرنیو چارو وزارت پخوانی استازی د شخصي اجنډا په درلودلو تورن کړ او ویې ویل چې هغه له اشرف غني سره خپله شخصي ستونزه درلودله او هغه څه یې چې غوښتل ویې کړل.
مک ماسټر په افغانستان کې د وسله والو ډلو یادونه هم وکړه او ویې ویل چې د ډېورنډ پر پوله پرتې سیمې د یو شمېر وسله والو لپاره خوندي ځای دی.
مک ماسټر د امریکا د ولسمشر ډونالډ ټرمپ د لومړۍ دورې د ملي امنیت شورا سلاکار و.
