سرچینو افغانستان انټرنشنل ته ویلي چې نن د یکشنبې په ورځ د بدخشان په یمګان ولسوالۍ کې ۲۲ کسان له هغه وروسته ټپیان شول، چې طالبانو د سیمه ییزو لاریون کوونکو پر وړاندې سخت غبرګون وښود. د سرچینو په وینا،« ځايي اوسېدونکي د طالبانو د ډزو او ګوزارونو له امله ټپیان شول.»
ځايي سرچینو نن یکشنبه د زمري ۲۶مه وویل چې د نښتې لامل د بدخشان یمګان ولسوالۍ په "کاوجو خان" کلي کې د طالبانو له خوا د «کلي مشر» په توګه د مطلوب کس د کار د دوام په وړاندې د اوسیدونکو نارضایتي او اعتراض و.
د کلي اوسیدونکي وايي چې ځایي خلک غوښتنه کوي د نوي کلي مشر د ټاکلو لپاره ټاکنې ترسره شي خو د طالبانو سیمه ییز چارواکي د خپلې خوښې کس د کار پر دوام ټینګار کوي.
د ترلاسه شویو معلوماتو له مخې، شاوخوا نهه کسان چې په ډزو کې ټپیان شوي دي، وضعیت یې نازک ښودل شوی، چې د درملنې لپاره د بدخشان ولایت د فیض اباد مرکز او بهارک روغتیايي مرکزونو ته لیږدول شوي دي.
سرچینو افغانستان انټرنشنل ته د نښتې د ځینو ټپیانو عکسونه هم لېږلي دي.
د کلي د شاوخوا ۸۰ کورنیو د شکایت له مخې، خلک له غلام محمد څخه ناراضه دي، چې له کلونو راهیسې یې د "ارباب" په توګه کار کړی او د هغه پر ځای یې بل کس نومولی دی، چې "اکثریت" یې په اړه موافق دي.
اوسیدونکي وايي چې که څه هم خلک د اوسني "ارباب" د کار له دوام څخه خوښ نه دي، طالبان هغه په کلیوالو مسلط کوي.
سرچینې وايي چې اوسنی "ارباب" په یمګان کې د طالبانو د ولسوال ملاتړ له ځان سره لري.
ځایي اوسیدونکو وویل چې پخوا د کلي مشر، چې د ارباب په نوم هم پیژندل کیږي او د کلي شورا مشر و، د ټاکنو او خلکو د رایو له لارې ټاکل کېده.
طالبانو تر اوسه پورې د پیښې په اړه تبصره نه ده کړې.
د افغانستان په ډیری کلیو کې، "د کلي مشر" د خلکو د رایو او اجماع له لارې ټاکل کیږي خو د طالبانو ایډیالوژي د ټاکنو سخت مخالفت کوي.
طالبانو په بدخشان او د افغانستان په نورو ولایتونو کې له دې وړاندې هم مدني لاریونونه ځپلي دي.
