د حقاني شبکې د پخواني قوماندان مولوي سنګین ډلې یوه ډلګي مشر پر خپلو پلویانو غږ کړی، چې د بلوچستان د ژوب پېښې د مړو په انتقال او غچ اخېستونکي برید کې مرسته ور سره وکړي. حیات الله، چې په غلچکي تنګیوال مشهور دی، پر خپلو پلویانو غږ کړی « موږ یوازې مه ورپرېږدئ».
د مولوي سنګین خوریې او ددې ډلې د فاتح کاروان یوه پخواني قوماندان غلچکي تنګیوال د زمري پر ۲۴مه، چې پر کابل د طالبانو د تسلط له ورځې سره سمون خوري، د خپلې ډلې له غړو غوښتنه کړې، چې « ملګرو ته ضرورت دی، موږ یوازې مه ورپرېږدئ».
حیات الله «غلچکی تنګیوال» د حقاني شبکې د مولوي سنګین د ډلې اړوند فاتح کاروان جنګي قوماندان پاتې شوی چې په زیړوک ولسوالۍ کې یې هم یوه ډلګۍ لرله.
نوموړي پر ټولنیزو رسنیو په یوه پیغام کې ویلي، « هر مجاهد چې ځي، تکلیف به نه وي ورته، هیله ده، چې په دې سپیڅلي جهاد کې همکاري را سره وکړئ».
د اګست پر اوومه پاکستاني پوځ د پاکستاني طالبانو یوه ۳۳ کسیزه ډله، چې د پکتیکا له وړممۍ ولسوالۍ نه د بلوچستان د ژوب پر لور روانه وه، په سمبازه سیمه کې د بې پیلوټه الوتکو له لارې په نښه کړه، چې یو شمېر کسان پکې ووژل شول او یو شمېر نور ټپیان شول.
په وړممۍ کې سرچینو افغانستان انټرنشنل ته وویل، چې د اګست پر اتمه جنګیالیو له ځینو کلینیکونو نه له ځان سره ډاکټران بوتلل، چې د پاکستاني طالبانو د ټپیانو درملنه وکړي.
د مولوي سنګین ډله له ټي ټي پي او نورو پاکستاني طالبانو سره په همکارۍ او په جګړو کې پر برخه اخېستنې تورنه ده او له همدې امله طالبانو ددې ډلې مشران، په ځانګړي ډول د سنګین ورور بلال فاتح، په کور کښېنولي دي.
د مولوي سنګین ډلې فاتح کاروان له پخوا راهیسې له ټي ټي پي سره د پاکستان د پوځ او امنیتي ځواکونو خلاف جګړو کې برخه درلوده.
طالبانو ددې ډلې یو شمېر غړي له وړاندې نیولي وو او د څرخي پله زندان ته یې لېږدولي وو.
