ازبکستان له طالبانو سره د برېښنا په برخه کې د څلورو پروژو تړونونه لاسلیکوي

د طالبانو د ټولګټو وزارت په اعلامیه کې ویل شوي، چې تېره اونۍ د حیرتان بندر له لارې ۵۵ زره او ۳۹۵ ټنه، د اقینې بندر له لارې ۷۱۲۰ ټنه، د تور غونډۍ بندر له لارې ۱۳۰۹۰ ټنه او د خواف ـ هرات له لارې ۱۱۱۷۸ ټنه نفتي، غیر نفتي او نور توکي صادر او وارد شوي دي.

طالبانو ویلي، چې له افغانستان څخه په صادراتو کې ۱۹۷ ټنه وچه میوه هم د اوسپنې پټلۍ له لارې انتقال شوې ده.

د طالبانو د ټولګټو چارو وزارت ویلي، د اوسپنې پټلۍ له لارې د صادراتو او انتقالاتو کچې په لوړېدو سره کاري فرصتونه هم مخ په ډېریدو دي او دغه وزارت هڅه کوي، چې د اوسپنې پټلۍ له لارې د ډېرو انتقالاتو او سوداګرۍ په برخه کې اسانتیاوې برابرې کړي.

د طالبانو د کډوالو چارو وزارت نن یکشنبه د «زمري ۲۶مه» وویل، چې د یاد وزارت وزیر عبدالکبیر په هند کې د پخواني حکومت سفیر فرید ماموندزي ته ښه راغلاښت ووایه، او زیاته یې کړه، چې افغانستان د ټولو افغانانو کډ کور دی او کولای شي هېواد ته راستانه شي.

د طالبانو کډوالو او بېرته راستنیدونکو چارو وزیر ویلي:« د اسلامي نظام د حاکمیت په وړاندې دښمني پای ته رسیدلې او نور به له افغانستان څخه نړۍ ته هیڅ زیان ونه رسیږي.»

طالبانو د کډوالو چارو وزارت د فرید ماموندزي په حواله لیکلي، چې نوموړي په خپلو خبرو کې د طالبانو له همکارۍ خوښي څرګنده کړه او د امنیت په ګډون یې اوسني مثبت بدلونونه د افغانستان د راتلونکي لپاره مهم وبلل.

فرید ماموندزي وویل:« هر ډول مرسته چې یې له لاسه کېږي، د افغانستان د خلکو لپاره به یې ونه سپموي.»

فرید ماموندزي شاوخوا دوه کاله وړاندې په هند کې د افغانستان د سفیر له دندې استعفا وکړه او په لندن کې مېشت شو.

د طالبانو د کابل ولايت ښاري ابتدایه محکمې جزا دېوان او چهاراسياب ولسوالۍ ابتدایه محکمې د پرېکړو له مخې، د روان کال د زمري ۲۳مه او زمري ۲۵مه نېټه د يوې ښځې په ګډون څلورو کسانو ته د غلا او زنا په جرم سزا ورکړل شوې.

د یادې ډلې،‌ ښاري ابتدایه محکمې جزا دېوان او ابتدایه محکمې درې کسان هر یو په ۳ کاله تنفيذي بند او هر یو ۳۹ درو محکوم کړ، دغه ډول یې څلورم کس په یوه کال تنفيذي بند او ۳۹ دُرو وهلو سزا محکوم کړ.

دا سزاګانې به د طالبانو د سترې محکمې تر منظورېدو وروسته پلي شي.

په ترکیه کې د طالبانو سفیر سمیع‌الله فرهمند په افغان سفارت کې جوړې شوې غونډې ته ویلي چې اوسنی نظام له ډېرو سرښندونو او صبر وروسته افغانانو ته ورپه برخه شوی دی.

نوموړي ویلي: «امنیت او اوسنی نظام د الله پاک لوی نعمتونه دي او باید د هېواد په پرمختګ او ابادۍ کې ترې ګټه واخېستل شي.» په دې غونډه کې د ترکیې د بهرنیو چارو وزارت استازو او ډیپلوماټانو هم ګډون کړی و.

په ورته وخت کې په پاکستان کې د طالبانو د حکومت سفارت هم ویلي چې د خپلې واکمنۍ د کلیزې په مناسبت یې لویه غونډه جوړه کړې وه.

د دغه سفارت د معلوماتو له مخې په غونډه کې د پاکستان ګڼو چارواکو او سیاسیونو، اسلام اباد کې مېشتو د بهرنیو هېوادونو سفیرانو او ډيپلوماټانو، علماوو، خبریالانو، زده‌کړیالانو، کډوالو او د فرهنګي ټولنې استازو ګډون کړی وو.

طالبان په داسې حال کې په کور دننه او بهر د خپلې واکمنۍ څلورمه کلیزه نمانځي او په خپلو لاسته راوړنو ویاړي چې د همدې کلیزې په مناسبت ملګرو ملتونو او ځینو هېوادونو په پیغامونو کې له دوی غوښتي چې د بشري حقونو وضعیت ته دې جدي پام وکړي.

طالبانو په افغانستان کې له بیا واک ته رسېدو سم د خلکو په ځانګړي توګه پر افغان میرمنو او نجونو پراخ محدیتونه ولګول چې له کبله یې له جدي نیوکو سره مخامخ دي؛ خو دوی بیا په کراتو ویلي چې په افغانستان کې د ټولو په ځانګړي توګه د ښځو حقونه د دوی په ټکو د اسلامي شریعت په چوکاټ کې خوندي دي.

په دوحه کې د افغانستان سفارت او فرهنگي اتشې په گډه همکارۍ د زمري۲۴مه د قطر مېشتو افغانانو په گډون وتمانځله.

په دې مراسمو کې سهیل شاهین ویلي چې باید په هېواد کې له امینت څخه د هېواد د پرمختگ لپاره گټه پورته شي.

څلور کاله وړاندې د زمري پر ۲۴مه نېټه طالبان د دوهم ځل لپاره پر افغانستان واکمن شول. تر دې وروسته په افغانستان کې بېوزلي او بې روزګاري ډېره شوې، چې په لویه کچه کډوالي پرې دپاسه یو بل ناورین دی.