ملګرو ملتونو کې د افغانستان استازي د طالبانو مخالفان «د سلطان محمود لټان» وبلل

د پاکستان کرېکټ بورډ ویلي، چې اعلان شوې لوبډله له بدلون پرته په اسیا جام سیالیو کې هم لوبیږي.

د متحده عربي اماراتو په کوربه توب د افغانستان، پاکستان او متحده عربي اماراتو د کرېکټ ملي لوبډلو ترمنځ درې اړخیزه لوبلړۍ د اګسټ میاشتې پر ۲۹مه نېټه په شارجه کې پیلیږي او د سپټمبر میاشتې تر ۷مې نیټې به دوام وکړي.

پاکستان د کرېکټ بورډ له خوا په اعلان شوې لوبډله کې د سلمان علي اغا په لوبډلمشرۍ ابرار احمد، فهیم اشرف، فخر زمان، حارث رووف، حسن علي، حسن نواز، حسین طلعت، خوشدل شاه، محمد حارث، محمد نواز، محمد وسیم، صاحبزاده فرحان، صایم ایوب، سلمان میرزا، شاهین شاه اپریدی او صفیان مقیم د لوبډلې برخه دي.

د افغانستان کرېکټ بورډ هم د درې اړخیزي لوبلړۍ او اسیا جام سیالیو لپاره د اګسټ په ۴مه نېټه ۲۲ کسیزه نوملړ اعلان کړې، خو د یادو سیالیو لپاره لا هم د افغان لوبډلې نوملړ نه دی وروستی شوی.

د اسیا جام سیالۍ د سپټمبر په ۹مه نېټه په عربي متحده اماراتو کې پیلږي او د همدې میاشتې تر ۲۸مې نیټې به دوام ولري.

د مولوي سنګین خوریې او ددې ډلې د فاتح کاروان یوه پخواني قوماندان غلچکي تنګیوال د زمري پر ۲۴مه، چې پر کابل د طالبانو د تسلط له ورځې سره سمون خوري، د خپلې ډلې له غړو غوښتنه کړې، چې « ملګرو ته ضرورت دی، موږ یوازې مه ورپرېږدئ».

حیات الله «غلچکی تنګیوال» د حقاني شبکې د مولوي سنګین د ډلې اړوند فاتح کاروان جنګي قوماندان پاتې شوی چې په زیړوک ولسوالۍ کې یې هم یوه ډلګۍ لرله.

نوموړي پر ټولنیزو رسنیو په یوه پیغام کې ویلي، « هر مجاهد چې ځي، تکلیف به نه وي ورته، هیله ده، چې په دې سپیڅلي جهاد کې همکاري را سره وکړئ».

د اګست پر اوومه پاکستاني پوځ د پاکستاني طالبانو یوه ۳۳ کسیزه ډله، چې د پکتیکا له وړممۍ ولسوالۍ نه د بلوچستان د ژوب پر لور روانه وه، په سمبازه سیمه کې د بې پیلوټه الوتکو له لارې په نښه کړه، چې یو شمېر کسان پکې ووژل شول او یو شمېر نور ټپیان شول.

په وړممۍ کې سرچینو افغانستان انټرنشنل ته وویل، چې د اګست پر اتمه جنګیالیو له ځینو کلینیکونو نه له ځان سره ډاکټران بوتلل، چې د پاکستاني طالبانو د ټپیانو درملنه وکړي.

د مولوي سنګین ډله له ټي ټي پي او نورو پاکستاني طالبانو سره په همکارۍ او په جګړو کې پر برخه اخېستنې تورنه ده او له همدې امله طالبانو ددې ډلې مشران، په ځانګړي ډول د سنګین ورور بلال فاتح، په کور کښېنولي دي.

د مولوي سنګین ډلې فاتح کاروان له پخوا راهیسې له ټي ټي پي سره د پاکستان د پوځ او امنیتي ځواکونو خلاف جګړو کې برخه درلوده.

طالبانو ددې ډلې یو شمېر غړي له وړاندې نیولي وو او د څرخي پله زندان ته یې لېږدولي وو.

د طالبانو د سرحدي پولیسو ریاست نن یکشنبه د «زمري ۲۶مه» ادعا کړې، چې د دوی منسوبین هېچا ته اجازه نه ور کوي، چې د هېواد تاریخي او ملي ارزښتونه قاچاق کړي.

طالبانو دا نه ده په ډاګه کړې چې د څومره امریکايي ډالرو، یا هم څومره تاریخي اثارو د قاچاق مخه نیول شوې او په کومو هوايي ډګرونو او یا هم په سرحدي بندرونو کې نیول شوي دي.

له دې وړاندې له افغانستان نه د امریکايي وسلو د قاچاق په اړه ګڼ رپوټونه ورکړل شوي او ددې ډلې غړي پکې ښکیل ګڼل شوي، خو طالبانو په دې برخه کې تر اوسه واضح اقدامات نه دي کړي او نه یې هم خپل کسان محکمې ته وړاندې کړي دي.

په کابل پوهنتون کې سرچینو نن یکشنبه د «زمري۲۶مه» وویل چې د کابل پوهنتون د شرعیاتو پوهنځي دریو سابقه لرونکو استادانو ته د منفکۍ مکتوبونه ابلاغ شوي دي.

سرچینې وايي:« پوهاند عبدالمتین شهیدي د ثقافت اسلامي ډیپارتمنټ، ډاکتر احسان الله مبارز د حدیث ډیپارتمنت او ډاکتر خواجه محمد عصامي د اسلامي ثقافت ډیپارتمنت استادان ول.»

د طالبانو له خوا له پوهنتونونو د مسلکي استادانو د ګوښه‌کېدو پر دوام، دې ډلې د روان کال د غويي ۲۳مه د ننګرهار پوهنتون د ښوونې او روزنې پوهنځي ۱۰ استادان او اداري کارکوونکي د «تنقیص» په نوم له خپلو دندو ګوښه کړي وو. په یادو کسانو کې دوه مېرمنې هم شاملې دي، چې یوه یې استاده او بله اداري کارکوونکې وه.

افغانستان-انټرنشنل-پښتو ته د رسېدلي مکتوب په یوه نسخه کې لیدل کېدل، چې ډېری دا استادان د پوهاند علمي او کادري درجې لرونکي دي.

طالبانو نه یوارې د کابل او ننګرهار له پوهنتون استادان ګوښه کړي دي، بلکې ١٢٠ تنه یې په خوست، ۷۰ په پکتیا، ٥٠ په باميان او ٥٠ تنه په بدخشان کې هم ګوښه کړي دي.

پر افغانستان د طالبانو له واکمنېدو وروسته په علمي او تخصصي مرکزونو کې د اکاډمیکو کسانو ګوښه‌کېدل په سېستماتیک شکل روان دي او یاده ډله هڅه کوي په دې ځایونو کې له خپلې ایډيالوژۍ سره جوړ او د مدرسو ملایان وګوماري.

په هېواد کې د پوهنتونونو د متخصصو او تجربه‌لرونکو استادانو د ګوښه‌کېدو بهیر داسې مهال روان دی، چې افغانستان تر بل هر وخت ډېر علمي او مسلکي پرمختګ ته اړتیا لري.

د افغانستان برېښنا شرکت د یکشنبې په ورځ د یوې خبرپاڼې په خپرولو سره ویلي، چې د ازبکستان د انرژۍ وزیر جورابیک میرزا محمدوف او د افغانستان په چارو کې د ازبکستان ځانګړی استازی عصمت الله ایرګاشیف کابل ته رسیدلي.

طالبانو ویلي، چې د ازبک پلاوي او افغانستان برېښنا شرکت ترمنځ به د څلورو لویو پروژو تړونونه لاسلیک شي.

په لاسلیک کېدونکو تړونونو کې د سرخان – دشت الوان د ۵۰۰ کیلوولټه برېښنا د انتقالي لین پروژه، چې زرو ته لوړیږي،د کابل – شیخ مصري د ۸۰۰ میګاواټو په ظرفیت انتقالي لین، د ۸۰۰ میګاولټ امپیر په ظرفیت د ارغندي سب سټېشن پراختیا او د ۱۲۶ میګاولټه امپیر په ظرفیت د ننګرهار د شیخ مصري سب سټېشن د جوړولو پروژې پکې شاملې دي.

طالبانو له ازبکستان سره د یادو تړونونو لاسلیک کېدل د برېښنا پراختیا او وېش په برخه کې ستر ګام بللی دی.

د طالبانو تر واک لاندې برېښنا شرکت وړاندې د ۲۴۳ میلیونه امریکايي ډالرو په ارزښت د برېښنا لېږد او وېش څلورو پروژو تړونونو لاسلیک کولو خبر ورکړی و.