رویټرز خبري اژانس (د زمري ۲۵مه) لیکلي، چې هسپانیا تازه په تازه له لویو اورونو سره مبارزه کوي. چارواکو خبرداری ورکړی، چې د اور د کنټرول لپاره شرايط برابر نه دي. تر دې مهاله ۷ کسان مړه شوي او پراخې ځمکې یې سوځولي دي.
په ګالیسیا کې څو اورونه سره یو ځای شول، چې له امله یې سړکونه او اورګاډو پټلۍ وتړل شوې. لومړي وزیر پېدرو سانچېز خبرداری ورکړ، چې د نویو اورونو ګواښ هم شته.
ډېر اورونه په کستیا او لیون کې بل شوي، چې په څو ساعتونو کې زرګونو هيکټاره ځمکو ته غځېدلی، خو اوس لږ ورو شوي دي.
په هسپانیا کې سږ کال تر دې دمه تر ۱۵۷ زره هيکټاره ډېر ځنګلونه سوځېدلي دي.
رویټرز خبري اژانس (د زمري ۲۵مه) د سراييلي پوځ په حواله لیکلي، تر یکشنبې ورځې وروسته به د غزې اوسېدونکو ته خېمې او د اوسېدو نور وسایل ورکړل شي، چې هغوی له جنګي سیمو څخه په خوندي ډول د غزې جنوبي برخو ته ولېږدول شي.
د اسراییل لومړي وزیر بنیامین نتنیاهو ویلي، چې تر عملیاتو وړاندې به ملکي وګړي خوندي سیمو ته لېږل کېږي.
ملګرو ملتونو د دې کار ستاینه وکړه، خو خبرداری یې ورکړ چې دغه لېږد به د خلکو کړاوونه نور هم زیات کړي، ځکه په غزه کې هیڅ ځای هم خوندي نه دی.
فلسطیني ډلو دغه پلان غندلی دی، د اسلامي جهاد ډلې ویلي، چې دا کار د نړیوالو قوانینو ښکاره نقض دی. په ورته وخت کې اسراییلي ځواکونو په غزه کې عملیات پراخ کړي او د زیتون او شجاعیه سیمو کې درنې بمبارۍ هم شوي دي.
د امریکا د بهرنیو چارو وزارت اعلان کړی، چې د یوې «بشپړې او هر اړخیزې ارزونې» تر ترسره کېدو پورې د غزې اوسېدونکو ته د (بي یو او بي دوه) د سفر ویزې نه ورکول کېږي. دا اقدام د فلسطین پلوه ډلو له خوا له سخت غبرګون سره مخ شوی دی.
د امریکا د بهرنیو چارو وزارت د شنبې په ورځ (د زمري ۲۵مه) وویل، چې په وروستیو ورځو کې یوازې یو محدود شمېر بشردوستانه ویزې د طبي اړتیاوو لپاره صادرې شوې دي؛ خو دقیق شمېر یې نه دی ورکړی.
د دې وزارت په وېب پاڼه کې د خپرو شویو میاشتینيو احصایو د تحلیل له مخې، امریکا سږ کال د فسلطین ادارې له خوا د سفر اسناد لرونکو ته صادر شوي د طبي درملنې لپاره له ۳۸۰۰ څخه ډېرې د بي یو او بي دوه ویزې صادرې کړې دي.
د فلسطین اداره د لوېدیځې غاړې او غزې تړانګې اوسېدونکو ته دا ډول د سفر اسناد ورکوي.
دغه پرېکړه وروسته له هغې وشوه، چې د افراطي ښي اړخو فعاله او د ډونالډ ټرمپ پلوې لورا لوومر د جمعې په ورځ په ټولنیزو رسنیو کې ادعا وکړه، چې فلسطیني کډوال روانه میاشت امریکا ته داخل شوي دي.
د هغې څرګندونو د ځینو جمهوري غوښتونکو د ټګزاس استازي چیپ روی او د فلوریډا د استازي رنډي فایڼ غبرګونونه پارولي.
چیپ روی وویل، چې دی به دا موضوع وڅېړي او رنډي فایڼ دا وضعیت «د ملي امنیت لپاره خطر» وباله.
د امریکا-اسلامي اړیکو شورا د غزې اوسېدونکو لپاره د ویزې ځنډول وغندل او دا یې د ټرمپ ادارې له خوا د «قصدي ظلم» یوه بله نښه وبلله.
د فلسطیني ماشومانو د مرستې صندوق هم خبرداری ورکړی، چې دا پرېکړه به د غزې د ناروغو او ټپي ماشومانو لپاره امریکا ته د درملنې لاسرسی بند کړي.
د امریکا حکومت لا تر اوسه نه دي ویلي، چې له جګړې تښتېدلي فلسطینیان به ومني او که نه.
خو ځینو سرچینو رویټرز ته ویلي، چې سوېلي سوډان او اسراییل د فلسطینیانو د بیا مېشتېدو په اړه د یوه پلان پر سر خبرې کوي.
رویټرز راپور ورکړی، چې یو شمېر بهرنيو جنګیاليو د سوریې له نوي اسلامي حکومت څخه د دې هېواد د تابعیت غوښتنه کړې ده. دوی استدلال کوي، چې د سوریې د پخواني ولسمشر بشارالاسد د رژیم په نسکورولو او د نوي حکومت په جوړولو کې یې مرسته کړې ده.
د بهرنیو جنګیالیو برخلیک د حیات التحریر الشام له واک ته رسېدو را وروسته یوه جدي مسله ګرځېدلې، ځکه ډېر لږ هېوادونه چمتو دي چې دغه افراطي کسان بېرته ومني.
ځیني سوریایان هم د دوی له شتون سره اندېښنه لري.
ډېری دا جنګیالي او د دوی کورنۍ له مرستندویه کارکوونکو او خبریالانو سره چې د یاغیانو سره یوځای شوي د هویت معتبر اسناد نه لري.
یو شمېر یې خپل اصلي تابعیت له لاسه ورکړی او له دې وېرېږي چې که بېرته خپلو هېوادونو ته واستول شي، هلته به یا له اوږدمهاله بند یا ان اعدام سره مخ شي.
خو د سوریې تابعیت ورکړه کولای شي چې د سوریایانو او بهرنیو حکومتونو لپاره ستونزې جوړې کړي، هغه هېوادونه چې نوی حکومت هڅه کوي د هغوی ملاتړ جلب کړي.
دا غوښتنه چې د پنجشنبې په ورځ د سوریې د کورنیو چارو وزارت ته سپارل شوې او رویټرز هم تر لاسه کړې، استدلال کوي چې خلکو ته باید تابعیت ورکړل شي ترڅو دوی مېشت شي، ځمکه ولري او ان سفر وکړي.
په لیک کې راغلي: «موږ یو ځای ډوډۍ ووېشله، غم مو شریک کړ او د سوریې د ازاد او عادلانه راتلونکې لپاره مو یو ځای هیله درلوده، خو زموږ لپاره وضعیت لا هم نامعلوم دی.»
همداراز په لیک کې ویل شوي: «موږ د سوریې له رهبرۍ څخه په درناوي غواړو، چې په ورورۍ او د ژور فکر له مخې، موږ ته د سوریې بشپړ تابعیت او د سوری پاسپورټ اخیستو حق راکړي.»
د واک له ترلاسه کولو وروسته په لومړنیو اوونیو کې د سوریې لنډمهاله ولسمشر احمد الشرع ویلي وو، چې بهرني جنګیالي او د هغوی کورنیو ته ممکن د سوریې تابعیت ورکړل شي؛ خو د داسې اقدام په اړه کوم عام راپور نه دی ورکړل شوی.
له هغه وروسته چې په الاسکا کې د امریکا او روسیې د ولسمشرانو ترمنځ د اوکراین د جګړې د پای ته رسولو په موخه ناسته بې پایلې پای ته ورسېده، د روسیې د بهرنیو چارو وزیر سرګي لاوروف د ترکیې او هنګري د بهرنیو چارو وزیرانو سره ټلیفوني خبرې وکړې.
د روسیې د بهرنیو چارو وزارت د شنبې په ورځ (د زمري ۲۵مه) وویل، چې سرګي لاوروف له خپل ترکي سیال هاکان فیدان سره د ترکیې په نوښت خبرې وکړې او د پوتین او ټرمپ د لیدنې د پایلو په اړه یې نظرونه تبادله کړل.
ترکیه چې د ناټو غړیتوب او د روسیې او اوکراین سره اړیکې لري، په دې جګړه کې د منځګړي رول لوبولی دی.
لاوروف د هنګري د بهرنیو چارو وزیر پیټر سیجارتو سره هم خبرې وکړې او د اوکراین د کړکېچ او د روسیې - امریکا د غونډې د پایلو په اړه یې بحث کړی دی.
هنګري چې له مسکو سره نږدې اړیکې لري، د جګړې پر مهال څو ځله د اروپايي ټولنې له خوا پر روسیې د بندیزونو مخالفت کړی او لا هم له روسیې سره د انرژۍ په برخه کې همکارۍ ته دوام ورکوي.
د دې هېواد لومړي وزیر ویکتور اوربان د پوتین او ټرمپ تر لیدو وروسته ویلي: «نن نړۍ له پرون څخه خوندي شوې ده.»
دا څرګندونې په داسې حال کې شوې، چې د اروپا نورو مشرانو ټینګار کړی چې د اوکراین د خاورې په اړه پرېکړه یوازې د اوکراینیانو حق دی.
د کاناډا لومړي وزیر مارک کارني د شنبې په ورځ (د زمري ۲۵مه) اوکراین ته د امنیتي تضمینونو د ورکړې لپاره د امریکا له ژمنې په هرکلي سره ویلي، د ولسمشر ټرمپ په مشرۍ په اوکراین کې د روانې جګړې د پای ته رسېدو لپاره زمینه برابره شوې ده.
مارک کارني په یوې اعلامیې کې زیاته کړې، «د هرې عادلانه او تل پاتې سولې لپاره قوي او د اعتماد وړ امنیتي تضمینونه ډېر مهم دي. د امنیتي تضمینونو د ورکړې لپاره د امریکا له چمتووالي هر کلی کوم.»
نوموړي زیاته کړې، د ټرمپ په مشرۍ هڅې به په اوکراین کې د روسیې د «غېرقانوني» جګړې د پایته رسېدو لپاره زمینه برابره کړي.
د امریکا ولسمشر هم په الاسکا کې له خپل روسي سیال سره کتنه بریالۍ بللې او په خپلو ټولنیزو رسنیو کې یې لیکلي، دواړو لوریو هوکړه کړې چې په اوکراین کې د روانې جګړې د پای ته رسېدو لپاره تر ټولو غوره لاره اوربند نه، بلکې د سولې هوکړه ده.