حماس په غزه کې د اوربند او د اسیرانو خوشې کولو وړاندیز منلی

د ایران بهرنیو چارو وزارت د یکشنبې په ورځ (د زمري ۲۶مه) د یوې اعلامیې په خپرولو سره ویلي، په جبري توګه د غزې تخلیه، له نږدې دوو کلونو د دغه ښار بمباروَنه او له پنځو میاشتو راهیسې د دغه ښار د کلابندۍ او له لوږې سره یې د اوسېدونکو مخ کول بشري ضد جنایت او جنګي جنایت بلل کېږي او موخه یې هم د فلسطیني نسل د وژنې طرحې بشپړول او د فلسطین او ملت محوه کول دي.

د اعلامیې له مخې، د اسراییل په دغه جنایت کې امریکا او ځینې اروپايي هېوادونه هم ښکېل دي او د ملګرو ملتونو پر امنیت شورا له نیوکې سربېره ویلي، چې دغه شورا هم د اسراییل د تحرکاتو پر وړاندې چوپه خوله ده.

اعلامیه کاږي، له غزې په جبري توګه د فلسطینیانو اېستنه د بنیامین نتنیاهو له لوري د «لوی اسراییل» د جوړونې چې پکې د عربي هېوادونه ځينې سیمې هم شامل دي، د طرحې د بشپړولو هڅه ده او د اسراییل دغه چاره یې د سیمې او نړۍ د سولې او امنیت لپاره جدي ګواښ ګڼلې ده.

ایران د غزې د تخلیه کېدو په برخه کې د اسراییل طرحه یوه توطیه ګڼي او د اسراییل پر وړاندې د نړۍوالې ټولنې او په ځانګړې توګه د اسلامي هېوادونو د بېړني اقداماتو پر اړتیا ټينګار لري او په وینا یې که چېرې یې مخه ونه نیول شي، نو اسراییل به خپلو دغه ډول جنایتونو ته دوام ورکړي.

د یادونې وړ ده، اسراییلي پوځ ویلي چې له یکشنبې ورځې وروسته به د غزې اوسېدونکو ته خېمې او د اوسېدو نور وسایل ورکړل شي، چې هغوی له جنګي سیمو څخه په خوندي ډول د غزې سوېلي برخو ته ولېږدول شي.

خو فلسطیني ډلو دغه پلان غندلی دی او د اسلامي جهاد ډلې بیا ویلي، چې دا کار د نړۍوالو قوانینو ښکاره نقض دی.

په اسراییل کې د یکشنبې په سهار زرګونه مظاهره‌چیان د یو عمومي کاربندیز په ترڅ کې چې د تښتول شویو کسانو د کورنیو او د جګړې قربانیانو د خپلوانو له خوا اعلان شوی و، کوڅو او لارو ته راووتل. دوی د جګړې د پای ته رسېدو او د ټولو اسیرانو د خوشې کېدو غوښتنه وکړه.

پولیسو وویل، د ماسپښین تر وخت پورې یې له ۳۰ زیات مظاهره‌چیان نیولي، ځکه فعالانو سړکونه بند کړي وو او ځینو ځایونو کې له پولیسو سره چې غوښتل یې لارې پرانیزي، نښتې شوې. پولیسو په ځینو سیمو کې پر لاریون کوونکو اوبه شیندلې دي.

د مظاهرې غوښتنه «د اکتوبر شورا» کړې چې د۲۰۲۳کال د د اکتوبر د اوومې برید قربانیان او د هغوی کورنۍ پکې شاملې دي. دوی د حکومت د وروستۍ پرېکړې پر ضد راپورته شوي چې غواړي غزه ښار په پوځي ډول ونیسي.

د ورځنیو فعالیتونو اصلي ځای د تل‌ابیب د اسیرانو څلورلارې وه، چې د ولسمشر اسحاق هرتزوګ په ګډون ګڼ چارواکي او د اسیرانو کورنۍ پکې راټولې وې. هرتزوګ وویل: «هیڅ اسراییلی نشته چې زموږ وروڼه او خويندې بېرته کور ته نه غواړي».

هرتزوګ په انګلیسي کې پر نړیوالې ټولنې هم غږ وکړ چې پر حماس فشار زیات کړي.

د اسراییل صدراعظم بنیامین نتنیاهو ادعا وکړه چې دغه اعتصاب له حماس سره اوربند ته رسېدل ستونزمنوي او د اسیرانو د تبادلې احتمال لرې کوي.

نتنیاهو د وزیرانو د کابینې په غونډه کې وویل، « هغه کسان چې د حماس له ماتولو پرته نن د جګړې د پای غوښتنه کوي، د حماس دریځ ټینګوي، د اسیرانو د خوشې کېدو لاره بندوي او دا ډاډمنوي، چې د اکتوبر د اوومې پېښې به بیا تکرار شي».

هغه ټینګار کړی، چې د اسیرانو د خلاصون او د غزې د خطر له منځه وړو لپاره «ضروري ده چې ماموریت بشپړ شي او حماس مات کړل شي».

خو د اسیرانو کورنیو غبرګون ښودلی او لومړی وزیر یې تورن کړی چې خلکو ته یې دروغ ویلي او څو هغه معاملې یې رد کړې دي، چې ممکن د اسیرانو د خوشې کېدو سبب شوې وای.

د روسیې د دفاع وزارت ویلي، د دونڅک په سیمه کې د زولوتيي کولوډیاز په نوم مېشت ځای ترڅنګ یې ښه پوځي دریځونه خپل کړي، خو اوکراینۍ نقشې ښيي چې اوکرایني ځواکونو د روسانو پرمختګ مهار کړی دی.

د روسیې دفاع وزارت زیاته کړې چې د جګړه ییزو الوتکو، ډرونونو او توغندیو په وسیله یې د ساپسان توغندیو زېرمې په نښه کړې دي.

وزارت ویلي: «د هوايي دفاعي سیستمونو له خوا څلور هدایت شوي هوايي بمونه او ۳۰۰ بې‌ پیلوټه الوتکې راغورځول شوې دي».

ټرمپ له پوتین سره د الاسکا تر غونډې وروسته د اوکراین ولسمشر ولادیمیر زیلینسکي ته ویلي، که اوکراین د دونتیسک ټولې سیمې روسیې ته وروسپاري، دی به جګړه ودروي.

خو زیلینسکي دا غوښتنه رد کړه او ویې ویل: «دوژنو درول د جګړې درولو لومړی پړاو دی». ټرمپ پر خپل ټروت سوشل ولیکل: «تر ټولو ښه لاره د سولې تړون دی، نه یوازې اوربند، ځکه ډېر وختونه داسې شوي چې اوبند دوام نه کوي».

ټرمپ فاکس نیوز ته ویلي: «زه فکر کوم موږ له روسیې سره جوړجاړي ته نږدې شوي یو. اوکراین باید دې جوړجاړي ته غاړه کېږدي، خو دا هم کېدای شي چې و یې نه مني».

پوتین د زیلینسکي په اړه څه نه دي ويلي، خو په الاسکا کې د خبرو په اړه یې د ټرمپ دریځ وستایه.

د پاکستان د هوا پېژندنې ادارې د اټکل له مخې د دغه هېواد تر واک لاندې کشمیر، ګلګيت بلتستان، پښتونخوا، پنجاب، سیند او بلوچستان کې سخت اورښتونه وشي، چې د ناڅاپي سېلونو او غرنیو سیمو د ښویېدو کواښ ورسره تړلی دی.

د دې ادارې د اټکل له مخې د پاکستان لوی ښارونه هم د سېلاب له ګواښ سره مخ دي، لکه اسلام‌اباد، لاهور، کراچي، پېښور او ګوجرانواله.

د پنجاب د افتونو د مخنیوي ادارې د دې ایالت د څو ولسوالیو خلکو ته سپارښتنه کړې، چې د سیندونو له غاړو او خوړونو څخه لیرې اوسي او تفریحي ځایونو ته دې هم نه ځي.