د طالبانو ویاند ذبیح الله مجاهد له انګرېزانو څخه د افغانستان د خپلواکۍ په مناسبت اعلامیه خپره کړې او خلکو ته یې مبارکي ورکړې ده. که څه هم په دغه اعلامیه کې د افغانانو سرښندنې یادې شوې دي؛ خو د غازي امان الله خان یادونه پهکې نهده شوې.
ښاغلي مجاهد نن سېشنبه (د زمري ۲۸مه) پر اېکس پاڼه لیکلي، چې «افغانانو ۱۰۶ کاله مخکې په همدې ورځ د انګرېزانو د استعمار پر وړاندې جهاد اعلان کړ؛ تر ډېرو سرښندو وروسته انګرېزان مجبور شول، چې افغانستان د خپلواک دولت په توګه په رسميت وپېژني.»
په اعلامیه کې په افغانستان کې د شوروي اتحاد او امریکایانو د ماتې یادونه هم شوې ده.
مجاهد له ځوانانو غوښتي، چې د «خپلو اسلافو او مخکينينو مشرانو» پر پله ولاړ شي او د هر ډول یرغل پر وړاندې ودرېږي.
که څه هم (د زمري په ۲۴مه) نېټه طالبانو د دویم ځل لپاره د واک ترلاسه کولو په مناسبت جشن جوړ کړی او د خپل مشر عکسونه یې پر موټرونو او دېوالونو ځړولي وو؛ خو (د زمري د ۲۸مې) په مناسبت هیچا ته اجازه نه ورکول کېږي، چې په بازارونو، او ان دا چې خپلو کورونو پر دېوالونو د غازي امان الله خان عکس راوځړوي او یا د افغانستان ملي بېرغ ورپوي او له ځانونو سره یې ولېږدوي.
