په ایران کې د افغانانو د اعدامونو زیاتېدل؛ یوازې په تېرو ۸ میاشتو کې ۴۶ افغانان اعدام شوي
د ههنګاو په نوم د بشري حقونو سازمان د دوشنبې په ورځ (د زمري ۲۷مه) راپور ورکړی، چې ایران په تېرو اتو میاشتو کې ۸۰۰ کسان اعدام کړي، چې ۴۶ تنه یې افغانان دي.
د ههنګاو په نوم د بشري حقونو سازمان د دوشنبې په ورځ (د زمري ۲۷مه) راپور ورکړی، چې ایران په تېرو اتو میاشتو کې ۸۰۰ کسان اعدام کړي، چې ۴۶ تنه یې افغانان دي.
د دغه سازمان د راپور له مخې، دا شمېرې ښيي چې په اوسط ډول هره میاشت ۱۰۰تنه اعدام شوي او د دغو اعدام شویو افغانانو د هویت او تورونو په اړه لا تر اوسه جزییات نه دي خپاره شوي.
په ورته مهال، د «حالوش» بشري حقونو خبري اژانس راپور ورکړی چې لږ تر لږه اووه افغانان د یکشنبې په ورځ (د زمري ۲۶مه) د اعدام د حکم د عملي کېدو لپاره د بندرعباس مرکزي زندان قرنطین ته لېږدول شوي دي.
د راپور له مخې، د دوی کورنۍ نه د اعدام له دقیق وخت خبر شوي او نه هم د وروستۍ لیدنې اجازه ورکړل شوې ده.
په نوملړ کې د دوو محکومینو نومونه خپاره شوي، چې عبدالرووف نورزی د نیمروز اوسېدونکی او عبدالرحمان اسحاقزی د فراه اوسېدونکی دی. د پاتې پنځو کسانو په اړه جزییات نه دي ورکړل شوي.
تر اوسه د ایران قضایي چارواکو د دغو قضیو په اړه هېڅ څرګندونې نه دي کړي او دا هم روښانه نه ده چې دغه کسان په کومو تورونو په اعدام محکوم شوي دي.
په راپور کې راغلي، ډېری افغانان په ایران کې د درنو تورونو لکه د مخدره موادو د قاچاق له امله نیول کېږي او د عادلانه محاکمو پرته او بې له دفاعي وکیل څخه محکومېږي.
د بشري حقونو د ایران سازمان په تېر کال (۱۴۰۳لمریز کال) کې اعلان کړی و،چې د طالبانو له واکمنېدو وروسته په ایران کې د افغانانو د اعدام کچه لوړه شوې ده.
د هغوی د معلوماتو له مخې، یوازې په ۲۰۲۴کال کې لږ تر لږه ۸۰ افغانان په ایران کې اعدام شوي، چې دا شمېر د ۲۰۲۳کال په پرتله درې برابره ډېر دی.
