د افغانستان د سولې لپاره د امریکا پخواني ځانګړي استازي زلمي خلیلزاد په پاکستان کې د افغان فعالانو د جوړېدونکي کنفرانس په اړه لیکلي: «د پاکستان موخه خپلواک، ازاد، متحد او پیاوړی افغانستان نه دی، بلکې برعکس ده. د افغانستان په اړه یې سابقه وګورئ.»
د افغانستان د سولې لپاره د امریکا پخواني استازي زلمي خلیلزاد د چهارشنبې په ورځ (د زمري ۲۹مه) پر اېکس پاڼې په پاکستان کې د افغانستان په اړه د جوړېدونکي کنفرانس په اړه لیکلي: «زه ستاسو دا حق منم، چې د خپلو عقایدو ملاتړ وکړئ، په حقیقت کې زه هم د افغانستان د اوسني وضعیت او اوسنیو چارواکو په اړه ستاسې له ډېرو اندېښنو سره موافق یم.»
د نوموړي په وینا، د پاکستان د ISI موخه جوړ او پیاوړی افغانستان نه دی، بلکې برعکس ده.
نوموړي د هغو افغانانو دريځ ستایلی، چې د شفافیت د نشتوالي له کبله یې په دې کنفرانس کې ګډون رد کړی.
خلیلزاد ویلي: «دا کنفرانس چې په اوسني شکل جوړ شوی، د وطن پالو افغانانو لپاره مناسب ځای نه دی.»
هغه غوښتنه کړې، چې ورته کنفرانس باید په خپلواک ډول افغانان په یو بل ځای کې جوړ او تنظیم کړي.
نوموړي په پاکستان کې دغه کنفرانس د شک او شبهې تر سیوري لاندې یاد کړی او زیاته کړې یې ده: «زه باور نه لرم چې تاسو به وغواړئ د ای اېس ای ټاپه دې ستاسې پر تندي وي.»
د افغانستان د اسلامي وحدت ګوند مشر محمد محقق دوې ورځې مخکي ویلي و، چې زلمی خلیلزاد د افغانستان د اوسني وضعیت اصلي لامل او د تېرو کلونو د هدفمندو وژنو او ګډوډيو مسوول دی.
د نوموړي په خبره، خلیلزاد په پاکستان کې د ښځو د جوړېدونکي کنفرانس مخالفت کړی.
د راپورونو له مخې، دغه غونډه به په پاکستان کې د ماریا سلطان په مشرۍ د سوېلي اسیا د سټراټیژیک ټیکاو انسټیټویټ په کوربتوب ترسره شي.
ویل کېږي، چې په دې غونډه کې زلمي خلیلزاد ته هم د مېلمه په توګه د ګډون بلنه ورکړل شوې؛ خو زلمي خلیلزاد له دې مخکې پر دغه غونډه نیوکې کړي او ویلي یې دي، چې دا غونډه د پاکستان استخباراتي ادارې (ای اېس ای) له لوري جوړېږي.
