د طالبانو تر کنټرول لاندې د افغانستان بانک وایي، د افغانستان بانک او ماليې وزارت ترمنځ د سوداګریزو بانکونو له لارې د عامه پروژو د تمویل یو نوی میکانیزم لاسلیک شوی، چې له مخې یې سوداګریز بانکونه کولای شي د ټولګټو پروژو په تمویل او تطبیق کې ونډه واخلي.
د افغانستان بانک د پنجشنبې په ورځ وویل، چې یاد میکانیزم د اقتصادي کمېسیون د کاري طرزالعمل د دویمې مادې د پنځمې فقرې پر اساس ترتیب شوی، چې له مخې به یې سوداګریز بانکونه وکولای شي د ټولګټو پروژو په تمویل او تطبیق کې ونډه واخلي.
د افغانستان بانک د دغه میکانیزم موخې په ټولګټو پروژو کې د پانګونې او ونډې اخیستلو قانوني اسانتیاوي برابرول، په کور د ننه د سوداګریزو بانکونو لپاره د پانګونې فرصتونه رامنځته کول، د خلکو لپاره د دندو رامنځته کول او اقتصادي تحرک ښودلی.
د افغانستان بانک زیاتوي چې د یاد میکانیزم له مخې به د مالیې وزارت له اړوندو سکټوري ادارو ټولګټې پروژې ترلاسه کوي او د هغوی مالي موډلونه به ترتیبوي او د افغانستان بانک به سوداګریز بانکونه په دغو پروژو کې تمویل او پانګونې ته هڅوي.
د افغانستان بانک په دې باور دی چې د یاد میکانیزم عملي کېدل به د هېواد د اقتصادي ودې او ټولنیز پرمختګ لامل شي او د سوداګریزو بانکونو لپاره به د نویو پانګونو فرصتونه رامنځته کړي.
