د افغانستان لپاره د سعودي عربستان سفارت اعلان کړی چې د ملک سلمان د بشري مرستو او خیریه چارو مرکز د «نور سعودي» د سترګو درملنې کمپاین دویم پړاو په کابل کې پیل شوی او د اګست پر ۲۹ مه په ننګرهار کې هم پیلیږي. د کمپاین موخه د نابینایۍ او د سترګو ناروغیو مخنیوی او درملنه ده.
د سعودي سفارت په ایکس لیکلي، چې د «نور سعودي» دا وړیا کمپاین د البصر خیریه بنسټ په همکارۍ ترسره کېږي.
د دوی د معلوماتو له مخې، د پروګرام په دوهم پړاو کې به په لسګونو ډاکټران او تخنیکي کارکوونکي برخه واخلي او سلګونه افغان ناروغان به د سترګو د درملنې او وړیا عملیاتو له خدمتونو برخمن شي.
د سفارت په وینا، لومړنی کمپ په کابل ولایت کې د ۲۰۲۵ کال د اګست له ۲۴مې تر ۲۸مې نېټې پورې ترسره کېږي. دوهم کمپ به بیا د ننګرهار په ولایت کې د اګست له ۲۹مې نېټې تر د سپتمبر ۴مې پورې د ناروغانو لپاره پرانېستل کېږي.
د ملک سلمان د بشري مرستو مرکز له دې وړاندې هم د افغانستان په بېلابېلو ولایتونو کې د روغتیايي، ښوونیزو او بیړنیو مرستو پروګرامونه پلي کړي دي.
