د جرمني فدرالي څارنوالۍ د هغه ۲۴ کلن افغان موټر چلوونکي پر ضد د قتل تورونه لګولي چې د فبروري پر۱۳مه یې د یوې صنفي اتحادیې د لاریون پر غړو موټربرید کړی و. ددغه برید له امله دوه تنه وژل شوي وو او ۴۴نور ژوبل وو.
د جرمني فدرالي څارنوالۍ ویلي چې برید «د مذهبي لاملونو له مخې ترسره شوی و» او بریدګر د اسلامي هیوادونو د خلکو د کړاو په ځواب کې د جرمني پر خلکو برید کړی و. همدارنګه هغه د جدي بدني زیان رسونې په تور هم تورن شوی.
څارنوالۍ دا پېښه د ازاد او دیموکراتیک بنسټیز نظم پر ضد برید ګڼلی دی.
مظنون فرید نوري لاهم په توقیف کې دی او د مونشن عالي سیمه ییزه محکمه به پرېکړه وکړي چې ایا تورونه ومنل شي او د محاکمې نېټه وټاکل شي که نه.
څارنوالانو ویلي چې بریدګر له اسلامي دولت (داعش) یا کومې ترهګریزې شبکې سره اړیکه نه لري او برید یې یوازې د مذهبي موخو پر بنسټ ترسره کړی و. د پېښې پر مهال هغه الله اکبر ویلي و او وروسته یې دعا هم کړې وه.