د طالبانو د صنعت او سوداګرۍ وزیر نورالدین عزیزی د خصوصي سکتور ملي ناستې ته ویلي چې کوچني او منځني تشبثات د افغانستان د اقتصاد بنسټ جوړوي. عزیزي په دې ناسته کې ټینګار کړی، چې تر ۸۰ سلنې زیات اقتصادي او تجارتي فعالیتونه د همدغو تشبثاتو له لارې ترسره کېږي.
دغه ناسته نن د سې شنبې په ورځ د اروپايي اتحادیې په مالي ملاتړ جوړه شوې وه، چې پکې د نورالدین عزیزي ترڅنګ د طالبانو د اقتصاد وزارت مرستیال عبداللطیف نظري، د ملګرو ملتونو د سرمنشي استازې روزا اوتونبایېوا، یو شمېر ډېپلوماټانو، سوداګرو او د خصوصي سکتور فعالانو ګډون کړی و.
د طالبانو د صنعت او سوداګرۍ وزارت له لوري خپره شوې خبرپاڼه کې راغلي چې عزیزي په دې ناسته کې، ټینګار وکړ چې تر ۸۰ سلنې زیات اقتصادي او تجارتي فعالیتونه د همدې تشبثاتو له لارې ترسره کېږي.
په خبرپاڼه کې راغلي، عزیزی دغې ناستې ته په وینا کې وویل:«د طالبانو د مشر د حکم پر اساس به د تشبثاتو د مرکزونو د جوړولو لپاره په ښارونو کې له ۱۰ تر ۵۰ جریبه ځمکه د ملي او نړیوالو معیارونو په پام کې نیولو سره ځانګړې شي.»
نوموړي زیاته کړې چې وزارت یې د تشبثاتو د ودې لپاره لارنقشه برابره کړې او د ظرفیت لوړولو پروګرامونه به پېل کړي څو کوچني کاروبارونه لویو سوداګریزو برخو ته وده ورکړي.
نورالدین عزیزي دغې ناستې ته په وینا کې ویلي چې د اسنادو مالي او ګمرکي سیسټمونو د انلاین کېدو ترڅنګ، د کرنیزو صنعتونو، بېرته نوې کېدونکې انرژۍ، معدنونو او ټکنالوژۍ په برخو کې هم د تشبثاتو ملاتړ ته پلانونه جوړ شوي دي.
د طالبانو له بیا ځلې واکمنېدو وروسته، د افغانستان اقتصادي وضعیت تر سخت فشار لاندې دی.
د نړیوالو بانکونو او موسسو راپورونه ښيي چې کوچني او منځني تشبثات د خلکو د ژوند اصلي سرچینه ده، خو د نړیوالو بندیزونو، د پانګې کمښت او د بانکي سیستم محدودیتونو له امله، د ودې او پراختیا چانسونه یې محدود شوي دي.
