د امریکا ولسمشر ډونالډ ټرمپ د دوشنبې په ورځ د هغو ۱۳ امریکايي سرتېرو د څلورم تلین په مراسمو کې ګډون وکړ، چې د ۲۰۲۱کال په اګست میاشت کې له افغانستانه د وتلو پر مهال وژل شوي وو. ټرمپ د وژل شویو سرتېرو د درناوي په اړه یو فرمان هم لاسلیک کړ.
اې پي خبري اژانس سېشنبه (د وږي ۴مه) لیکلي، چې ټرمپ د قربانیانو د شاوخوا ۳۵ خپلوانو په مخکې د امریکا پخواني ولسمشر جو بایډن ته ګوته ونیوله او د ۲۰۲۱کال د اګست میاشتې ۲۶مې نېټې پېښه یې د امریکا په تاریخ کې تر ټولو «احمقانه» ورځ وبلله.
په دې برید کې د کابل هوايي ډګر (ابي ګېټ) مخې ته تر ۱۰۰ډېر افغانان هم وژل شوي وو.
د بایډن ادارې له افغانستانه د امریکايي سرتېرو د وتلو هغه مهالوېش عملي کاوه، چې د ټرمپ پخوانۍ ادارې له طالبانو سره ټاکلی و. د ۲۰۲۲کال یو راپور څرګنده کړه، چې د دواړو حکومتونو پرېکړو د افغان پوځ نسکورېدو او طالبانو د واکمنۍ لامل شوې.
دا پېښه اوس هم په امریکا کې د سیاسي لانجو یوه برخه ده. تېر کال په اوارلینګټن ملي هدیره کې د دغه پېښې د یاد مراسم جنجالي شول.
په هرات ولایت کې ځايي سرچینې وایي، چې وړمه شپه یو کس د دغه ښار د باغنظرګاه په سیمه کې خپله مور، مېرمن او لور په چړې وژلې او وروسته تښتېدلی دی. په قربانیانو کې یوه ۱۱ کلنه ماشومه هم شامله ده.
د وژل شویو کسانو د ګاونډي په وینا؛ تر دې پېښې مخکې د کورنۍ د غړو تر منځ لفظي شخړه شوې وه.
که څه هم پر دې پېښې تر ۲۴ ساعتونو ډېر وخت اوښتی؛ خو طالبانو لا تر اوسه په دې اړه څه نهدي ویلي او نه هم د قاتل په اړه څه ویل شوي دي.
وژل شوي کسان پرون په هرات ښار کې خاورو ته وسپارل شول.
په روان کال (غبرګولي میاشت) کې هم د هرات په ادرسکن ولسوالۍ کې یو کس خپله مېرمن، مور او پلار وژلي وو. طالبانو هغه وخت ویلي وو، چې د پېښې عامل نیول شوی دی.
د برېتانیا د ښي اړخي «رفرم یوکي» ګوند مشر نایجل فراج وايي، که واک ته ورسېږي غواړي چې له افغانستان او اریتریا سره د کډوالو د بېرته ستنولو تړونونه وکړي او همداراز به د کډوالو د اېستلو لپاره ورځنۍ الوتنې تنظیم کړي.
فراج دغه څرګندونې په داسې حال کې کوي، چې د برېتانیا حکومت د دوشنبې په ورځ د خپرو شویو رسمي معلوماتو له مخې ویلي، چې د روان کال له پیل څخه تر اوسه «۲۸ زره او ۷۶» کډوال د وړو بېړیو له لارې د مانش کانال څخه برېتانیا ته رسېدلي دي.
دا شمېر د ۲۰۲۴کال د همدې مودې په پرتله «۴۶سلنه» زیاتوالی ښيي او د لومړي وزیر کېير سټارمر پر حکومت د کډوالۍ په اړه نوی فشار زیاتوي.
د کډوالو یاد شمېر د یکشنبې په ورځ د ریکارډ کچې ته ورسېد، کله چې «۲۱۲ کسان» په څلورو بېلابېلو بېړیو کې برېتانیا ته ننوتل.
دا په داسې حال کې ده، چې په همدې ورځ بیا په دغه هېواد کې د کډوالۍ پر ضد پراخ لاریونونه هم وشول. دغو لاریونونو تر هغه وروسته زور واخیست، چې یوې محکمې په ایپینګ سیمه کې د یوه هوټل د خالي کولو پرېکړه وکړه چې پناه غوښتونکي پکې مېشت وو.
د کارګر ګوند حکومت ژمنه کړې، چې تر ۲۰۲۹کال پورې د پناه غوښتونکو د ځای پر ځای کولو لپاره د هوټلونو کارول بند کړي او د پناه غوښتنې بهیر ته اساسي بدلون ورکړي.
تېره ورځ حکومت اعلان وکړ، چې د استیناف بهیر به ګړندی کړي او د شاوخوا ۱۰۰زره ځنډول شویو دوسیو د حل لپاره به اقدامات وکړي.
د برېتانیا د کورنیو چارو وزیرې «یویټ کوپر» ویلي، چې دغه اصلاحات به د هغه سیسټم د بیا رغولو هڅه وي، چې اوس په بشپړ ګډوډي کې دی.
خو بلخوا بیا نایجل فراج د «ډله ییز اېستلو» پر پلان ټینګار کوي. د هغه وړاندیزونو کې د برېتانیا د اروپايي بشري حقونو له کنوانسیون څخه وتل، د پناه غوښتنو بندول او د ۲۴زره کسانو د ساتلو لپاره د توقیف مرکزونو جوړول شامل دي.
د طالبانو له پېښو سره د مبارزې د چمتووالي ادارې سرپرست نورالدین ترابي له «اکتید» موسسې سره د څه باندې یو میلیون ډالرو په ارزښت د ګډو همکاریو د یوې هوکړې د لاسلیک پر مهال له موسسو وغوښتل، چې خپل اداري لګښتونه راکم کړي ترڅو ورسره ډېر کسان د مرستو تر پوښښ لاندې راشي.
نورالدین ترابي د دوشنبې په ورځ (د وږي ۳مه) د اکتید نړۍوالې موسسې له عمومي رييس هنس جوهانس سره په کتنه کې وویل، افغانان په بېلابېلو برخو کې مرستو ته اړتیا لري او زیاته یې کړه: «له موسسو غواړو چې د خپلو اداري لګښتونو کچه راکمه کړي او له مرستو د ګټې اخیستونکو شمېر زیات کړي.»
د دغې ادارې د خبرپاڼې له مخې، د اکتید نړۍوالې موسسې عمومي رييس هنس جوهانس په دې کتنه کې ژمنه وکړه، چې په دې هوکړه کې به هېڅ ډول ناغیړي ونه کړي او دا به په شفاف ډول او پر وخت عملي کړي.
تر دې مخکې هم پر نړۍوالو مرستندویه بنسټونو ګڼې نیوکې شوي چې د مرستو ډېره برخه د لوړو معاشونو په ګډون پر خپلو اداري چارو لګوي او د مرسته شویو لږه برخه تر اړمنو کسانو رسول کېږي.
د یادونې وړ ده، چې د لاسلیک شوې هوکړې له مخې چې ټول ارزښت یې څه باندې یو میلیون او ۷۷ زره ډالرو ته رسېږي، اکتید موسسه به په بلخ، تخار، کندوز، بغلان او ننګرهار ولایتونو کې د هغو ۱۰۰۰ کورنیو لپاره چې د طبیعي پېښو له امله زیانمن شوي او دمګړی د خوړو له نشتوالي سره مخ دي، د دوو کلونو په ترڅ کې په لومړي کال کې پر ۵۰۰ کورنیو او په دویم کال کې پر پاتې۵۰۰ کورنیو هرې کورنۍ ته ۳۰۰ډالره نغدي مرستې ووېشي.
له دې سربېره به یاده موسسه له تمویل کوونکو سره د معلوماتو شریکولو لپاره د هېواد په ۳۴ ولایتونو کې په بازارونو کې د خوراکي توکو د بیو د ارزونې، خوراکي توکو ته د خلکو د لاسرسي د معلومولو، له مرستندویه موسسو او په ځانګړې توګه له اوچا سره د بېړنیو حالاتو پر مهال د مرستو د همغږۍ د پروسې پیاوړتیا، د څارنیزو فعالیتونو ترسره کولو، له نورو ادارو سره یې شریکول او د بشري مرستو په پلان کې د ځای پرځای کولو لپاره د بېړنیو اړتیاوو ارزونه او له خطر سره د مخ سیمو تثبیتولو په تړاو هم کار وکړي.
د ORCD GLOBAL موسسې مسوولین وايي، غواړي چې د افغانستان په ۳۴ ولایتونو کې د سېلابونو له امله د زیانمنو او له خطر سره د مخ سیمو په اړه یو مستند فلم جوړ کړي. دغه موسسې د دې فلم د جوړولو موخه افغانستان ته د زیاتو مرستو راجلبول بللي دي.
د ORCD GLOBAL د خوندیتوب او څارنې متخصص عبدالله د دوشنبې په ورځ (د وږي ۳مه) د طالبانو له پېښو سره د مبارزې د چمتووالي ادارې له سرپرست نورالدین ترابي سره په کتنه کې له دغې ادارې وغوښتل، چې په افغانستان کې د زیانمنو او له خطر سره د مخ سیمو معلومات ورسره شریک کړي، ترڅو یاد مستند فلم ډېر ژر بشپړ شي.
عبدالله زیاته کړه: «د دغه مستند فلم له بشپړېدو وروسته هغه د لا ډېرو مرستو د راجلبولو لپاره د ملګرو ملتونو بنسټونو او ډونرانو ته استوو.»
د طالبانو له پېښو سره د مبارزې د چمتووالي ادارې سرپرست نورالدین ترابي په دې کتنه کې وویل، افغانستان له هغو هېوادونو دی چې ډېرې سیمې یې د سېلابونو له امله له خطر سره مخ دي.
نوموړي د یاد مستند فلم د جوړولو په برخه کې د هر ډول همکاریو له ژمنې سربېره زیاته کړه: «د پېښو په اړه د فلم او مستند جوړول خورا ارزښت لري، ځکه چې نور هېوادونه او مهم بنسټونه چې په دې برخه کې کار کوي، په جریان کې راځي.»
په داسې حال کې چې د طالبانو د مشر په ګډون ځیني نور چارواکي په غونډو او کنفرانسونو کې د خپل عکس یا ویډیو اخیستلو ته اجازه نه ورکوي او همداراز د هېواد په ډېریو ولایتونو کې د عکس او یا هم ویډیو اخیستل منع دي، خو دا چې په یوه ډول نه یوه ډول سره طالبانو ته پیسې رارسېږي، نو یاده ډله بیا د فلم او مستند جوړولو په برخو کې د هر ډول همکاریو ټټر وهي.
پاکستانۍ ورځپاڼه «ډیلي ټایمز» وایي، چې افغانستان د طالبانو تر څلور کلنې واکمنۍ لاندې د ترهګرۍ او نشه يي توکو په ګډه مافیایي لوبه کې ښکېل دی. دا ورځپاڼه زیاتوي، که نړۍ چوپ پاتې شي، دا هېواد به د نړۍوال امنیت د اوږدمهاله ګواښونو په مرکز بدل شي.
یادې ورځپاڼې په خپله مقاله کې لیکلي، لومړی او تر ټولو مهم عامل د امنیت خراب وضعیت دی، د طالبانو له بېرته راتګ وروسته افغانستان د څو سخت دریځو ډلو په پټنځای بدل شوی، چې تر ټولو مشهور یې داعش خراسان، القاعده او د پاکستاني طالبانو تحریک «ټي ټي پي» دي.
سره له دې چې طالبان د ترهګرۍ پر وړاندې د مبارزې ژمنې کوي، خو تر اوسه یې د دغو ډلو د مهار کولو لپاره پرېکنده اقدام نهدی کړی. څېړونکي وايي، دا حالت پر دې دلالت کوي چې یا خو طالبان یوازې په خبرو ژمنې کوي او یا هم په رښتیا سره د دغو ډلو د کنټرول توان نهلري.
پاکستانۍ «ډیلي ټایمز» ورځپاڼه زیاتوي، چې له ترهګرۍ سره تړلې بله جدي ستونزه د نشه يي توکو کاروبار دی.
د ملګرو ملتونو د نشه يي توکو او جرمونو پر وړاندې د مبارزې دفتر (UNODC) د راپور له مخې، افغانستان اوس د مېتامفېټامین د تولید یو نوی مرکز ګرځېدلی او دا کاروبار له دودیزو افیوني بازارونو ډېر پراخ شوی دی.
که څه هم د طالبانو د واکمنۍ په لومړیو کې د کوکنارو د کښت او صادارتو په کمېدو راپورونه خپاره شول، خو د ۲۰۲۴کال شمېرې ښيي چې د کوکنارو تولید بیا ۱۹سلنه ډېر شوی دی. دا نه یوازې ټولنیزې ستونزې زېږوي، بلکې د ترهګرو مالي سرچینې هم پیاوړې کوي. د نشه یي توکو قاچاق کوونکي په بدل کې ترهګرو ډلو ته د پیسو ترڅنګ د لوژستیکي ملاتړ لپاره هم تکیه کوي.
د ترهګرو ډلو او د نشه يي توکو مافیا اړیکه د «نارکو تروریزم» په نوم یادېږي. ترهګر د قاچاقبرو لپاره د وسله والو او جنګیالیو مرسته برابروي او په بدل کې د هغوی له مالي ملاتړ او نشه يي موادو ګټه اخلي.
ځیني راپورونه ښيي، چې د پاکستاني طالبانو تحریک «ټي ټي پي» له خوا د ځانمرګو بریدونو لپاره روزل کېدونکي کسان ځانګړې درمل ترلاسه کوي، څو د ځانمرګي برید ترسره کولو ته چمتو شي.
د ښځو د حقونو سیستماتیک محدودیتونه د طالبانو پر حکومت یوه بله ستره نړۍواله نیوکه ده. د ملګرو ملتونو د ښځو سازمان په یوې څېړنه کې افغانستان له یمن وروسته د ښځو د ځواکمنېدو او د جنسیتي برابرۍ له پلوه د نړۍ دویم تر ټولو کمزوری هېواد بللی دی. اوسمهال افغان ښځې او نجونې له شپږم ټولګي پورته زدهکړو څخه محرومې دي، له ګڼو ټولنیزو ځایونو اېستل شوي او ډېرو مسلکونو او کارونو ته نه پرېښودل کېږي. که څه هم طالبان دا محدودیتونه د اسلامي شریعت په نوم توجیه کوي، خو ګڼ اسلامي عالمان یې د اسلام له اصلي روح سره په ټکر کې بولي.
شنونکي وایي، چې د ترهګرۍ، نشه يي توکو او د ښځو د حقونو سرغړونې ګډ ترکیب اوس یوازې د افغانستان سیمه ییزه ستونزه نه ده، بلکې د نړۍوال امنیت لپاره په یوه لوی ګواښ بدلېدونکې ده.
که نړۍواله ټولنه د افغانستان د وضعیت پر وړاندې چوپ پاتې شي، دا هېواد به د اوږدمهاله بېثباتۍ او د نړۍوال امنیت د ګواښونو په یوه مرکز بدل شي.
څلور کاله وروسته له هغه چې طالبان بیا واک ته ورسېدل، افغانستان د بېلابېلو لاملونو له کبله په چټکۍ سره د کړکېچ او ګډوډۍ پر لور روان دی.
دغه راپور په داسې حال کې خپرېږي، چې د ملګرو ملتونو امنیت شورا بیا تېره میاشت په خپل راپور کې خبرداری ورکړ، چې طالبانو د واک تر بشپړ نیولو وروسته په افغانستان کې څو نړۍوالو ترهګرو ډلو ته د فعالیت لپاره خوندي او ارامه فضا برابره کړې ده.
په راپور کې راغلي، چې که څه هم طالبان ادعا کوي چې له ترهګرو ډلو سره یې اړیکې پرې کړي، خو عملي توګه یې دغو ډلو لکه داعش، القاعده، د پاکستاني طالبانو تحریک، د ترکستان ختیځ اسلامي غورځنګ، اسلامي ترکستان ګوند، تاجکستان انصارالله ډلې او نورو سخت دریځو ته په افغانستان کې د فعالیت اجازه ورکړې ده.
ملګرو ملتونو ټینګار کړی، چې دغه ډلې په شمالي او ختيځو سیمو کې مېشت دي او نه یوازې د بهرنیو جنګیالیو جلب جذب کوي، بلکې د روزنې، استخدام او د افغانستان له پولو بهر د بریدونو په پلان جوړولو هم بوختې دي.
همدارنګه القاعده که څه هم سختې ضربې لیدلي، خو بیا یې هم د طالبانو سره خپل روزنیز او همغږي فعالیتونه روان ساتلي دي.
طالبانو بیا تل دغه تورونه رد کړي دي.
د طالبانو ویاند ذبیح الله مجاهد همدا تېره اوونۍ په افغانستان کې د ترهګرو ډلو د فعالیت اړوند د ملګرو ملتونو د امنیت شورا اندېښنې رد کړې. نوموړي ویلي، چې اوسمهال هېڅ ترهګره ډله په افغانستان کې شتون نه لري.