د طالبانو سوداګرۍ وزارت ویلي، د دې ډلې د سوداګرۍ وزیر په کابل کې د ایران له سفیر علي رضا بیکدلي سره افغانستان ته د یاد هېواد د یوه لوړپوړي پلاوي د سفر د همغږۍ په موخه لېدلي. د ایران د سوداګرۍ وزیر په مشرۍ پلاوی له طالبانو سره د سوداګرۍ کچې لوړولو په موخه کابل ته ځي.
طالبانو ویلي، چې د ایران د صنعت، کانونو او سوداګرۍ وزیر په مشرۍ به ایرانی پلاوی افغانستان ته سفر وکړي او د دواړو هېوادونو د اقتصادي، سوداګریزو، کانونو او نفتو ګډه ناسته به د دوغارون پر پوله ترسره شي.
افغانستان ته د ایراني پلاوي د سفر د کره نیټې په اړه جزییات نه دې ورکول شوي.
د طالبانو د سوداګرۍ وزارت په خبرپاڼه کې ویل شوي، چې د ایران له سفیر سره یې یاد هېواد ته د افغانستان د پنبې صادراتو او او پروسس د زیاتوالي، د کاني موادو او ایران د پنبې په برخه کې د افغان سوداګرو د سفر د همغږۍ په اړه هم خبرې کړې دي.
