د زلزلهځپلو لپاره د هند د بېړنیو مرستو لومړۍ جوپه کابل ته ورسېده
د هند حکومت د افغانستان د وروستۍ زلزلې له امله د رامنځته شوي ناورین د اغېزو د کمولو په موخه د بېړنیو بشري مرستو لومړۍ جوپه کابل ته ولېږله.
د هند حکومت د افغانستان د وروستۍ زلزلې له امله د رامنځته شوي ناورین د اغېزو د کمولو په موخه د بېړنیو بشري مرستو لومړۍ جوپه کابل ته ولېږله.
د هند د بهرنیو چارو وزارت په وینا، دغه ۲۱ ټنه مرستې نن د هوا له لارې په یوه الوتکه کې کابل ته رسېدلې دي.
په دې مرستو کې کمپلې، خیمې، د حفظالصحې کېټونه، د اوبو د زېرمه کولو وسایل، جنراتورونه، د پخلنځي لوښي، اوبه پاکوونکې دستګاوې، د خوب کڅوړې، اړین درمل، ویلچیرونه، لاس پاکوونکي مایعات، د اوبو پاکولو درمل او نور طبي توکي شامل دي.
هند ټینګار کړی، چې د افغانستان د زلزلهځپلو خلکو د مرستې بهیر به یوازې په دې مرستو محدود نه وي، بلکې په راتلونکو ورځو کې به د وضعیت د ارزونې له مخې نورې بشري مرستې هم واستول شي.
دغه بشري مرسته په داسې حال کې کابل ته رسېږي، چې د شنبې او یکشنبې د شپې په خونړۍ زلزله کې په سلګونو کسان مړه او زرګونه نور ټپیان او بېکوره شوي دي.
د طالبانو د چارواکو په وینا، یوازې په کونړ ولایت کې په سلګونو کورونه ویجاړ شوي او د مرستو رسول له جدي ستونزو سره مخ دي.
