د طالبانو د کورنیو چارو وزیر سراجالدین حقاني هبتالله اخوندزاده ته په ټلیفوني اړیکه کې ویلي، چې زلزلهځپلو سیمو او کورنیو ته لا هم نغدي مرستې نه دي رسېدلي. نوموړي هبتالله ته ویلي، چې خلک بېړنۍ مرستې ته اړتیا لري.
د طالبانو د کورنیو چارو وزیر سراج الدین حقاني د پنجشنبې په ورځ (د وږي ۱۳مه) د طالبانو له مشر هبتالله اخوندزاده سره په ټلیفوني خبرو کې ویلي، چې د یو شمېر زلزلهځپلو سیمو څخه یې لیدنه کړې.
نوموړي ویلي، چې د دوی لومړنۍ یو شمېر مرستې رسېدلي خو بسنه نه کوي.
حقاني هبتالله ته ویلي: «خیمو او بسترونو ته ډېر ضرورت و، د زلزلې ټکانونه اوس هم دوام لري، نغدي مرسته نه ده رسېدلې او عاجل ضرورت شته.»
حقاني د سیمې خلکو او زلزلهځپلو کورنیو ته د خپل مشر هبتالله د تسلیت پيغام هم وړاندې کړی.
