په افغانستان کې شاوخوا ۸۴ زره کسان د وروستۍ زلزلې له امله اغېزمن شوي
د سره صلیب نړۍوال فډراسیون او د سرې میاشتې ټولنې اټکل کړی، چې نږدې ۸۴ زره کسان د افغانستان د وروستۍ زلزلې له امله په مستقیم او غېرمستقیم ډول زیانمن شوي دي.
د سره صلیب نړۍوال فډراسیون او د سرې میاشتې ټولنې اټکل کړی، چې نږدې ۸۴ زره کسان د افغانستان د وروستۍ زلزلې له امله په مستقیم او غېرمستقیم ډول زیانمن شوي دي.
د یوې برېتانوي خیریه موسسې د ارزونې له مخې، د زلزلهځپلو سیمو ۹۸ سلنه کورونه یا په بشپړه توګه ویجاړ شوي او یا هم سخت زیانمن شوي دي.
د طالب چارواکو په وینا، تر دې دمه د دې ناورین له امله ۲۲۰۵ تنه مړه شوي او له ۳۶۴۰ زیات نور ټپیان دي.
د یوې برېتانوي خیریه ادارې «اسلامیک ریلیف ورلډوایډ» د ارزونې له مخې، په دې سیمو کې ۹۸ سلنه کورونه یا په بشپړه توګه ویجاړ شوي یا سخت زیانمن شوي دي.
د سره صلیب نړۍوال فډراسیون او د هلال احمر افغان ټولنه د زلزلهځپلو سیمو انساني وضعیت «ډېر نازک او لا خرابېدونکی» بللی او د خوراکي توکو، درملو او سرپناه د شدید کمښت په اړه یې خبرداری ورکړی دی.
په افغانستان کې د ملګرو ملتونو د بشردوستانه مرستو همغږي کوونکي اېنډریکا راتواته فرانسوي خبري اژانس سره په خبرو کې خبرداری ورکړ، چې وروستۍ زلزله ښايي سلګونه زره خلک اغېزمن کړي.
راپورونه ښيي، چې ځايي مرستندویان د محدودو امکاناتو سره هڅه کوي هغه کسان وژغوري، چې لا تر اوسه د نړېدلو کورونو لاندې بند دي.
له بلې خوا، د ځمکې خوځښت، د غرونو را نړېدل او د کلیو لارو بندېدو له امله ډېرو سیمو ته رسېدل ناممکن شوي دي.
د پراخو ویجاړتیاوو تر څنګ، ناوړه هوايي شرایط او د نړۍوالو مرستو کمښت هم د دې بحران په حل کې ستونزې زیاتې کړې دي.
کارپوهانو او نړۍوالو مرستندویو ادارو ټینګار کړی، چې دا زلزله باید د نړۍوالې ټولنې لپاره د خبرداري زنګ وي.
د ناروې د کډوالو شورا مسوول جاکوپو کاریدي ټینګار کړی، چې افغانستان نشي کولی یوازې د دې سترې فاجعې سره مقابله وکړي او نړۍوالې ټولنې ته اړتیا لري، چې پراخه او دوامداره ملاتړ ورسره وکړي.
