اغا خان بنسټ: د کونړ او ننګرهار ۱۴۸ ټپیان زموږ په روغتیايي مرکزونو کې تر درملنې لاندې دي
د اغا خان بنسټ اعلان کړی، چې د کونړ او ننګرهار ولایتونو له زلزلو تر اوسه ۱۴۸ ټپیان د دوی د روغتیايي مرکزونو له لوري تر درملنې لاندې نیول شوي دي.
د اغا خان بنسټ اعلان کړی، چې د کونړ او ننګرهار ولایتونو له زلزلو تر اوسه ۱۴۸ ټپیان د دوی د روغتیايي مرکزونو له لوري تر درملنې لاندې نیول شوي دي.
دغه بنسټ وايي، په یادو ولایتونو کې له زلزلو وروسته د دوی د پلټنې، ژغورنې او روغتیايي ډلې د پېښو سیمو ته ورسېدل او سمدستي یې خپلې عملیاتي او د لومړنیو مرستو رسونې چارې پیل کړې.
د اغا خان بنسټ د جمعې په ورځ (د وږي ۱۴مه) په یوې اعلامیه کې زیاته کړې، د دوی له لوري له زلزله ځپلو سره په ترسره کړو مرستو کې کېږدۍ، د پخلنځي کڅوړې، روغتیايي او خوراکي توکو بستې شاملې دي.
د دغه بنسټ د مسوولینو په وینا، دا مرستې یې د لارو د خرابوالي له امله غرنیزو سیمو ته د هوا له لارې لېږدول شوي دي.
اغا خان بنسټ زیاته کړې، دمګړۍ هم د دغه بنسټ ګرځنده روغتیایي ډله چې پکې ډاکټران، نرسان او متخصصین شامل دي په کونړ ولایت کې فعالیت لري او امبولانسونه یې هم د ټپیانو په لېږدونه کې همکاري کوي.
د دغه بنسټ د مسوولینو په وینا، د طالبانو په همکارۍ سره ټپیان د هوا له لارې روغتیايي مرکزونو ته لېږدول شوي دي.
د یادونې وړه ده، چې د اغا خان پراختیايي شبکه زلزله ځپلو ته د بېړنیو سرپناه او لنډ مهاله تشنابونو پر جوړولو او همداراز له پلټنې سربېره زلزله ځپلو ته د اوبو او روغتیايي خدماتو پر رسولو بوخته ده.
