د پاکستان پخواني لومړي وزیر او د تحریک انصاف بندي مشر عمران خان له اډیاله زندان څخه په خپل تازه پیغام کې ویلي، چې د افغان کډوالو جبري ایستل په داسې حال کې چې افغانستان د زلزلې له ناورین سره مخ دی، دردوونکی عمل دی. عمران خان ویلي، « زما ژوند د الله په لاس کې دی، نه د عاصم منیر ».
د تحریک انصاف ګوند دغه بندي مشر د افغان کډوالو د ایستنې په تړاو د پوځ د مشر تګلاره په کلکه غندلې ده او پر خپل اېکس یې لیکلي: « دا ډېر دردورونکی دی چې زموږ له څو لسیزې مېلمستیا وروسته اوس زموږ افغان وروڼه جبري له هېواده وشړل شي. په داسې وخت کې چې افغانستان له زلزلې سره مخ دی، موږ باید له هغوی سره مرسته وکړو، نه دا چې له هېواده وایستل شي.»
عمران خان ویلي چې د خیبر پښتونخوا اعلی وزیر علي امین ګنډاپور دې افغانستان ته ولاړ شي او د سولې او امنیت پر سر دې له افغان لوري سره خبرې وکړي.
هغه پوښتنه کړې: «که مریم نواز جاپان او تایلنډ ته سفر کولی شي، ولې د خیبر پښتونخوا اعلی وزیر افغانستان ته د سولې په خاطر سفر نه شي کولی؟»
عمران خان په خپل پیغام کې چې په ایکس یې خپور کړی، څرګنده کړې: «زه د لا اله الا الله په اعلان ایمان لرم. دا کلمه مومن له هر ډول وېرې او غلامۍ ازادوي. زما ژوند د الله په لاس کې دی، نه د عاصم منیر په لاس کې.»
نوموړي زیاته کړې چې له یو نیم کال راهیسې له خپلو سیاسي ملګرو سره د لیدو اجازه نه لري او له یوه کال راهیسې یې ډاکټران هم د ده معاینه کولو ته نه دي پرېښودل شوي.
د هغه په وینا، حتا د کورنۍ غړي او وکیلان یې هم ورسره نه شي کتلی او ورځپاڼو او ټلوېزیوني خپرونو ته لاسرسی یې بند دی.
خان پر پوځ تور پورې کړی چې په ده فشار اچوي او لیکلي یې دي: «هرڅومره فشار چې راباندې واچوې، یا زما د کورنۍ غړي زندان ته واچوې، زه نه تسلیمېږم او نه به دا ظلم ومنم.»
نوموړي د ایکس په پوسټ کې د پښتونخوا په عملیاتو، ډرون بریدونو او د خلکو په جبري بېکوره کولو هم نیوکه کړې ده او ټینګار یې کړی چې دا کار د تحریک انصاف د ولسي حکومت د کمزوري کولو هڅه ده.
د هغه په وینا، «که عملیات ونه درېږي، د خلکو کړاوونه به ډېر شي او ترهګري به نوره هم پراخه شي.»
خان په خپل پیغام کې د پاکستان د وروستیو سېلابونو یادونه هم کړې او پر خلکو یې غږ کړی چې د زیانمنو شویو کورنیو مرسته وکړي.