د ازبکستان د بهرنیو چارو وزارت ویاند احراز برخانوف هغه راپورونه رد کړل چې ګواکې دغه هېواد غواړي د افغانستان د پخواني پوځ چورلکې طالبانو ته ورسپاري. هغه وویل:« دغه راپورونه حقیقت نه لري او د ازبکستان په دریځ کې هېڅ بدلون نه دی راغلی.»
په وروستیو ورځو کې داسې راپورونه خپاره شوي وو چې د ۱۴۰۰ کال په زمري میاشت کې د افغانستان د اسلامي جمهوریت له سقوط وروسته، ازبکستان ته د پخواني حکومت د هوايي ځواک یو شمېر لېږدول شوې چورلکې به «په نېږدې ورځو کې بېرته کابل ته وسپارل شي»
څو ورځې وړاندې سرچینو افغانستان انټرنشنل ته هم ویلي و، چې ازبکستان پرېکړه کړې چې د افغانستان د پخواني پوځ چورلکې به طالبانو ته وسپاري.
پر همدغه مهال ځینو رسنیو د ذبیح الله مجاهد له قوله لیکلي وو، چې ازبکستان د چورلکو د بېرته ستنولو هوکړه کړې ده.
خو تېره ورځ د ازبکستان د بهرنیو چارو وزارت طالبانو ته د چورلکو د سپارلو راپورونه «جعلي» وبلل او وې ویل چې د دغه هېواد په رسمي دریځ کې هېڅ بدلون نه دی راغلی.
د ازبکستان د یاد دریځ په اړه وړاندې هم د ازبکستان ځانګړي استازي عصمت الله ایرګاشف د ۱۴۰۱ کال په غويي میاشت کې ویلي و، چې دا نظامي وسایط “د امریکا ملکیت دي” او د واشنګیټن په هوکړه په ازبکستان کې ساتل کېږي.
د چورلکو ورسپارلو په اړه د طالبانو ټینګار
د طالبانو د بهرنیو چارو وزیر تېره ورځ په کابل کې د بهرنیو ډېپلوماټانو په حضور کې یوځل بیا له ازبکستان او تاجکستان څخه وغوښتل چې چورلکې افغانستان ته وسپاري. متقي ټينګار وکړ چې د وروستۍ زلزلې پر مهال د ژغورنې عملیاتو لپاره د چورلکو اړتیا ډېره وه او دا الوتکې کولای شي په ورته بشري عملیاتو کې وکاروي.
سره له دې چې د پخواني نظام یو شمېر چورلکې د طالبانو له واکمنېدو سره ازبکستان او تاجکستان ته انتقال شوي، خو طالبانو په تېرو څلورو کلونو کې دپخوانی حکومت له پاتې هوايي وسایلو څخه په پراخه کچه استفاده کړې او ډېری وخت یې د ولسي اعتراضونو د ځپلو لپاره کارولي دي.
د امریکا د دفاع وزارت وړاندې ویلي و، چې د افغانستان د امنیتي ځواکونو ۴۶ چورلکې ازبکستان ته او ۱۸ یې تاجکستان ته انتقال شوې دي. په دغو چورلکو کې د c-۲۰۸, PC-۱۲, UH-۱۰, Mi-۱۷, AC-۲۰۸ او A-۲۹ ډولونه شامل وو.
امریکا طالبانو ته د چورلکو له ورکولو سره موافقه نه ده
په ازبکستان کې د امریکا سفیر جانټن هنیک ویلي و، چې واشنګټن او تاشکند د پخواني نظام د جنګي او پوځي الوتکو د وضعیت په اړه یوې هوکړې ته رسیدلي دي.
نوموړي ویلي:«دا پوځي الوتکې به په ازبکستان کې پاتې شي او دا موضوع لا دمخه رسمي شوې ده. دا الوتکې د افغانانو نه وې، دا د امریکا وي، خو افغان پوځ کارولې.»