د طالبانو د امر بالمعروف او نهی عن المنکر وزارت وايي، چې د فاریاب ولایت په پښتونکوټ او بلڅراغ ولسوالیو کې هغه درې نجونې چې له سپینږیرو سره نکاح کولو ته اړ اېستل شوې وې، د دغه وزارت د محتسبینو لهخوا یې مخنیوی وشو.
د دغه وزارت د خبرپاڼې له مخې، یادې نجونې د خپلې کورنۍ له خوا وهل شوې هم وې، څو دغو نکاحو ته غاړه کېږدي.
طالبان په داسې حال کې د یادو نجونو د جبري ودونو د مخنیوي ادعا کوي، چې د دوی غړو په تېرو څلورو کلونو کې په بېلابېلو پلمو له څو څو ښځو سره ودونه کړي او تر څنګ یې افغان ښځې له خپلو ټولو لومړنیو حقونو بېبرخې کړې دي.
د یوه بل خبر له مخې، په هلمند کې د سید محمد عیسی په نوم یو کوډګر د ولایتي امربالمعروف او نهې عن المنکر د محتسبینو له لوري نیول شوی دی.
د یاد وزارت د خبرپاڼې پر بنسټ، دغه کس د غېر شرعي کتابونو او جادو اړوند وسایلو په وسیله د «شریعت» خلاف چارې کولې او د خلکو له ناپوهۍ څخه په استفادې سره په ټولنه کې یې بې اعتمادي رامنځته کوله.
په بامیان ولایت کې د دوو جلا-جلا ټرافیکي پېښو په پایله کې ۳ کسان مړه شوي او ۲ نور ټپیان دي. د دغه ولایت د طالبانو مسوولین وايي، دغه پېښې د یکشنبې په ورځ (د وږي ۲۳مه) په مرکز بامیان او ورس ولسوالۍ کې رامنځته شوې دي.
د بامیان ولایت لپاره د طالبانو د امنیه قومندانۍ مسوولین وايي، لومړۍ پېښه نن له غرمې وروسته په ورس ولسوالۍ کې د یوه ټونس موټر د چپه کېدو له امله رامنځته شوې او پکې یو کس مړ او ۲ نور ټپيان شوي او د ټونس موټر چلوونکی نیول شوی او تر څار لاندې دی.
دویمه پېښه بیا نن ماښام په مرکز بامیان کې د یوه موټر او موټرسایکل د ټکر له امله رامنځته شوې او پر موټرسایکل سپاره دوه کسان مړه شوي دي.
دا په داسې حال کې ده، چې په افغانستان کې ډېری ټرافیکي پېښې د لارو د خرابوالي او د موټر چلوونکو د بې احتیاطۍ له امله رامنځته کېږي.
د مقاومت په نوم د طالبانو مخالفه جبهه ادعا کوي، چې تېره شپه (د وږي ۲۲مه) شاوخوا ۸ نیمې بجې یې په ګذرې ولسوالۍ کې د پولیسو د روزنې مرکز ته نږدې په یوه وسله وال برید کې ۳ طالبان وژلي او وسلې یې هم ترې غنیمت کړي دي.
د مقاومت جبهه د یوې خبرپاڼې په خپرولو سره وايي، دغه طالبان د «الفاروق» قول اردو د کشف قطعې اړوند و او په دې عملیاتو کې یې د یادو طالبانو ۲ وسلې او یو موټرسایکل هم ترلاسه کړي دي.
د خبرپاڼې له مخې، په دې عملیاتو کې دوی او ولسي وګړو ته هېڅ راز زیان نه دی اوښتی.
طالبانو لا تر اوسه د دغې پېښې په تړاو څه نه دي ویلي.
په کابل کې ځینو سرچینو افغانستان انټرنشنل - پښتو ته ویلي، چې د طالبانو د امر بالمعروف محتسبین په بازارونو کې د ښځو د حجاب د څرنګوالي د معلومولو لپاره، له کوچنیو ماشومانو د پیسو په بدل کې د جاسوسۍ کار اخلي.
هغو کسانو چې افغانستان انټرنشنل - پښتو ورسره خبرې کړې، په ګډه وایي چې په داسې مواردو کې د ماشومانو کارول کېدل یوه نوې او اندېښمنه پدیده ده، چې پر ټولنیز چاپېریال او د ماشومانو پر ژوند ژور منفي اغېز لري.
تمنا(مستعار نوم) چې ۱۱ کاله عمر لري، افغانستان انټرنشنل-پښتو ته وویل: «ما د نورو ماشومانو سره لوبې کولې، امربالمعروف راغلل(د امربالمعروف محتسبین) او راته یې وویل چې زه پیسې درکوم خو هغه ښځې راته وښایه چې څادري او حجاب یې نه وي کړی، ماته یې ۵۰ افغانۍ راکړې او ما ورته زمونږ د بلاک لاندې هټۍ کې ځینې ښځې وښودلې چې حجاب یې نه درلود.»
تمنا زیاتوي، چې له دې پېښې وروسته ورسره څوک دوستي او لوبې نه کوي، ځکه دې ته یې ملګرې د یوې جاسوسې په سترګه ګوري.
یوه بل ۱۰ کلن هلک چې په ښار کې قلمونه پلوري، افغانستان انټرنشنل-پښتو ته وویل: «ما هېڅکله نه غوښتل چې د چا په اړه امربالعروف ته راپور ورکړم، خو هغوی ماته پیسې راکوي او کله چې خپلې غریبۍ ته وګورم نو بیا یې ومنم، څو ځله مې د ځینو ښځو راپور ورکړی او هغه یې نیولي، هغو ښځو به ژړل، هغه وخت ما احساس وکړ چې دا سم کار نه دی.»
د کابل ښار د «لیسې مریم» بازار یو هټۍوال قیس احمدي وایي، له کله راهیسي چې په بازارنو کې د ماشومانو له خوا طالبانو ته د معلوماتو ورکړه پیل شوې، د دوی پر پلور یې بده اغېزه کړې ده، ځکه مېرمنې د امربالمعروف له وېرې بازارونو ته له تګ څخه ډډه کوي.
هغه زیاتوي: «مونږ اوس په دې بازار کې هغه ماشومان پېژندلي دي او خپلو دوکانونو ته یې نه پرېږدو، خو بیا هم چې زمونږ پام نه وي راشي او کله چې د کومې ښځې پر لور اشاره وکړي، نو د امربالمعروف محتسبین سمدستي ورځي او نیسي یې او یا ورښودل شوې ښځې مجبورېږي چې له بازار څخه ووځي. دا وضعیت زموږ د کاروبار او د خلکو لپاره ډېر ناارامه کوونکی دی، اوس ښځې بازار ته ډارېدلې راځي.»
وحید الله نور چې د ماشوم د روزنې په برخه کې یې ۲۲ کاله کار کړې او اوس تقاعد شوی، افعانستان انټرنشنل-پښتو ته وایي: «دا ډېره اندېښمنوونکې ده، زه خبر شوی یم چې ځینې ماشومان له کوره د ښونځي په نوم راوځي او په بازارنو کې د امربالمعروف لپاره جاسوسي کوي، دا د ماشومانو په اخلاقو او روحیې بد اثر کوي، پر ځای د دې چې ماشومان ښوونځي ته لاړ شي، بازارونه څاري، دا د ماشومانو سالم راتلونکی د ګواښ سره مخ کوي.»
د اړوندې موضوع په تړاو د ښځو حقونو فعاله لېلو افغان وایي: «د ماشومانو دا ډول کارول د ماشوم حقونو څخه په ښکاره سرغړونه ده. ماشوم باید ښوونځي ته لاړ شي، لوبې وکړي او سواد زده کړي، نه دا چې د ټولنې د کنټرول لپاره وکارول شي. دا عمل د ښځو د عامه ژوند پر حقونو هم منفي تور لګول دي.»
د کابل د قصبې سیمې یوې اوسېدونکې د نوم د نه ښودلو په شرط افغانستان انټرنشنل-پشتو ته ویلي، چې شپږ کلنه لور یې هر مازدیګر د لوبو لپاره له کوره وتله، خو طالبانو پر هغې د «کوچنۍ جاسوسې» نوم اېښی و.
د نوموړې په وینا: «لور مې یوه ورځ له کیک او بسکېټ سره کور ته راغله، په داسې حال کې چې ما ورته پیسې نه وې ورکړې. کله چې مې پوښتنه وکړه، لور مې وویل چې څو ښځې مې د امر بالمعروف کسانو ته وروپېژندلې او هغوی راته ۳۰ روپۍ راکړې.»
یاده مېرمن وایي، چې له هغې ورځې وروسته یې بیا خپلې لور ته اجازه نده ورکړې چې له کور څخه ووځي.
د یادې مېرمن لور له افغانستان انټرنشنل-پښتو سره په خبرو کې وویل: «زه بهر وم چې دوو طالبانو راته وویل چې بېحجابه ښځې موږ ته وښیه، ادرس او ځای یې راوښیه، تر څو پیسې درکړو. ما هم دوه ښځې چې په دوکان کې وې، هغوی مې طالبانو ته وروپېژندلې او څو نورې ښځې چې د بلاک لاندې وې، د هغوی ځای مې هم وروښود. دې ښځو لبسرین وهلی و او د چپن تڼۍ یې خلاصې پرېښې وې. طالبانو غوښتل چې دوی موټر ته پورته کړي او حورې ته یې یوسي، خو ښځې په ژړا شوې.»
یاده ماشومه زیاتوي: «کله چې طالبان زما خواته راغلل او لاس یې جېب ته یووړ، زه ووېرېدم چې ښايي تفنګچه باسي او ما وژني. نو په تېښته شوم، خو طالبان څو ګامه راپسې راغلل او زما لاسونه یې ونیول، ویې ویل: ته خو زموږ کوچنۍ جاسوسه یې، دا پیسې واخله. هغوی راته پیسې راکړې او ولاړل.»
له ماشومانو سره د طالبانو یاد چلند ډېری کورنۍ اندېښمنې کړي دي.
افغان روانپوه ډاکټر حسن اندړ د کوچنیو ماشومانو د دا ډول کارونې او د دوی په ژوند یې د منفي اغېزو په اړه وایي: «ماشومان چې په داسې تشدد یا د نورو خلکو د سپکولو شاهدان وي او یا پخپله په دې فعالیتونو کې ښکېل شي، د شرم، وېرې او بېارزښتي احساساتو ښکار کېدلای شي. دا کار د هغوی په ذهني پرمختګ، تعلیمي حضور او ټولنیز چلند ژور منفي اغېز کولی شي.»
هغه وړاندیز وکړ، چې له داسې کارونو د ماشومانو د ساتنې لپاره باید بېړنۍ برنامې پیل شي، د زدهکړې ادامه یقیني شي او د ماشومانو د داسې کارونې پر ضد د منع پیاوړې څارنه وشي.
د ماشومانو د خوندیتوب نړۍوال کنوانسیون او نور نړۍوال معیارونه چې افغانستان هم پرې لاسلیک کړی، له ماشومانو څخه سیاسي، نظامي او څارنیزه ګټه اخیستنه جرم ګڼي او د دې ډول پېښو د مخنیوي لپاره ځانګړي قوانین لري. لاسلیک کوونکي هېوادونه مکلف دي چې دغه لارښونې په خپلو ملي قوانینو کې رعایت کړي.
خو د طالبانو تر واکمنۍ لاندې د ماشومانو دا ډول استخدام د نړۍوالو ژمنو ښکاره سرغړونه ده. د بشري حقونو فعالان وایي، چې دا کار نه یوازې د ماشومانو د ژوند راتلونکی له ګواښ سره مخ کوي، بلکې د ښځو پر عامه حضور هم دروند سیوری اچوي.
موږ له امر بالمعروف او اړوندو ادارو سره څو ځله اړیکه ونیوله او د هغوی رسمي دریځ مو وغوښت، خو د راپور تر خپرېدو پورې مو هېڅ روښانه ځواب تر لاسه نه کړ.
دا په داسې حال کې ده، چې تر دې وړاندې طالبانو د دغه ډول محدودیتونو لپاره مذهبي او کلتوري دلیلونه وړاندې کړي. دوی وايي، چې د ښځو د «امنیت، عزت او اسلامي اصولو» لپاره دغه ګامونه پورته کوي. خو د ډېری اسلامي هېوادونو دیني عالمانو دا توجیه نه مني او وایي، چې دا ډول کړنې له اسلام سره اړخ نه لګوي.
د ماشومانو له لوري د ښځو څارنه او د هغوی راپور ورکول کېدای شي د طالبانو له خوا د ټولنیز فشار نوې بڼه وي، چې هم د ماشومانو د حقونو جدي نقض ته لاره هواروي او هم د ښځو د عامه حیات د کمزورتیا سبب کېږي.
دا پدیدې د کورنیو، ټولنیزو او رواني ستونزو سره تړاو لري؛ خو بېتردیده د حل لپاره قانوني، تعلیمي او بشري اقدامات اړین ښکاري.
د ایران د بشري حقونو سازمانونو راپور ورکړی چې په قزوین مرکزي زندان کې یوه افغانه ښځه او د هغې خاوند اعدام شوي دي. د راپورونو له مخې، دا جوړه د نشه يي توکو د قاچاق په تور نیول شوې وه او له دریو ماشومانو سره په زندان کې وه، خو وروسته یې ماشومان خوشې او افغانستان ته واستول شول.
د ایران د بشري حقونو سازمان راپور ورکړی چې حدیقه ابادي او یونس مزارشمس د پنجشنبې په ورځ په قزوین زندان کې اعدام شوي دي. دغه افغانه جوړه څلور کاله وړاندې د اعدام په سزا محکومه شوې وه.
راپور وایي چې دې افغانې کورنۍ شاوخوا ۲۰ کاله په ایران کې ژوند کاوه.
د دې جوړې د ماشومانو هویت او عمر نه دی څرګند شوی، خو یوازې د «ماشومانو» په توګه یاد شوي دي.
تر دې دمه د ایران حکومت او داخلي رسنیو د دې جوړې د اعدام په اړه څه نه دي ویلي.
د ایران د بشري حقونو سازمان په وینا، یوازې په تېرو دریو کلونو کې په ایران کې د نشه يي توکو د قاچاق په تړاو ۵۰۳ کسان اعدام شوي دي.
ههنګاو سازمان هم ویلي چې د ۲۰۲۵ کال له پیل راهیسې په ایران کې هره اونۍ شاوخوا ۲۵ زندانیان اعدام شوي، چې په ټوله کې ۹۰۶ زندانیان کیږي او له دې ډلې ۵۹ تنه افغانان وو.
انس حقاني چې د حقاني شبکې له جګپوړو غړو شمېرل کیږي، وايي، واک ته رسېدل اسان وو، خو د حکومت چلول سخت کار دی. نوموړي له یوه هندي یوټیوبر سره مرکه کې له هند سره د ښو اړیکو غوښتنه وکړه او ویې ویل چې ټول مسایل باید د خبرو اترو له لارې حل شي.
نوموړي په دې مرکه کې ویلي، چې حکومتي واک ته رسېدل اسان ول خو د حکومت چلول سخت کار دی او یوه سخته مرحله ده.
هغه وویل:«زما ورور د کورنیو چارو وزارت وزیر دی، خو هغه وویل چې د جګړې پرمهال هغه فکر کاوه، چې که وطن ازاد شي نو زه به ارام وکړم خو اوس وینم چې زیاتې ستونزي دي او ارام مې ونه کړ.»
هغه په دوحه کې له یوه بهرني پلاوي سره د خپل یوه مجلس په اړه وویل، چې دوی د فوټبال او ددې لوبې د یوه مشهور لوبغاړي رونالډو یادونه وکړه او وروسته یاد پلاوي په بل مجلس کې ده ته د رونالډو ټي شرټ راوړ.
نوموړي د افغانستان کرېکټ په اړه وویل چې د جمهوریت له پرځېدو وروسته د کرېکټ نړیوالې شورا خپل فنډ بند کړ خو طالبانو له هند او متحده عربي اماراتو څخه غوښتنه وکړه، چې په دې برخه مرسته وکړي څو اي سي سي ته وايي چې کرېکټ دې له سیاست څخه جدا کړي او پر کرېکټ دې بندیزونه نه لګوي.
انس حقاني وايي چې په تېرو څلورو کالونو کې د افغانستان کرېکټ ډېر پرمختګ کړی دی.
هغه د طالبانو د مشر ټولبښنې ته هم اشاره وکړه، چې په سمه توګه عملي شوې او د پخواني ولسمشر حامد کرزي په ګډون زیات شمېر د پخواني حکومت چارواکي د طالبانو تر حاکمیت لاندې سوله یز ژوند تیروي.
ویل کېږي د جګړې پرمهال د طالبانو په ډله کې حقاني شبکې ډېر خونړي بریدونه ترسره کول خو اوس دغه ډله واک ته له رسېدو وروسته غواړي د نورو طالبانو د مشرانو پرتله ځانونه منځلاري وښيي.