د کډوالو د حقونو څار نړۍوالې ادارې ویلي، چې دوی د ملګرو ملتونو د کډوالو چارو اداره کې د طالبانو لهخوا د ښځينه کارکوونکو پر فعالیت بندیز غندي. دغه اداره وايي، په دې ډول هم ښځې له کاره بې برخې شوې او هم د کډوالو لپاره خدمتونه په ټپه درېدلي دي.
دغه ادارې پر اېکس پاڼه د یوې خبرپاڼې په خپرولو سره لیکلي، چې د طالبانو لهخوا د ملګرو ملتونو د کډوالو چارو ادارې د ښځينه کارکوونکو پر فعالیتونو بندیز خواشینې کړي دي.
په خبرپاڼه کې راغلي، ملګرو ملتونو له ستنېدنکو افغانانو سره مرسته کوله؛ خو اوس دغه مرستې بندې شوې دي، چې مسوولیت یې د طالبانو پر غاړه دی.
د کډوالو حقونو د څار نړۍواله اداره وايي، دغه ډول بندیزونو د زرګونه افغان کورنیو ژوند له ګواښ سره مخ کړی او دغه کار د بشردوستانه اصولو او نړۍوالو ارزښتونو سره په ټکر کې دی.
په خبرپاڼه کې له ملي او نړۍوالو اړخونو غوښتنه شوې، چې د طالبانو د دغه غیر انساني پرېکړې پر وړاندې کلک دریځ غوره کړي؛ څو د افغان ښځو د کار حق تضمین شي او د ستنېدونکو افغانانو لپاره خدمتونه له سره پيل شي.
دغه سفارت په خپله اېکس پاڼه لیکلي، په دې کتنه کې په ایران کې د افغان زده کړیالانو د ستونزو د حل په برخه کې پر ګډو همکاریو ټينګار شوی دی.
دا په داسې حال کې ده، چې تېر کال د ایران د علامه طباطبایي پوهنتون څېړنیزې مرستیالې او د کډوالۍ د برخې څېړونکې ماندانا تیشهیار ويلي و، چې د دې هیواد د علومو د وزارت له شمېرو سره سم په ایران کې ۶۰ زره افغان زده کړیالان شته، خو ددغه شمېر په اړه بیا طالبانو څه نه دي ویلي.
په ایران کې مېشت افغانان اوسمهال د دغه هېواد له سخت جبري اېستلو سره مخ دي او په دې لړ کې سلګونه زده کړیالان هم بې برخلیکه شوي دي.
د یوه بل خبر له مخې، فضل محمد حقاني په تهران کې د یوناما د روابطو له مسوول بوجیدار واسیلف سره په کتنه کې په ایران کې د افغان کډوالو د وضعیت په تړاو خبرې کړې دي.
د سفارت په وینا، په دې کتنه کې له کډوالو او بېرته ستنېدونکو افغانانو سره د مرستو او همداراز د افغانستان په ختیځ کې له زلزله ځپلو سره د مرستو پر څرنګوالي هم خبرې شوې دي.