د طالبانو د عدلیې وزارت ویلي، چې د امر بالمعروف د قانون د پلي کولو لپاره یې په مرکز او ولایتونو کې “د همکارۍ کمیټې”طرزالعمل توشېح او په رسمي جرېده کې خپور شو. دغه طرزالعمل د طالبانو د مشر ملا هبتالله اخوندزاده له خوا په ۱۳ مادو کې لاسلیک شوی دی.
د طالبانو د عدلیې وزارت د شنبې په ورځ د دې ډلې د امر بالمعروف د قانون د پلي کولو د پلاوي طرزالعمل توشېح او په رسمي جرېده کې یې خپور کړ.
په دغه طرزالعمل کې ویل شوي، چې ټاکل شوی پلاوی به لومړی د طالبانو د امر بالمعروف قانون په بشپړه توګه لولي او بیا به یې په وزارتونو، خپلواکو ریاستونو، دولتي ادارو او د ولایتونو په رسمي غونډو کې تشریح کوي.
د طالبانو د عدلیې وزارت ویلي، چې ټول دولتي کارکوونکي باید د دې قانون مطابق خپل کارونه عیار کړي.
په دغه طرزالعمل کې راغلي، چې طالبانو د ټولو ولایتونو د پوهنې ریاستونو ته امر کړی چې د پوهنې چارواکو لپاره غونډې جوړې کړي او د ښوونځیو، مدرسو، خصوصي اکاډمیو، انګلیسي او کمپیوټر مرکزونو ښوونکي او زده کونکي دې د امر بالمعروف قانون په پلي کولو مکلف کړي.
همدارنګه د طالبانو د حج او اوقافو وزارت ته هم دنده سپارل شوې چې د هېواد په کچه د جوماتونو امامانو ته دې د دغه قانون اهمیت تشریح کړي ترڅو خلک د یاد قانون پلي کولو ته وهڅوي.
دې پلاوي ته دنده سپارل شوې ده ،چې د ولایتونو، ولسوالیو، پوهنتونونو، ورزشي مرکزونو، د سوداګرۍ او صنایعو خونو، شرکتونو، اتحادیو او فابریکو له چارواکو سره غونډې وکړي او د امر بالمعروف قانون په پلي کولو کې له هغوی څخه مرسته وغواړي.
د طالبانو د مشر له خوا د یاد طرز العمل په جوړولو سره ښايي د خلکو ټولنیز ژوند په پراخه کچه وڅارل شي.
طالبانو دا نه ده په ډاګه کړې چې د امر بالمعروف د قانون د پلي کولو پلاوي د طرزالعمل لپاره به د یاد وزارت پخواني کارکوونکي په دنده وګومارل شي که نوي کسان به د یاد قانون د پلي کولو لپاره وګماري.
