د طالبانو د ریاست الوزرا د دفتر ریاست مرستیال سید احمد مستقیم ویلي، چې د طالبانو له خوا د بې کیفیته تېلو د مخنیوي پلاوي هرات ته سفر کړی او په اسلام کلا کې یې د تېلو بار ۲۰۰۰ ټانکره راګرځولي دي.
طالبانو ویلي، بازار ته د یادو تېلو د عرضه کولو د مخنیوي په موخه یې د یادو موټرو لپاره جلا تمځای جوړ کړی دی.
د بې کیفیته تېلو د مخنیوي دغه پلاوي له هرات وروسته فراه او نیمروز ولایتونو ته هم سفر کړی.
طالبانو دا نه دې ویلي، چې یاد بې کیفیته تېل له کوم هېواد څخه افغانستان ته وارد شوي دي، خو تردې وړاندې د دې ډلې تر واک لاندې د نورم او سټنډرډ ادارې سلګونه ټانکره تېل بېرته ایران او ازبکستان ته ور ګرځولي دي.
جرمني ورځپاڼې بیلډ راپور ورکړی، چې د دغه هېواد د کورنیو چارو وزارت لوړ پوړي چارواکي به د اکتوبر په میاشت کې کابل ته سفر وکړي. د یاد سفر موخه دا ده چې «مجرمان» نه یوازې د چارټر الوتکو، بلکې د سوداګریزو الوتکو په کارولو سره انتقال کړي.
دغه سفر په داسې حال کې ترسره کیږي، چې جرمني د ۲۰۲۱ کال اګست کې د طالبانو له واک ته رسیدو وروسته له دوی سره ډېپلوماټیکې اړیکې نه لري او دغه هېواد د پخواني افغان حکومت له نسکوریدو وروسته په کابل کې خپل سفارت تړلی دی.
بیلډ ورځپاڼه زیاتوي، چې د جرمني د کورنیو چارو وزارت ویاند دا تایید کړې چې یو لوړ پوړی پلاوی به کابل ته سفر وکړي خو لا څرګنده نه ده چې څوک به په یاد پلاوي کې شامل وي.
د جرمني د کورنیو چارو وزیر الکساندر ډوبرینټ هوډ لري چې هغه افغان کډوال چې جرمونه یې کړي دي افغانستان ته ولېږي.
له دې مخکې جرمني د قطر په منځګړیتوب سره لسګونه افغان کډوال کابل ته لېږلي دي، چې د هغه په بدل کې جرمني په برلین کې دوه د طالبانو ډېپلوماټان هم ومنل.
لا روښانه نه ده چې طالبان د افغان کډوالو د اېستلو په احتمالي موافقه کې د جرمني له حکومت څخه کوم امتیازات غواړي او یا به یې ترلاسه کړي.
د جرمني د کورنیو چارو وزیر له طالبانو سره د افغان کډوالو د اېستلو لپاره د خبرو اترو هڅه د هېواد د مخالفو ګوندونو لخوا په پراخه کچه له نیوکو سره مخ شوې ده.
زرغون ګوند د دې خبرې په اړه چې جرمني حکومت له طالبانو سره خبرې کوي، خورا غوسه دی.
له دې وړاندې د یاد ګوند د کورنۍ پالیسۍ ویاند مارسل امریش په دې خبرو اترو سختې نیوکې کړې وې. هغه ویلي وو چې د جرمني واکمن ګوندونه د یوې ترهګرې ډلې لپاره "چاپلوسي" کوي.
د مارسل امریش په وینا، د کورنیو چارو وزیر په یوازې ځان ډېپلوماټیک بندیز مات کړی دی.
هغه روښانه کړه: «هغه د داسې رژیم سره اړیکې ټینګې کړي دي چې شکنجه کوي، سنګسار کوي، ښځې ځوروي او بشري حقونه تر پښو لاندې کوي.»
په همدې حال کې په دې وروستیو کې د جرمني د کورنیو چارو وزیر څرګنده کړه، چې پخواني حکومت هم د کډوالو د اېستلو په اړه له طالبانو سره خبرې اترې کړې وې.
د طالبانو د ټولګلټو وزارت وایي، چې د ۱۴۰۴ کال په لومړیو شپږو میاشتو کې د تېر کال د لومړیو شپږو میاشتو په پرتله د اوسپنې پټلۍ له لارې په انتقالاتو کې ۱۱،۱۵ سلنه زیاتوالی راغلی دی.
د طالبانو د ټولګټو وزارت ویاند محمد اشرف حق شناس وايي، د ۱۴۰۳ کال په لومړیو شپږو میاشتو کې د اوسپنې پټلۍ له لارې ټولټال ۱۹۶۲۶۵۹ میټریک ټنه انتقالات شوي وو، خو د ۱۴۰۴ کال په لومړیو شپږو میاشتو کې د انتقالاتو کچه ۲۱۸۱۵۴۴ مټریک ټنو ته لوړه شوې ده.
د نوموړي په خبره د تېرو شپږو میاشتو په انتقالاتو کې تېل، اوبلن ګاز، غنم، اوړه، غوړي او نور خوراکي او ساختماني توکي هېواد ته وارد شوي او همدارنګه وچه مېوه، د انارو جوس، کاڼي ډبرې، کچالو او وریژې له افغانستان څخه صادر شوي دي.
نوموړي د اوسپنې پټلۍ له لارې د انتقالاتو د کچې زیاتوالی د افغانستان لپاره اقتصادي پرمختګ بللی دی.
حق شناس ویلي، چې د اوسپنې پټلۍ له لارې د صادراتو او انتقالاتو په زیاتېدو سره په افغانستان کې کاري فرصتونه ډیریږي او د هېواد اقتصادي ثبات، پرمختګ او ځان بسیاینې ته لاره هوایږي.
د چین د بهرنیو چارو وزارت د اسیايي څانګې مشر په چین کې د طالبانو له سفیر بلال کریمي سره په لېدنه کې د افغانستان خپلواکۍ او ځمکنۍ بشپړتیا ته پر درناوي ټینګار کړی. لیو جینسونگ ویلي چې چین او افغانستان نږدې او اوږدې اړیکې سره لري.
د چین د بهرنیو چارو وزارت د اسيايي څانګې مشر لیو جینسونگ ویلي، د دواړو هېوادونو ترمنځ د ډیپلوماټیکو اړیکو۷۰مه کلیزه د دې څرګندونه کوي، چې چین او افغانستان له اوږدې مودې راهیسې نږدې او اوږدې اړیکې لري.
په چین کې د طالبانو سفارت د شنبې په ورځ (د تلې ۵مه) د یوې خبرپاڼې په خپرولو سره ویلي، چې په دغه لېدنه کې دواړو لوریو د اړیکو پر لا پیاوړتیا، اقتصادي او سوداګرریزو همکاریو، کونسلي خدماتو او نورو اړینو مسایلو خبرې وکړې.
په چین کې د طالبانو سفیر بلال کریمي د دواړو هېوادونو ترمنځ ښو اړیکو ته په اشارې سره د افغانستان په ختیځ کې له زلزله ځپلو کورنیو سره د چین د بشري مرستو مننه کړې ده.
دا لېدنه په داسې حال کې شوې، چې چین او نورو سیمه ییزو هېوادونو افغانستان ته د امریکا د بېرته ستنېدو د هڅو په اړه اندېښنه څرګنده کړې ده او د پنجشنبې په ورځ د روسیې، چین، ایران او پاکستان د بهرنیو چارو وزیرانو په نیویارک کې د افغانستان په اړه د څلور اړخیزې ناستې پرمهال خبرداری ورکړ چې په دغه هېواد کې د امریکا د پوځي اډې جوړول سیمهییز امنیت او ثبات ګواښي.
په خوست کې ځايي سرچینو افغانستان انټرنشنل پښتو ته وویل، چې تېره ورځ په تېر جمهوري نظام کې د ملي امنیت پخوانی افسر صمد تڼی په یوه وسلوال برید کې ووژل شو. د سرچینو په وینا، دغه پخواني افسر شخصي دښمني درلوده او د هغوي له خوا په نښه شوی دی.
په خوست کې ځايي سرچینو نن شنبه د (تلې ۵مه) افغانستان انټرنشنل پښتو ته وویل چې پر صمد تڼي تېره ورځ غرمه مهال د تڼیو ولسوالۍ ژۍ کلي وسلهوال برید شوی.
دوی ادعا کوي، چې د تېر جمهوریت پرمهال صمد تڼی باندې د یوه ځايي کس د وژل کېدو تور و او دا دښمني ۱۳ کلنه مخینه لري.
د سرچینو په وینا صمد د همدې دښمنۍ له امله خپله کورنۍ له تڼیو ولسوالۍ څخه اسماعیل خیل او مندوزي ولسوالۍ ته انتقال کړې وه او هلته مېشت شوی و.
سرچینې زیاتوي چې صمد د خپلو خپلوانو د حال پوښتنې لپاره تڼیو ولسوالۍ ته تللی و چې په پیر پاچا ژۍ کلی کې پر ډزې وشوې او ځای پر ځای ووژل شو. سرچینې وایي له صمد سره یو کس ټپي شوی هم دی.
د صمد تڼي پلار هم په تېر جمهوریت کې د ملي امنیت افسر پاتې شوی دی.
طالبانو تراوسه د یادې پېښې په اړه څه نه دي ویلي.
طالبان وايي د افغانستان په اړه د چین، ایران، روسیې او پاکستان د څلور اړخیزې ناستې او په ملګرو ملتونو کې د ازبکستان، تاجکستان او ځینو نورو هېوادونو د مثبتو څرګندونو ستاینه کوي، خو په یادو ناستو کې د افغانستان له خوا د ګواښونو او اندېښنو په اړه ادعاوې ناسمې دي.
د طالبانو د ویاند مرستیال حمدالله فطرت د شنبې په ورځ (د تلې ۵مه) د یوه غږیږ پیغام په خپرولو سره ویلي، چې یاده ډله د چین، پاکستان، روسیې او ایران د څلور اړخیزې ناستې او د ملګرو ملتونو په عمومي غونډه کې د ځینو هېوادونو له خوا د افغانستان په اړه د مثبتو څرګندونو ستاینه کوي.
فطرت ویلي:«موږ د هغو هېوادونو درېځ ستایوو چې د افغانستان په اړه یې مثبتې څرګندونې کړې او د افغانستان د خپلواکۍ، سولې او ثبات ملاتړ یې کړی. دا یو واقعبینانه لېدلوری دی، چې له افغانستان سره اړیکو ته موجوده امنیت په ارتباط او د پرمختګونو په ړنا کې ترجیح ورکول کېږي.»
په ورته مهال چین، پاکستان، ایران او روسیې د څلور اړخیزې ناستې پرمهال په افغانستان کې د ترهګرو ډلو په اړه اندېښنه ښودلې او ویلې دي چې داعش، القاعده، د ترکستان ختیځ اسلامي حرکت، د پاکستاني طالبانو تحریک، جیش العدل، د بلوڅ بېلتون پاله ډله، د مجید برګیډیر ډله او نورې ورته ډلې د افغانستان، سیمې او نړۍ د امنیت لپاره جدي ګواښ دي.
خو طالبانو د ویاند مرستیال وايي:«له افغانستان څخه نورو هېوادونو ته د تهدید پېښیدو په اړه ناسمې اندېښني او په دې اړې شوې ادعاګانې په کلکه ردوو. موږ یو ځل بیا په ډاګه وایوو چې په افغانستان کې وسلهوالې ډلې فعالیت نه لري او هېڅ چاته اجازه نه ورکوو، زموږ خاوره د بل چا پر ضد و کاروي. موږ د فساد، نشیې توکو او هر ډول ناامنیو پر وړاندې جدي اقدامات کړي دي.»
د طالبانو د ویاند مرستیال یادې څرګندونې پر داسې مهال کړې، چې د پاکستان د لومړي وزیر شهباز شریف او د اوکراین ولسمشر ولادیمیر زېلېنسکي د ملګرو ملتونو په عمومي غونډه کې په افغانستان کې د طالبانو له خوا د بشري حقونو او د ښځو د حقونو څخه د سرغړونو په اړه نیوکي وکړې او د ایران، پاکستان، چین او روسیې د بهرنیو چارو وزیرانو هم د افغانستان په اړه د څلور اړخیزې ناستې پرمهال په دغه هېواد کې د وسلهوالو ډلو پر شتون اندېښنه ښودلي ده.