د افغانستان د بهرنیو چارو پخواني وزیر محمد حنیف اتمر د طالبانو له لوري د انټرنېټ، ټیلیفون او نورو مخابراتي اړیکو د بشپړ بندېدو پرېکړه «یو نوی ناورین» بللی، چې پر افغانانو تپل شوې ده.
اتمر پر اېکس خواله رسنۍ لیکلي، افغان ولس لا له وړاندې د طالبانو د ښځو ضد او بشري ضد پالیسیو له امله له تر ټولو لویو او ترخو محرومیتونو سره لاس او ګرېوان و او دا پرېکړه به د خلکو ژوند لا نور له ستونزو سره مخ کړي.
نوموړي زیاته کړې، ډېر وخت به ونه نیسي چې دا پرېکړه به د افغانانو د ژوند ټول اړخونه له ستونزو سره مخ کړي او د نړۍ هېوادونه به یو ځل بیا طالبان وغندي او دا پرېکړه به د معاصرې نړۍ د ارزښتونو پر ضد وبولي.
اتمر ټینګار کړی، چې د اړیکو بندېدل د افغانانو د ژوند هره برخه ګډوډوي؛ له کورنیو اړیکو نیولې تر اقتصاد، سوداګرۍ، ورځني معیشت، روغتیايي او تعلیمي خدمتونه، سفرونو او ان تر امنیت پورې.
د هغه په وینا، د انټرنېټ بندېدل په ځانګړي ډول د افغان ماشومانو او ځوانانو د زدهکړو او معاصرې زدهکړې له حقه بنسټیز محرومیت دی.
هغه خبرداری ورکړ، چې د اړتیا وړ توکو بیې به لوړې شي او افغانان به نور ونه توانېږي چې له بهر څخه خپلو کورنیو ته پیسې واستوي یا هم د کونسلي خدماتو له لارې اسناد تر لاسه کړي.
اتمر زیاته کړې، لا څرګنده نه ده چې طالبان ولې دې پرېکړې ته اړ شوي دي؛ خو ښایي د خلکو د ازادۍ غوښتنې د ټکولو لپاره د استبدادي رژیمونو تګلاره وي یا هم د طالبانو د رهبرانو د امنیتي اندېښنو له زیاتېدو سره تړاو ولري.
هغه ټینګار کړی: «هر دلیل چې وي، دا پرېکړه د خلکو د رنځونو د زیاتېدو لامل کېږي، خو د افغانانو د ازادۍ غوښتنه نه شي درولی، بلکې دا کار به د طالبانو د واکمنۍ بنسټونه لا نور هم کمزوري او نازک کړي.
