د اکتوبر پر۱۳مه په تاشکند کې د ازبکستان او افغانستان د خصوصي سکتور د همکاریو د پراختیا په موخه د دواړو هېوادونو د خصوصي سکتور د استازو غونډه کړې ده. په دې غونډه کې ۸۰ افغان سوداګرو او له ۲۰۰ ډېرو ازبک شرکتونو ګډون کړی.
د ازبکستان رسنیو د دوشنبې په ورځ، د تلې پر ۲۱مه، خبر ورکړی، چې دغه سوداګریز فورم د ازبکستان د سوداګرۍ او صنایعو د خونې په ابتکار جوړ شوی، چې موخه یې د دواړو هېوادونو د خصوصي سکتور ترمنځ د همکارۍ پراختیا ده.
په دې غونډه کې شاوخوا ۸۰ افغان سوداګر او له ۲۰۰ ډېر ازبک شرکتونه ګډون لري.
د دواړو لوریو ترمنځ ناستې په اوو مهمو برخو کې تنظیم شوې دي، چې د خوړو صنعت، ودانیز توکي، درمل جوړونه، نساجي، لوژستیک او د موټرو پرزې پکې شاملې دي.
غونډه د ازبکستان د سوداګرۍ او صنایعو خونې رییس داوران وخابوف، د افغانستان د سوداګرۍ او پانګونې خونې رییس محمد کریم هاشمي او په ازبکستان کې د طالبانو سفیر مولوي عبدالغفور بحر پرانېستې ده.
د معلوماتو له مخې، په ۲۰۲۵ کال کې په کابل او مزارشریف کې هم ورته سوداګریزې غونډې شوې وې، چې له۱۲۰ زیاتو ازبک شرکتونو پکې ګډون کړی و او د دغو غونډو په پایله کې د ۶۰میلیونه ډالرو په ارزښت قراردادونه لاسلیک شول.
یوازې په اګست میاشت کې په کابل کې د سوداګرۍ په یوه غونډه کې ۴۵تړونونه وشول.
د ۲۰۲۴ کال په پای کې د ازبکستان او افغانستان ترمنځ د بهرنۍ سوداګرۍ حجم ۱،۱۳۴ میلیارد امریکایي ډالرو ته ورسېد، چې د ۲۰۲۳ کال په پرتله ۳۰،۷ سلنه زیاتوالی ښيي.
د ازبک چارواکو په وینا، د سوداګرۍ مثبت توازن ۱،۰۴۴ میلیارد ډالره و.
د فورم په ترڅ کې د دواړو هېوادونو سوداګر ځانګړې سوداګریزې ناستې هم کوي، چې د سوداګریزې همکارۍ د پراخېدو، ګډو پروژو د پلي کولو، د پانګونې نوښتونو او د ازبک شرکتونو د صادراتي ظرفیت لوړولو موضوعات پکې څېړل کېږي.
