په بهرنیو چارو او امنیتي پالیسیو کې د اروپايي ټولنې استازې کایا کالاس وايي، د افغانستان او پاکستان ترمنځ نښتې دواړو خواو ته تاوان رسوي او ورسره به سیمه له نوې بې ثباتۍ سره مخ شي.
کالاس په خپله اېکس پاڼه لیکلي، د پاکستان د بهرنیو چارو وزیر اسحاق ډار ته یې زنګ وهلی او د ترهګرۍ ټولې بڼې یې په کلکه غندلي او زیاته کړې یې ده، چې «د افغانستان او پاکستان ترمنځ نښتې له دواړو لورو ژوند اخلي او د دې ګواښ رامنځته کوي چې سیمه له نوې بېثباتۍ سره مخ شي.»
هغې زیاته کړې، په اوسنیو شرایطو کې دا ډېره مهمه ده چې اوربند وغځول شي او ښکېلې خواوې تاوتریخوالی راکم کړي.
دا په داسې حال ده، چې د دوحې خبرو تر پای ته رسېدو د افغانستان او پاکستان تر منځ اوربند اعلان شو، خو د ځينو طالب چارواکو په وینا، دغه اوربند د جمعې په ماښام (د تلې ۲۵مه) د پاکستان له لوري مات شو او د ډيورند فرضي کرښې په اوږدو کې یې د پکتیکا په اُرګون او برمل ولسوالیو کې د ولسي وګړو پر کورونو بمبارۍ پیل کړې.
د دغو بریدونو له امله تر اوسه د درېیو کرېکټ سیمه ییزو لوبغاړو او دوو ماشومانو په ګډون ۸ کسان وژل شوي او د ۶ ښځو په ګډون شاوخوا لس نور ټپیان شوي دي.
