د پښتون ژغورنې غورځنګ غړی حنیف پښتین وايي، د پاکستان پوځ له لر او بر افغان ملت سره مخامخ جګړه پیل کړې او له یوې مخې بې ګناه پښتانه افغانان په نښه کوي. هغه زیاتوي، «د ډیورنډ فرضي کرښې په اوږدو کې مخ په زیاتیدونکی تاوتریخوالی د پوځ سره د یوې لویې فاجعې د پېښیدو امکان زیاتوي.»
حنیف پښتین د جمعې په ماخوستن (د تلې ۲۵مه) په خپله اېکس پاڼه وویل، په ټوله پښتونخوا کې هره ورځ خلک قرباني کېږي او له کابله نیولې بیا تر کندهار او خوست پورې په تېره یوه اونۍ کې لسګونه خلکو ته مرګ ژوبله اوښتې او په وینای یې هره دویمه ورځ د پښتنو جنازې پورته کېږي.
پښتین زیاتوي، «په دې مشکل او سخت وخت کې لر او بر افغان ملت د خپل حاکمیت او خپلې خاورې د عزت ساتنې له امتخان سره مخ دی، افغان ملت به ان شاءالله چې په تدبیر او ملي یووالي سره د را پېښو ستونزو په وړاندې دریږي او بریالي کیږي به.»
د نوموړي په وینا، د افغان ملت ملي یووالی، د پردیو پر وړاندې شریکه کرکه او د بهرني تیري پر وړاندې د خپلې خاورې دفاع هغه څه دي چې دغه ملت د هر زورور په مقابل کې بریالی کولی شي.
