د عوامي نشنل ګوند ولایتي مشر سردار حسین بابک وايي، افغانستان یو خپلواک هېواد دی او حق لري له هر هېواد سره اړیکې جوړي او هېڅوک باید د دې هېواد په کورنیو پالیسو کې مداخله ونه کړي. هغه زیاته کړې، چې د افغانستان او پاکستان ترمنځ منظم او خطرناک پوځي تقابل روان دی.
سردار حسین بابک د افغانستان انټرنشنل - پښتو سره په مرکه کې ویلي، چې وړاندې پر ډیورنډ کرښه د افغانستان او پاکستان ترمنځ نښتې لنډمهال او بې نظمه وې، خو اوس «دواړه هېوادونه منظم او خطرناک پوځي تقابل» ته روان دي.
نوموړي اندېښنه ښودلې چې که دا لړۍ اوږده شي، دواړه هېوادونه به د پوځي ځواکونو لګښتونه زیات کړي او ولسي خلک به له جدي ګواښ سره مخ شي.
هغه د افغانستان ناامنه کول د سیمې لپاره ګواښ وباله او ټينګار یې وکړ، چې دواړه هېوادونه دې بې باورۍ له سفارتي لارو حل کړي.
بابک غوښتنه کړې، چې په پاکستان کې باید د مېشتو افغانانو درناوی وشي او له هغوی سره د سپکاوي او زورزیاتې ډک چلند پرېښودل شي. نوموړي له نورو هېوادونو سره د طالبانو اړیکو ته په اشارې زياته کړې: « افغانستان یو خپلواک هېواد دی او حق لري چې له هر هېواد سره اړیکې جوړې کړي او هېڅوک باید د دې هېواد په کورنیو پالیسیو کې مداخله ونکړي.»
په دې وروستیو کې طالبانو له هند سره اړیکې زیاتې کړي او نوي ډيلي ته د طالبانو د بهرنیو چارو د وزیر سفر پاکستانی لوری خواشنی کړی او اندېښمن کړی دی.
ډېری شنونکي وايي، د هند او طالبانو د اړیکو د جوړېدو له امله پاکستان غوسه شوی او هڅه کوي پر طالبانو خپل فشار زیات کړي.
د طالبانو د کورنیو چارو وزارت د مقام د دفتر رييس زینالله عابر وايي، د دوی کابینې پرېکړه کړې چې په ټول هېواد کې سمنټي موانع لرې کړای شي او د دغې چارې مسوولیت هم کورنیو چارو وزارت ته سپارل شوی دی.
د نوموړي په وینا، د کورنیو چارو وزارت د رهبرۍ په سپارښتنه په لومړي سر کې د دغه وزارت له قرارګاه د سمنټي دېوالونو یا موانعو د لرې کولو بهیر پیل شو.
زینالله عابر زیاتوي: «دا د دې ښکارندويي کوي چې په کابل او په عموم کې په ټول افغانستان کې امن راغلی او اوس دې شي ته موږ ضرورت نه احساسوو، ځکه ولس ته یې ستونزې جوړې کړي، لارې یې بندې کړي نور به دغه موانع په لارو او سړکونو کې نه وي.»
د کابل ښاریانو په وینا، په تېر جمهوري نظام او د طالبانو د واکمنۍ په لومړیو کې هم ورته بهیر څو ځلي پیل شو، خو له څه ځنډ وروسته بېرته یاد موانع د دولتي بنسټونو او ان د طالبانو د کورونو په شاوخوا کې کېښودل شول.
د کورنیو چارو وزارت د مقام د دفتر رييس زینالله عابر بیا وايي: «له نن تاریخ څخه چې د یکشنبې ورځ ده، دغه اغاز به کېږي هغه موانع چې د هر نهاد یا ارګان مخې ته وي هغه به لرې کېږي او مصونو ځایونو ته به لېږدول کېږي. کورنیو چارو وزارت دغې پرېکړې عملي کولو ته متعهد دی.»
یو شمېر کابل مېشتي د طالبانو له دغې چارې په هرکلي سره په ټينګار وايي، دغه بهیر له کومې استثنا پرته باید په ټول هېواد او په ځانګړې توګه په پلازمېنه کابل کې عملي شي.
د دوی په وینا، په دې سره ښاري ښکلا رامنځته کېږي او د فرعي سړکونو په پرانېستل کېدو سره به په عمومي سړکونو کې له ګڼې ګوڼې هم مخنیوی وشي او ورسره ټرافیک هم منظم کېږي.