ایران د دوغارون ازادې سوداګریزې ـ صنعتي سیمې د دیوال جوړولو کار پیل کړی

له افغانستان سره پر پوله د ایران د دوغارون ازادې سوداګریزې ـ صنعتي سیمې مسوولانو ویلي، چې د دې سیمې د ۴۰ کیلومتره دیوال جوړولو چارې پیل شوې دي.

د ایران د دولتي اژانس ایرنا د راپور له مخې، امین شاهګلي د سې شنبې په ورځ د تایباد له والي سره د لیدنې پر مهال ویلي چې د دې اقتصادي مرکز د دیوال جوړولو پروژه به د پلان له مخې په یوه کال کې بشپړه شي.

هغه زیاته کړه، د دوغارون د ازادې سیمې د «صفر زون» د احاطې جوړول هم د دې ادارې له فعالو پروژو څخه ده چې تر اوسه ۳۰ سلنه پرمخ تللې.

د شاهګلي په وینا، د دوغارون د ازادې سوداګریزې ـ صنعتي سیمې اقتصادي فعالیتونه به د قانون له مخې په ۸۷۰۰ هکټاره ځمکه کې ترسره کېږي، چې له دې جملې څخه د ۲۰۰۰ هکټاره لپاره رسمي اسناد هم صادر شوي دي.