اروپایي پارلمان د بشري حقونو لپاره د ۲۰۲۵ کال سخاروف جایزه دوو بندی خبریالانو ته ورکړه. انډریز پوچوبوټ د بېلاروس او مزیا اماګوبیلي د جورجیا اوسېدونکي دي، چې د ډیموکراسۍ او مدني ټولنې د دفاع لپاره یې هڅې کړي دي.
د اروپایي پارلمان د سیاسي ګوندونو د مشرانو کنفرانس د چهارشنبې په ورځ د پارلمان د رییسې روبرتا متسولا په مشرۍ اعلان وکړ: «دا دواړه خبریالان یوازې د خپل مسلکي دندې د ترسره کولو او د حقیقت د ویلو له امله ناحقه بندي شوي دي. د دوی زړورتیا هغوی د ازادۍ او ډیموکراسۍ د مبارزې سمبول ګرځولي دي.»
د سخاروف جایزه چې په ۱۹۸۸ کال کې د روسیې د مخالف ساینس پوه اندری سخاروف په نوم تاسیس شوه، د اروپایي ټولنې د بشري حقونو تر ټولو لوړه جایزه ده.
دا جایزه چې ارزښت یې ۵۰،۰۰۰ یورو دی، هر کال هغو اشخاصو یا ادارو ته ورکول کېږي، چې د فکر د ازادۍ او بشري حقونو د دفاع لپاره یې کار کړی وي.
