د طالبانو ویاند وايي چې کابل ښاروالۍ په سږني مالي کال کې د کابل ښار لپاره ټولې ۲۵۸ پروژې پلان کړې وې، چې مجموعی مصرف یې ۸،۱۲ میلیارده افغانۍ دی. ذبیح الله مجاهد وايي له دغو پروژو ۱۷۰ تکمیل شوې دي او نورې تر کار لاندې دي.
د طالبانو ویاند ذبیح الله مجاهد نن سې شنبه، د لړم ۲۰مه په خپل اېکس کې لیکلي، چې ددې ډلې تر واک لاندې د کابل ښاروالۍ ۱۴۲ نورې پروژې چې د خیریه ادارو له خوا تمویلیږي، کابل ښاروالي یې مدیریت او نظارت کوي.
د پخواني ولسمشر لومړی مرستیال امرالله صالح وايي، چې جګړه د پاکستان لویو ښارونو ته غځېدلې ده. صالح وايي، چې پاکستان لا هم پخوانۍ تېروتنې تکراروي، خو رېښې یې نه مني. نوموړی وايي، اسلام اباد جهاد د خپلو ملي ګټو د تامین وسیله ګڼلې ده.
صالح د سې شنبې په ورځ، د لړم پر ۲۰مه پر خپل اېکس ولیکل، چې دی د پاکستان د خلکو نهیلي او غوسه انګیرلی شي، خو هغوی خپله غوسه پر بل ځای تشوي.
نوموړی وايي، د پاکستان د ښارونو پر لور د طالبانو د بریدونو غځېدو په تړاو دده اټکلونه سم ثابت شول، خو یو هوښیار حکومت باید دې ته پام کړی وای او مخه یې نیولې وای.
صالح وايي، چې پاکستان لاهم له۱۹۹۴نه تر ۲۰۲۴ کلونو پورې تېروتنو نه درس نه دی اخیستی او همغه تېروتنې په بل ډول او بله بڼه تکراروي.
نوموړي ویلي، « هو، ترهګري ستاسې ښارونو ته ننوتې، خو تاسې د دې د ریښې له منلو انکاري یئ. د ترهګرۍ ریښه ستاسې تاریخي تېروتنه ده، چې نن هم روانه ده او دا چې تاسې جهاد د خپلو ملي ګټو د تامین وسیله ګڼلې ده».
صالح وايي، پاکستان لا هم ګاونډي طالبان، سره له دې چې پوهیږي دوی عملا د تحریک طالبان پاکستانپه څېر دي، ترهګر نه دي اعلان کړي.
نوموړی وايي، د پاکستان بنسټیزه تېروتنه داده چې د همدې ترهګرو له لارې، چې پرې غوسه دی، د افغانستان جمهوریت یې له منځه یووړ، او په داسې حال کې، چې خپله مشروطه جمهوریت دی، په افغانستان کې یې د طالبانو مذهبي دیکتاتوري ټینګه کړې.
نوموړي دغه راز نیوکه کړې، چې اسلام اباد په افغانستان کې د تاجیکانو پر وړاندې د پښتنو او د پښتنو پر وړاندې د تاجیکانو کارت کارولی، خو ټینګار یې کړی، چې خپل ستر پوځ دې په هوښیاري وکاروي او طالبان دې نه یوازې نورو لږه کیو ته، بلکې د افغانستان د ټولو انسانانو لپاره خطر وپېژني.
په کندهار کې د طالبانو د اطلاعاتو او فرهنګ ریاست وايي، چې د احمدشاه بابا د کور اړوند ساحو د دوهمې پروژې ترميماتي چارې په چټکۍ روانې دي. د احمدشاه بابا د کور د بيارغونې چارې د طالبانو د اطلاعات او فرهنګ وزارت له لوري پيل شوې، چي د دوهمې برخې تر بشپړېدو وروسته به پرانېستل شي.
د طالبانو د کندهار د اطلاعاتو او کلتور ریاست نن سې شنبه، د لړم ۲۰مه څرګنده کړې چې د دې ریاست مشر انعامالله سمنګاني د احمد شاه بابا د کور د بیارغونې پروژې له څارنې وروسته، اړوندو چارواکو ته لارښوونې کړې چې د رغونې چارې په ښه توګه بشپړې شي او د کور ساتنې اړوند لازم اقدامات ترسره شي.
طالبان وايي، د لومړۍ پروژې اړوند د احمد شاه بابا کور ترمیماتي کارونه بشپړ شوي، خو د دوهمې پروژې اړوند د کور لویه لار، دروازه، د پلي تګ لاره او پارکینګ لا هم تر کار لاندې دي.
له دې وړاندې، طالبانو د روان کال د تلې میاشتې کې ویلي وو چې د کور د بیا رغونې چارې شاوخوا ۸۰ سلنه بشپړې شوې دي.
دغه ریاست همدارنګه د روان کال د زمري میاشتې په جریان کې ویلي و چې د احمد شاه بابا د کور د بیا رغونې لپاره تخنیکي او مسلکي سروې پیل شوې ده، او د سروې له پای ته رسېدو وروسته به د رغونې چارې هم عملي شي.
د احمد شاه بابا کور د کندهار ښار د لومړۍ ناحیې په سدوزو سیمه کې موقعیت لري، درې سوه کاله تاریخ لري او په بخارایي معمارۍ جوړ شوی دی.
د دې کور د استملاک چارې د پخواني حکومت پرمهال بشپړې شوې وې، خو د بیارغونې چارې نیمګړې پاتې شوې، چې اوس طالبان هڅه کوي د پخواني حکومت پاتې چارې بشپړې کړي.
د طالبانو د بهرنیو چارو وزارت د یوې اعلامیې په ترڅ کې په جنوبي وزیرستان کې پر پوځي کالج برید او د پاکستان په پلازمېنه اسلام اباد کې ځانمرګی برید غندلي او پر دې پېښو یې خواشیني ښودلې ده. په اسلام اباد کې د ځانمرګي برید له امله ۱۲ تنه وژل شوي او ګڼ نور ټپیان دي.
یاد وزارت په خپره کړې اعلامیه کې ویلي: « د بهرنیو چارو وزارت د پاکستان په پلازمېنه اسلام اباد کې د چاودنې او په واڼه کې په تعلیمي مرکز د برید له امله، چې پکې سلګونه کسانو ژوند له لاسه ورکړی او ټپیان شوي، خپله ژوره خواشیني ښیي او غندي یې.»
د طالبانو د بهرنیو چارو وزارت په داسې حال کې دا پېښې غندي چې د پاکستان دفاع وزیر نن په اسلام اباد کې ځانمرګي برید ته په اشارې سره پر ایکس خواله رسنۍ ویلي چې د کابل واکمنان په پاکستان کې جګړه درولی شي خو تر اسلام اباد پورې د جګړې راوړل د دوی (طالبان) یو بل خطرناک پیغام دی، چې پاکستان یې د ځواب ورکولو توان لري.
د یادولو وړ ده، چې د جنوبي وزیرستان په مرکز واڼه کې له پروني ځانمرګي برید وروسته، لاهم د وسله والو او د پاکستان امنیتي ځواکونو ترمنځ نښتې روانې دي.
بریدګرو د کالج په اداري بلاک کې مورچل نیولی او تر اوسه له ۵۳۷ زده کوونکو، ۱۳۷ تنه د جګړې له ځایه اېستل شوي.
بل خوا نن شاوخوا ۱۲:۰۰ بجې د دغه هېواد د پلازمېنې په «جي ۱۱» سیمه کې د یوه ځانمرګي برید له امله لږترلږه ۱۲ کسان وژل شوي او ۲۰ نور ټپیان دي.
د اسلام اباد پولیسو په وینا، ځانمرګی بریدګر چې په موټرسایکل سپور و، د پولیسو موټر ته نږدې په ځان پورې تړلو چاودېدونکو توکو ته چاودنه ورکړې ده.
د پاکستان لومړی وزیر شهباز شریف وايي چې طالبان دې د افغانستان په خاوره کې د تحریک طالبان پاکستان په ګډون جنګیالۍ ډلې کنټرول کړي. نوموړی زیاتوي چې وسله والې ډلې نه یوازې په افغانستان کې بلکې له پولو هاخوا هم خطر دي.
د پاکستان لومړي وزیر شهباز شریف نن سې شنبه، د لړم ۲۰مه، په اسلام اباد کې بین الپارلماني کنفرانس ته په وینا کې وویل چې ملتونه کولی شي په ګډه د تلپاتې سولې او ګډې سوکالۍ په چوکاټ کې نړۍ جوړه کړي.
هغه وویل چې پاکستان په یوه سوله ییز ګاونډ باور لري او د دې هدف لپاره یې سختې هڅې کړې دي.
شهباز شریف تیره میاشت د پاکستان په سرحدي پوستو بریدونو ته په اشارې سره وویل چې که څوک پر پاکستان بریدونه کوي پرېکنده ځواب ورکړل شوی دی.
هغه له طالبانو وغوښتل، چې پوه شي تلپاتې سوله د ټي ټي پي او نورو جنګیالیو ډلو د کنټرولولو له لارې ترلاسه کیدای شي.
شریف له نړۍ څخه وغوښتل چې د سولې د ترویج، دوامداره پرمختګ او د ګډ امنیت د پیاوړتیا لپاره متحد شي.
د یادونې وړ ده، چې د پاکستان او طالبانو ترمنځ له اوربند وروسته دوه دورې خبرې اترې بې نتیجې پای ته ورسېدې او طالبانو د ټي ټي پي د مهار کولو په تړاو د اسلام اباد غوښتنې ونه منلې او ویې ویل، چې ټي ټي پي د پاکستان داخلي موضوع ده.
د پاکستان د کورنیو چارو وزیر محسن نقوي د خیبر پښتونخوا پر خلکو غږ وکړ، چې د وسله والو جنګیالیو پرځای د پاکستان له پوځ او هېواد سره ودریږي. نوموړي وویل، « زه د خیبر پښتونخوا له خلکو غواړم چې خپل ځانونه مه بدناموئ».
په پاکستان کې د امنیتي پېښو له ډېرېدو سره هممهاله، ددغه هېواد د کورنیو چارو وزیر محسن نقوي د سې شنبې په ورځ، د لړم پر ۲۰مه، په اسلام اباد کې خبریالانو ته په خبرو کې د خیبر پښتونخوا خلک مخاطب کړل، چې د ترهګرو پرځای دې د پاکستان له پوځ سره ودریږي.
محسن نقوي افغانستان ته له اشارې پرته وویل، چې « دا ستاسې د بدنامولو هڅه کوي، تاسې د خپلوۍ په نامه له ځان سره ملګري کول غواړي».
هغه په همدغه ترڅ کې د خیبر پښتونخوا خلک مخاطب کړل، چې « زه د خیبر پښتونخوا له خلکو غواړم چې خپل ځانونه مه بدناموئ، موږ باید له خپل هېواد سره ودرېږو. موږ باید له خپلو ځواکونو سره ودرېږو، چې دغه ترهګر تصفیه کړي».
نقوي چې د اسلام اباد له ځانمرګي برید وروسته یې خبریالانو ته خبرې کولې، زیاته کړه، چې ددوی لپاره باید تر هرڅه وړاندې پاکستان مخکې وي او له هغه وروسته نور هېوادونه، خو د نورو هېوادونو په اړه یې جزئیات ورنه کړل.
د خیبر پښتونخوا ایالتي حکومت، ددغه ایالت ملتپالو ګوندونو له دې وړاندې د پاکستان پر افغان سیاستونو نیوکې کړې او په قبایلي سیمو کې یې د پوځ له عملیاتو سره مخالفت کړی دی.
نقوي دغه راز د پوښتنې په ډول وویل: « تاسې ماته دا ووایئ، چې په افغانستان کې څومره خلک دي چې له خپل دریځ نه شاته کیږي؟ نو موږ ته دا کتل په کار دي او موږ باید له خپل هېواد سره پاتې شو».
د پاکستان د کورنیو چارو وزیر دا څرګندونې داسې مهال دي، چې د شنونکو په باور، ددغه هېواد پوځ په قبایلي سیمو کې د پوځي عملیاتو لپاره د ولسي او سیاسي ملاتړ له کمزوري کېدو ځوریږي.
پاکستاني طالبانو، چې ډېری پکې د خیبر پښتونخوا د مختلفو ولسوالیو اوسېدونکي شامل دي، په دې وروستیو کې په خیبر پښتونخوا ایالت کې بریدونه ډېر کړي دي.